സംസ്ഥാനത്ത് സ്വർണവില ഇന്ന് താഴേക്ക് പതിച്ചു. വിപണിയിൽ ഗ്രാമിന് 55 രൂപ കുറഞ്ഞ് 14,010 രൂപയാണ് പുതിയ നിരക്ക്.
ഇതേതുടർന്ന് ഒരു പവൻ സ്വർണത്തിന്റെ വില 440 രൂപ കുറഞ്ഞ് 1,12,080 രൂപയിലെത്തി. അമേരിക്കൻ ഫെഡറൽ റിസർവ് അടിസ്ഥാന പലിശ നിരക്ക് 0.25 ശതമാനം വർധിപ്പിക്കാൻ തീരുമാനിച്ചതിനെ തുടർന്ന് രാജ്യാന്തര വിപണിയിലുണ്ടായ ഇടിവാണ് ആഭ്യന്തര വിപണിയിലും പ്രതിഫലിച്ചത്.
എങ്കിലും വില കാര്യമായി ഇടിഞ്ഞിട്ടില്ലെന്നത് നിക്ഷേപകർക്ക് ആശ്വാസകരമാണ്. മൂന്നു വർഷങ്ങൾക്ക് ശേഷം അടിസ്ഥാന പലിശ നിരക്ക് ഉയർത്താൻ ഫെഡ് റിസർവ് ഐകകണ്ഠേന തീരുമാനിച്ചത് കഴിഞ്ഞ ദിവസമാണ്.
പണപ്പെരുപ്പം നിയന്ത്രിക്കാൻ മറ്റ് മാർഗ്ഗങ്ങളില്ലെന്ന നിലപാടിലായിരുന്നു ഫെഡ് ചെയർമാൻ കെവിൻ വാർഷ്. സാധാരണയായി ഇത്തരം സന്ദർഭങ്ങളിൽ സ്വർണത്തിന്റെ ആവശ്യകത കുറയുകയും വില കുത്തനെ ഇടിയുകയും ചെയ്യുകയാണ് പതിവ്.
പലിശ വരുമാനം ലഭിക്കാത്ത സ്വർണ നിക്ഷേപങ്ങൾ പിൻവലിച്ച് ഉയർന്ന പലിശ നൽകുന്ന യുഎസ് കടപത്രങ്ങളിലേക്ക് നിക്ഷേപം മാറ്റുന്നതാണ് ഇതിന് കാരണം. എന്നാൽ ഇത്തവണ സ്വർണവിപണിയിൽ വലിയ തിരിച്ചടിയുണ്ടായില്ല.
കഴിഞ്ഞ ദിവസങ്ങളിൽ യുഎസ് പണപ്പെരുപ്പ കണക്കുകൾ പുറത്തുവന്നപ്പോൾ തന്നെ വിലയിൽ ഇടിവ് രേഖപ്പെടുത്തിയിരുന്നു. പലിശ നിരക്ക് ഉയരുമെന്ന് വിപണി നേരത്തെ തന്നെ പ്രതീക്ഷിച്ചിരുന്നതിനാൽ, കഴിഞ്ഞ ദിവസങ്ങളിലെ സ്വർണവ്യാപാരങ്ങളെല്ലാം ഇതിന്റെ അടിസ്ഥാനത്തിലാണ് നടന്നിരുന്നത്.
ഇതിനുപുറമെ, ക്രൂഡോയിൽ വില ബാരലിന് 105 ഡോളറിലേക്ക് താഴ്ന്നതും സ്വർണവില കുത്തനെ ഇടിയാതിരിക്കാൻ കാരണമായി. ക്രൂഡോയിൽ വില കുറഞ്ഞത് പണപ്പെരുപ്പ ഭീഷണിയും ഫെഡ് റിസർവ് കൂടുതൽ പലിശ വർധനയിലേക്ക് കടക്കാനുള്ള സാധ്യതയും ഗണ്യമായി കുറച്ചിട്ടുണ്ട്.
ഈ വർഷം ഒരു തവണ കൂടി പലിശ നിരക്ക് ഉയർത്തിയേക്കാമെങ്കിലും 2027ൽ നിരക്ക് മാറ്റമില്ലാതെ തുടരുമെന്നാണ് നിക്ഷേപകരുടെ വിലയിരുത്തൽ. ചില സാമ്പത്തിക വിദഗ്ധർ പലിശ നിരക്ക് കുറയാനുള്ള സാധ്യതയും പ്രവചിക്കുന്നുണ്ട്.
ചൈന ഉൾപ്പെടെയുള്ള രാജ്യങ്ങളിലെ കേന്ദ്രബാങ്കുകൾ സ്വർണം വാങ്ങുന്നത് തുടരുന്നതും ഡിമാൻഡ് ഇടിയാതിരിക്കാൻ സഹായകമായി. കഴിഞ്ഞ ദിവസം ഔൺസിന് 4265 ഡോളറെന്ന നിലയിലാണ് രാജ്യാന്തര സ്വർണവില ക്ലോസ് ചെയ്തത്.
ഇന്ന് വില 4356 ഡോളർ വരെ ഉയരുകയും 4236 ഡോളറിലേക്ക് താഴുകയും ചെയ്തു. നിലവിൽ ഒരു ശതമാനത്തോളം നഷ്ടത്തിൽ 4298 ഡോളറിലാണ് വ്യാപാരം പുരോഗമിക്കുന്നത്.
കേരളത്തിൽ വരും ദിവസങ്ങളിലും സ്വർണവില ഇടിയാൻ സാധ്യതയുണ്ടെന്നാണ് സൂചനകൾ. കേരളത്തിലെ പുതുക്കിയ നിരക്ക് പ്രകാരം ഇന്ന് ഒരു പവൻ സ്വർണാഭരണം വാങ്ങാൻ പത്തുശതമാനം പണിക്കൂലിയും നികുതിയും ഹോൾമാർക്കിങ് ചാർജുകളും ചേർത്ത് 1.27 ലക്ഷം രൂപ ആവശ്യമാണ്.
നേരത്തെ നികുതി അടക്കം 53.5 രൂപയായിരുന്നു ഹോൾമാർക്കിങ് ചാർജ് നൽകേണ്ടിയിരുന്നത്. എന്നാൽ ഇത് കഴിഞ്ഞ ദിവസം കേന്ദ്ര സർക്കാർ 75 രൂപയായി വർധിപ്പിച്ചിരുന്നു.
നികുതി ഉൾപ്പെടെ 88.5 രൂപയാണ് പുതിയ ഹോൾമാർക്കിങ് നിരക്ക്. കനം കുറഞ്ഞ സ്വർണാഭരണങ്ങൾ നിർമിക്കാൻ ഉപയോഗിക്കുന്ന 18 കാരറ്റ് സ്വർണത്തിന്റെ വില ഗ്രാമിന് 45 രൂപ കുറഞ്ഞ് 11,510 രൂപയിലെത്തി.
കൂടാതെ, 14 കാരറ്റ് സ്വർണം ഗ്രാമിന് 8965 രൂപയിലും 9 കാരറ്റ് സ്വർണം ഗ്രാമിന് 5780 രൂപയിലുമാണ് വ്യാപാരം നടക്കുന്നത്. അതേസമയം, വെള്ളി വിലയിൽ മാറ്റമില്ലാതെ തുടരുന്നു.
ഗ്രാമിന് 245 രൂപ നിരക്കിലാണ് വെള്ളിയുടെ വിൽപന.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
