അന്താരാഷ്ട്ര യോഗ ദിനം: ആരോഗ്യ പരിപാലനത്തിൽ യോഗയുടെ പ്രാധാന്യം

ഓരോ വർഷവും ജൂൺ 21-ാം തീയതി അന്താരാഷ്ട്ര യോഗ ദിനമായി ലോകമെമ്പാടും ആചരിക്കുന്നു. 2014-ൽ ഐക്യരാഷ്ട്രസഭയുടെ (UNGA) പൊതുസഭയെ അഭിസംബോധന ചെയ്തുകൊണ്ട് ഇന്ത്യൻ പ്രധാനമന്ത്രി നരേന്ദ്ര മോദിയാണ് ജൂൺ 21 അന്താരാഷ്ട്ര യോഗ ദിനമായി പ്രഖ്യാപിക്കണമെന്ന ആശയം മുന്നോട്ടുവച്ചത്.

ഇന്ത്യയുടെ ഈ നിർദ്ദേശം ഐക്യരാഷ്ട്രസഭ റെക്കോർഡ് 175 അംഗരാജ്യങ്ങളുടെ പിന്തുണയോടെ അംഗീകരിക്കുകയും, 2015 ജൂൺ 21-ന് ആദ്യത്തെ യോഗ ദിനം ആചരിക്കുകയും ചെയ്തു. ദൈനംദിന ജീവിതത്തിൽ യോഗ പരിശീലിക്കുന്നത് കൊണ്ടുള്ള ആരോഗ്യപരമായ ഗുണങ്ങൾ നിരവധിയാണ്.

അവ താഴെ പറയുന്നവയാണ്: ശാരീരിക നിലയും പേശീബലവും: കഴുത്തിനും നട്ടെല്ലിനും ചുറ്റുമുള്ള പേശികളെ ശക്തിപ്പെടുത്തുന്നതിലൂടെ ശരീരത്തിന്റെ പോസ്ചർ മെച്ചപ്പെടുത്താൻ യോഗയ്ക്ക് സാധിക്കും. ഇത് പേശികളുടെ വേദനയും സമ്മർദ്ദവും ലഘൂകരിച്ചുകൊണ്ട് ആരോഗ്യത്തോടെയിരിക്കാൻ സഹായിക്കുന്നു.

ഹൃദയാരോഗ്യം: സ്ഥിരമായി യോഗ ചെയ്യുന്നത് വഴി ഹൃദയാരോഗ്യം മെച്ചപ്പെടുത്താൻ കഴിയുമെന്ന് പഠനങ്ങൾ വ്യക്തമാക്കുന്നു. കൃത്യമായ യോഗാഭ്യാസങ്ങൾ രക്തസമ്മർദ്ദം, കൊളസ്ട്രോൾ എന്നിവയുടെ അളവ് കുറയ്ക്കാൻ സഹായിക്കുന്നു.

ആഴത്തിലുള്ള ശ്വസന പ്രക്രിയകൾ ഹൃദയത്തിന് കൂടുതൽ സംരക്ഷണം നൽകുന്നു. സന്ധികളുടെ ആരോഗ്യം: സന്ധികൾക്ക് ചുറ്റുമുള്ള പേശികളെ ശക്തിപ്പെടുത്താനും അവയുടെ സമ്മർദ്ദം കുറയ്ക്കാനും യോഗ ഫലപ്രദമാണ്.

സന്ധിവാതമുള്ളവർ പതിവായി യോഗ ചെയ്യുന്നത് വേദന കുറയ്ക്കാൻ സഹായിക്കും. മാനസികാരോഗ്യം: മാനസികാരോഗ്യം നിലനിർത്തുന്നതിൽ പ്രതിരോധ സംവിധാനത്തിന് വലിയ പങ്കുണ്ട്.

ശരിയായ രീതിയിലുള്ള വിശ്രമവും സമ്മർദ്ദം കുറയ്ക്കുന്നതും ശക്തമായ പ്രതിരോധ സംവിധാനത്തിന് അത്യന്താപേക്ഷിതമാണ്. വിട്ടുമാറാത്ത അസ്വസ്ഥതകൾ: നടുവേദന, ടെൻഷൻ മൂലമുള്ള തലവേദന, ആർത്രൈറ്റിസ് തുടങ്ങിയ അവസ്ഥകൾ ലഘൂകരിക്കാൻ യോഗ സഹായിക്കുന്നു.

യോഗ പരിശീലിക്കുമ്പോൾ കഠിനമായ ആസനങ്ങൾ മാത്രം ചെയ്യാതെ, ലളിതമായ സ്ട്രെച്ചിങ്, പ്രാണായാമം, ധ്യാനം എന്നിവ കൂടി ഉൾപ്പെടുത്താൻ ശ്രദ്ധിക്കണം. പേശികൾക്ക് അമിത ആയാസം അനുഭവപ്പെടുകയാണെങ്കിൽ ഒരു ദിവസത്തെ വിശ്രമം നൽകേണ്ടതാണ്.