ജിഎസ്ടി വെട്ടിപ്പ്: ഉന്നത ഉദ്യോഗസ്ഥർക്ക് വീഴ്ചയെന്ന് അന്വേഷണ സംഘം റിപ്പോർട്ട്

നികുതി അടയ്ക്കാതിരുന്നതുമായി ബന്ധപ്പെട്ട കേസിൽ മേൽനോട്ട

ചുമതല വഹിച്ച ഉന്നത ഉദ്യോഗസ്ഥന് ഗുരുതര വീഴ്ച സംഭവിച്ചതായി പ്രത്യേക അന്വേഷണ സംഘം (എസ്‌ഐടി) ജിഎസ്ടി കമ്മിഷണർക്ക് റിപ്പോർട്ട് സമർപ്പിച്ചു. സംഭവവുമായി ബന്ധപ്പെട്ട് മുൻപ് സ്ഥലംമാറ്റ നടപടിക്ക് വിധേയനായ കാഞ്ഞങ്ങാട് ഇന്റലിജൻസ് ഓഫിസർ പി.വി.രത്‌നാകരന്റെ മൊഴി അഞ്ചംഗ എസ്‌ഐടി സംഘം രേഖപ്പെടുത്തിയിരുന്നു.

കൊച്ചിയിലെ ബാങ്ക് ശാഖയിൽ പണം വിദേശത്തേക്ക് അയച്ചതുമായി ബന്ധപ്പെട്ട് നടത്തിയ പരിശോധനകൾക്ക് ശേഷമാണ് എസ്‌ഐടി തങ്ങളുടെ പ്രാഥമിക റിപ്പോർട്ട് കൈമാറിയിട്ടുള്ളത്. വിഷയത്തിൽ കൂടുതൽ ആഴത്തിലുള്ള തുടരന്വേഷണം നടത്തണമെന്നും സംഘം ശുപാർശ ചെയ്തിട്ടുണ്ട്.

ജിഎസ്ടി കമ്മിഷണർ ഈ റിപ്പോർട്ട് ഉടൻ തന്നെ മുഖ്യമന്ത്രിക്ക് കൈമാറുമെന്നും തുടർനടപടികൾ മുഖ്യമന്ത്രിയുടെ ഓഫീസായിരിക്കും തീരുമാനിക്കുകയെന്നും അധികൃതർ അറിയിച്ചു. സ്പോൺസർ കമ്പനി വിദേശത്തേക്ക് അയച്ച 126 കോടി രൂപയ്ക്ക്മേൽ 22.6 കോടി രൂപയുടെ നികുതി അടച്ചില്ലെന്ന് ചൂണ്ടിക്കാട്ടി കാഞ്ഞങ്ങാട് ഇന്റലിജൻസ് ഓഫിസറായ പി.വി.രത്‌നാകരൻ 2025 ഓഗസ്റ്റ് ഒന്നിന് കാസർകോട് ഡപ്യൂട്ടി കമ്മിഷണർക്ക് ഔദ്യോഗികമായി വിവരം നൽകിയിരുന്നു.

എന്നാൽ മാസങ്ങൾ കഴിഞ്ഞിട്ടും ഈ വിഷയത്തിൽ യാതൊരുവിധ തുടർനടപടികളും ഉണ്ടായില്ല. കമ്പനിയുടെ മാനേജിങ് ഡയറക്ടറായ ആന്റോ അഗസ്റ്റിന് ജിഎസ്ടി വകുപ്പ് നോട്ടിസ് അയച്ചതിന് പിന്നാലെ രണ്ട് മന്ത്രിമാരുടെ ഓഫീസുകളിൽ നിന്ന് ഇടപെടലുകൾ ഉണ്ടായതായി ആക്ഷേപങ്ങൾ ഉയർന്നിരുന്നു.

ഇതിന് തൊട്ടുപിന്നാലെ അന്വേഷണ നടപടികൾ മരവിപ്പിക്കപ്പെടുകയായിരുന്നു. നികുതി വെട്ടിപ്പ് പുറത്തുകൊണ്ടുവന്ന ഉദ്യോഗസ്ഥനെ അഭിനന്ദിക്കുന്നതിന് പകരം പ്രതികാര നടപടിയുടെ ഭാഗമായി തിരുവനന്തപുരത്തേക്ക് സ്ഥലം മാറ്റുകയാണ് ചെയ്തത്.

കൂടാതെ അദ്ദേഹത്തെ സസ്പെൻഡ് ചെയ്യാനുള്ള നീക്കങ്ങളും നടന്നിരുന്നു. നികുതി വെട്ടിപ്പ് വിഷയത്തിൽ നടപടികൾ വൈകിപ്പിച്ചതിന് മൂന്ന് ഉന്നത ഉദ്യോഗസ്ഥർക്ക് ജിഎസ്ടി കമ്മിഷണർ കഴിഞ്ഞ ദിവസം ചാർജ് മെമ്മോ നൽകിയിട്ടുണ്ട്.

കോഴിക്കോട് ജിഎസ്ടി ഇന്റലിജൻസ് ആൻഡ് എൻഫോഴ്‌സ്‌മെന്റ് ജോയിന്റ് കമ്മിഷണർ ശ്രീവത്സല, കാസർകോട് ഡപ്യൂട്ടി കമ്മിഷണർ വി.സചിത്, കാഞ്ഞങ്ങാട് ഇന്റലിജൻസ് ഓഫിസർ കെ.എസ്.സജിനി എന്നിവർക്കാണ് മെമ്മോ നൽകിയത്. നികുതി വെട്ടിപ്പ് വ്യക്തമായിട്ടും കമ്പനി പ്രതിനിധികളെ വിളിപ്പിച്ച് നോട്ടിസ് നൽകിയതല്ലാതെ കുടിശ്ശിക തുക ഈടാക്കാനുള്ള യാതൊരു നടപടിയും ഇവർ സ്വീകരിച്ചില്ലെന്ന് അന്വേഷണത്തിൽ കണ്ടെത്തിയിട്ടുണ്ട്.

ഇതിനുപുറമേ, കമ്പനി രാജ്യാന്തര കായിക കോടതിയിൽ കേസ് ഫയൽ ചെയ്ത വകയിൽ നൽകിയ ഫീസിന്മേൽ അരക്കോടി രൂപയോളം ജിഎസ്ടി ഇനത്തിൽ അടയ്ക്കേണ്ടതുണ്ടെന്നും എസ്‌ഐടി കണ്ടെത്തിയിട്ടുണ്ട്.