കോഴിക്കോട് ജില്ലയിലെ വടകര മണിയൂരിൽ കെഎസ്ഇബിയുടെ വാഹനം തട്ടി വയോധികയ്ക്ക് ഗുരുതരമായി പരുക്കേറ്റ സംഭവത്തിൽ കർശന നടപടിയുമായി സംസ്ഥാന മനുഷ്യാവകാശ കമ്മിഷൻ രംഗത്ത്. പരുക്കേറ്റ വയോധികയ്ക്ക് ആവശ്യമായ ചികിത്സാ ചെലവും നഷ്ടപരിഹാരവും ലഭ്യമാക്കാൻ കെഎസ്ഇബി വടകര ഇലക്ട്രിക്കൽ സർക്കിൾ ഡെപ്യൂട്ടി ചീഫ് എൻജിനീയർ അടിയന്തര നടപടി സ്വീകരിക്കണമെന്ന് കമ്മിഷൻ ഉത്തരവിട്ടു.
കെഎസ്ഇബിയുടെ ഔദ്യോഗിക വാഹനത്തിൽ അപകടകരമായ രീതിയിൽ ബ്ലേഡ് ഘടിപ്പിച്ച തോട്ടി കൊണ്ടുപോയതിൽ കൃത്യവിലോപമോ ഗുരുതരമായ അശ്രദ്ധയോ അന്വേഷണത്തിൽ കണ്ടെത്തിയാൽ ബന്ധപ്പെട്ട ജീവനക്കാർക്കെതിരെ അച്ചടക്ക നടപടികൾ സ്വീകരിക്കണമെന്നും കമ്മിഷൻ ജുഡീഷ്യൽ അംഗം കെ.ബൈജുനാഥ് ഉത്തരവിലൂടെ വ്യക്തമാക്കി.
പ്രധാന വിവരങ്ങൾ:
* സംഭവം നടന്ന തീയതി: സെപ്റ്റംബർ 16
* പരുക്കേറ്റ വയോധിക: 75 വയസ്സുള്ള ജാനകി
* നിലവിലെ സ്ഥിതി: കോഴിക്കോട് മെഡിക്കൽ കോളജിലെ അത്യാഹിത വിഭാഗത്തിൽ ചികിത്സയിൽ തുടരുന്നു. മാധ്യമ വാർത്തകളുടെ അടിസ്ഥാനത്തിൽ മനുഷ്യാവകാശ കമ്മിഷൻ സ്വമേധയാ റജിസ്റ്റർ ചെയ്ത കേസിലാണ് ഈ ഉത്തരവ് പുറപ്പെടുവിച്ചിരിക്കുന്നത്.
ജീപ്പിൽ നിന്നും പുറത്തേക്ക് നീണ്ടുനിന്ന ബ്ലേഡ് ഘടിപ്പിച്ച തോട്ടി തട്ടിയാണ് വയോധികയുടെ വയറിനും കൈയ്ക്കും ആഴത്തിലുള്ള മുറിവുകളും ഗുരുതര പരുക്കുകളും ഉണ്ടായത്. പൊതു സേവനത്തിനായി ഉപയോഗിക്കുന്ന ഔദ്യോഗിക വാഹനങ്ങളിൽ അപകടസാധ്യതയുള്ള ഉപകരണങ്ങൾ യാതൊരു സുരക്ഷാ മുൻകരുതലുമില്ലാതെ കൊണ്ടുപോകുന്നത് പൊതുജനങ്ങളുടെ ജീവന് ഗുരുതരമായ ഭീഷണി ഉയർത്തുന്ന നടപടിയാണെന്ന് കെ.ബൈജുനാഥ് വിലയിരുത്തി.
ഇത്തരം സംഭവങ്ങൾ ആവർത്തിക്കാതിരിക്കാൻ കെഎസ്ഇബി ഉന്നത ഉദ്യോഗസ്ഥർ കർശനമായ ജാഗ്രത പുലർത്തണം. സംഭവത്തിൽ അടിയന്തരമായി ഇടപെട്ട് വയോധികയുടെ ചികിത്സാ വിവരങ്ങൾ വടകര ഇലക്ട്രിക്കൽ സർക്കിൾ ഡെപ്യൂട്ടി ചീഫ് എൻജിനീയർ വിലയിരുത്തണമെന്നും, വാഹനങ്ങളിൽ ഇത്തരം ഉപകരണങ്ങൾ കൊണ്ടുപോകുന്നതിനുള്ള കൃത്യമായ മാനദണ്ഡങ്ങൾ കെഎസ്ഇബി പുറത്തിറക്കണമെന്നും കമ്മിഷൻ നിർദേശിച്ചിട്ടുണ്ട്.
വയോധികയ്ക്ക് ലഭ്യമാക്കിയ ചികിത്സ, ചികിത്സാ ചെലവ്, നഷ്ടപരിഹാരം, അന്വേഷണത്തിന്റെ പുരോഗതി, ഉത്തരവാദികൾക്കെതിരെ സ്വീകരിച്ച അച്ചടക്ക നടപടികൾ എന്നിവ സംബന്ധിച്ച് ഡെപ്യൂട്ടി ചീഫ് എൻജിനീയർ നാലാഴ്ചയ്ക്കകം വിശദമായ റിപ്പോർട്ട് സമർപ്പിക്കണമെന്നും കമ്മിഷൻ ആവശ്യപ്പെട്ടു. ഈ വിഷയം ഒക്ടോബറിൽ കോഴിക്കോട് ഗവ.
ഗസ്റ്റ് ഹൗസിൽ നടക്കുന്ന സിറ്റിങ്ങിൽ വീണ്ടും പരിഗണിക്കും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
