പത്തനംതിട്ട കെഎസ്ആർടിസി ഡിപ്പോയിൽ ഡീസൽ ക്ഷാമം; പമ്പ സ്പെഷൽ സർവീസുകൾ പ്രതിസന്ധിയിൽ

ഡീസൽ ലഭ്യതയിലുണ്ടായ കുറവിനെത്തുടർന്ന് പത്തനംതിട്ട കെഎസ്ആർടിസി ഡിപ്പോയിൽ നിന്നുള്ള പമ്പ സ്പെഷൽ സർവീസുകൾ കടുത്ത പ്രതിസന്ധിയിലായി. ഇന്നലെ രാവിലെ 10.30 മുതൽ 12.30 വരെ പമ്പ സർവീസിലേക്കായി ഒരു ബസ് പോലും ഡിപ്പോയിൽ നിന്ന് അയക്കാൻ സാധിച്ചില്ല.

പത്തനംതിട്ട ഡിപ്പോയ്ക്ക് പുറമെ റാന്നി, കോന്നി, പത്തനാപുരം, എരുമേലി തുടങ്ങിയ ഡിപ്പോകളിൽ സർവീസ് നടത്തുന്ന ബസുകളും ഇവിടെയെത്തിയാണ് ഇന്ധനം നിറയ്ക്കുന്നത്. സാധാരണയായി പ്രതിദിനം 3,000 മുതൽ 4,000 ലീറ്റർ വരെ ഡീസലാണ് ഈ ഡിപ്പോയുടെ ആവശ്യത്തിനായി വരുന്നത്.

കന്നിമാസ പൂജയോടനുബന്ധിച്ച് ബുധനാഴ്ച ശബരിമല ക്ഷേത്രനട തുറന്ന പശ്ചാത്തലത്തിൽ പത്തനംതിട്ടയിൽ നിന്ന് 15 ബസുകളും ചെങ്ങന്നൂരിൽ നിന്ന് 40 ബസുകളുമാണ് പമ്പ സ്പെഷൽ സർവീസുകൾക്കായി ക്രമീകരിച്ചിട്ടുള്ളത്.

എന്നാൽ കെട്ടിട നിർമാണ പ്രവർത്തനങ്ങൾ നടക്കുന്നതിനാൽ ചെങ്ങന്നൂർ കെഎസ്ആർടിസി ഡിപ്പോ നിലവിൽ അടച്ചിട്ടിരിക്കുകയാണ്.

അതിനാൽ ചെങ്ങന്നൂരിൽ നിന്നുള്ള മുഴുവൻ പമ്പ സ്പെഷൽ ബസുകളും പത്തനംതിട്ട ഡിപ്പോയിൽ എത്തി ഡീസൽ നിറയ്ക്കണമെന്നാണ് കർശന നിർദേശം നൽകിയിട്ടുള്ളത്.

ഇന്നലെ രാവിലെ ഡിപ്പോയിൽ 3,000 ലീറ്റർ ഡീസൽ ലഭ്യമായിരുന്നു. രാവിലെ എത്തിയ ബസുകളിൽ ഈ ഇന്ധനം പൂർണ്ണമായും നിറച്ചു നൽകിയെങ്കിലും, തുടർന്ന് 10 മണിക്ക് ശേഷം എത്തിയ ബസുകൾക്ക് ഡീസൽ ലഭ്യമല്ലാതായി.

ഈ പ്രതിസന്ധിയെത്തുടർന്നാണ് രാവിലെ 10.30 മുതൽ 12.30 വരെയുള്ള സമയത്ത് പമ്പയിലേക്ക് ബസുകൾ സർവീസ് നടത്താൻ കഴിയാതെ വന്നത്. ഡീസൽ ക്ഷാമം മൂലം ബസ് സർവീസ് തടസ്സപ്പെട്ട

വിവരം ജീവനക്കാർ തീർഥാടകരെ നേരിട്ട് ബോധ്യപ്പെടുത്തി. ഇതിനിടയിൽ ഡിപ്പോ അധികൃതർ ഉടൻ തന്നെ ചീഫ് ഓഫിസുമായി ബന്ധപ്പെടുകയും 12,000 ലീറ്റർ ഡീസൽ അടിയന്തരമായി എത്തിക്കാനുള്ള നടപടികൾ സ്വീകരിക്കുകയും ചെയ്തു.

എറണാകുളത്തു നിന്നുള്ള ടാങ്കർ ലോറി പത്തനംതിട്ടയിൽ എത്തിച്ചേരാൻ സമയമെടുക്കുമെന്നതിനാൽ, നിലയ്ക്കൽ വരെ സർവീസ് നടത്തുവാൻ ആവശ്യത്തിന് ഡീസലുമുള്ള ഒരു ബസ് ഈ ഇടവേളയിൽ ക്രമീകരിച്ചു നൽകി. ഇതിനുശേഷമാണ് 12.30-ഓടെ ചെങ്ങന്നൂരിൽ നിന്നുള്ള പമ്പ ബോർഡ് വെച്ച ബസ് ഡിപ്പോയിൽ എത്തിയത്.

ഉടൻ തന്നെ കാത്തുനിന്ന അയ്യപ്പന്മാർ ഈ ബസിലേക്ക് ഇടിച്ചുകയറുകയായിരുന്നു.