നിതിൻ രാജ് മരണവുമായി ബന്ധപ്പെട്ട കേസിൽ ഒന്നാം പ്രതിയായ ഡോ.
എം.കെ. റാം അറസ്റ്റിലായതിന് പിന്നാലെ തലശ്ശേരി സെഷൻസ് കോടതി പരിസരത്ത് നാടകീയ സംഭവങ്ങൾ അരങ്ങേറി.
ഇന്ന് രാവിലെ കുടകിൽ നിന്നാണ് പ്രതിയെ ക്രൈംബ്രാഞ്ച് സംഘം കസ്റ്റഡിയിലെടുത്തത്. തുടർന്ന് പ്രതിയെ കോടതിയിൽ ഹാജരാക്കിയെങ്കിലും സുപ്രീം കോടതിയുടെ മാർഗനിർദേശങ്ങൾ പാലിച്ചല്ല അറസ്റ്റ് രേഖപ്പെടുത്തിയതെന്ന പ്രതിഭാഗത്തിന്റെ വാദം കോടതി അംഗീകരിച്ചു.
ഇതിനെത്തുടർന്ന് ഡോ. റാമിനെ കോടതി വിട്ടയച്ചു.
കോടതി നടപടികൾക്ക് ശേഷം കുടുംബത്തോടൊപ്പം കാറിൽ മടങ്ങാൻ ശ്രമിക്കവെ, കോടതിക്ക് പുറത്തുവെച്ച് ക്രൈംബ്രാഞ്ച് സംഘം വീണ്ടും പ്രതിയെ ബലപ്രയോഗത്തിലൂടെ കസ്റ്റഡിയിൽ എടുക്കുകയായിരുന്നു. നടപടിക്രമങ്ങൾ പൂർത്തിയാക്കിയ ശേഷം നാളെ വീണ്ടും പ്രതിയെ കോടതിയിൽ ഹാജരാക്കുമെന്ന് അന്വേഷണ ഉദ്യോഗസ്ഥർ അറിയിച്ചു.
തങ്ങളെ ബലം പ്രയോഗിച്ചാണ് ഉദ്യോഗസ്ഥർ തടഞ്ഞതെന്ന് ഡോ. റാമിന്റെ കുടുംബം മാധ്യമങ്ങളോട് പ്രതികരിച്ചു.
നിതിൻ രാജിന്റെ മരണത്തിലെ ദുരൂഹതകൾ നീക്കുന്നതിനായി ക്രൈംബ്രാഞ്ച് ഐജി അജീതാ ബേഗത്തിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് നിലവിൽ കേസ് അന്വേഷിക്കുന്നത്. നിതിന്റെ പിതാവ് വൈ.
രാജൻ നൽകിയ പരാതിയുടെ അടിസ്ഥാനത്തിൽ ആഭ്യന്തരമന്ത്രി രമേശ് ചെന്നിത്തലയാണ് കേസ് ക്രൈംബ്രാഞ്ചിന് കൈമാറാൻ ഉത്തരവിട്ടത്. നിതിന്റേത് ആത്മഹത്യയല്ലെന്നും കൊലപാതകമാണെന്നും നേരത്തെ തന്നെ പിതാവ് ആരോപിച്ചിരുന്നു.
ആഭ്യന്തരമന്ത്രിയെ നേരിൽ കണ്ടശേഷമാണ് അദ്ദേഹം ഈ ആവശ്യം ഉന്നയിച്ചത്. നിതിനെ കൊലപ്പെടുത്തി മൃതദേഹം ഉപേക്ഷിച്ചതാണെന്നും, സംഭവത്തിൽ ഉൾപ്പെട്ട
മുഴുവൻ പ്രതികളെയും നിയമത്തിന് മുന്നിൽ കൊണ്ടുവരണമെന്നും വൈ. രാജൻ ആവശ്യപ്പെട്ടു.
കേസിലെ മുഖ്യപ്രതി ഡോ. റാമിനെ പിടികൂടിയ നടപടിയെ അദ്ദേഹം സ്വാഗതം ചെയ്തു.
കൂടാതെ, കേസിലെ രണ്ടാം പ്രതിയായ സംഗീതയ്ക്കും സംഭവത്തിൽ പങ്കുള്ള മറ്റ് അധ്യാപകർക്കുമെതിരെ ശക്തമായ നിയമനടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.
