ലക്നൗ ∙ വാരാണസിയിലെ ഗ്യാൻവാപി പള്ളി സമുച്ചയത്തിൽ സർവേ നടത്താൻ 2022ൽ ഉത്തരവ് പുറപ്പെടുവിച്ച ജഡ്ജി രവികുമാർ ദിവാകർ വീണ്ടും മാധ്യമശ്രദ്ധ നേടുന്നു. കുറ്റകൃത്യങ്ങളിൽ ഏർപ്പെടുന്നവർക്ക് കടുത്ത ശിക്ഷാവിധികൾ നൽകുന്നതിലൂടെയാണ് മുസാഫർനഗർ അഡിഷനൽ ജില്ലാ സെഷൻസ് ജഡ്ജിയായ ഈ ഉദ്യോഗസ്ഥൻ ഇപ്പോൾ ശ്രദ്ധേയനാകുന്നത്.
മുസാഫർനഗറിൽ പുതിയ ചുമതലയേറ്റതിനുശേഷം കഴിഞ്ഞ നാലു മാസത്തിനുള്ളിൽ 10 കേസുകളിലായി ആകെ 22 കുറ്റവാളികൾക്കാണ് ജഡ്ജി രവികുമാർ ദിവാകർ വധശിക്ഷ വിധിച്ചത്. മുൻപ് ബറേലിയിലെ കോടതിയിൽ സേവനമനുഷ്ഠിക്കവേ അദ്ദേഹം 13 പേർക്കാണ് വധശിക്ഷ വിധിച്ചിട്ടുള്ളത്.
ഇതുൾപ്പെടെ ഇതുവരെ മൊത്തം 35 പ്രതികൾക്കാണ് ജഡ്ജി രവികുമാർ ദിവാകറിന്റെ ബെഞ്ച് വധശിക്ഷ വിധിച്ചിട്ടുള്ളത്. മുസാഫർനഗറിൽ പുതിയ നിയമനം ലഭിച്ചതിനുശേഷം ഏപ്രിൽ 6-നാണ് അദ്ദേഹം തന്റെ ആദ്യ വധശിക്ഷാ വിധി പുറപ്പെടുവിച്ചത്.
ഒരു അഭിഭാഷകന്റെ കൊലപാതക കേസിൽ കുറ്റക്കാരായി കണ്ടെത്തിയ മൂന്ന് പ്രതികൾക്കാണ് അന്ന് വധശിക്ഷ വിധിച്ചത്. ഇതിന്റെ തുടർച്ചയെന്നോണം ഏപ്രിൽ 28-ന് മറ്റൊരു കൊലപാതക കേസിൽ ഒരേ കുടുംബത്തിലെ നാല് പേരെയും അദ്ദേഹം വധശിക്ഷയ്ക്ക് വിധേയമാക്കി.
ഈ കേസിൽ ഒരു സ്ത്രീയും അവരുടെ മൂന്ന് ആൺമക്കളുമാണ് കുറ്റക്കാരായി കണ്ടെത്തപ്പെട്ടത്. തുടർന്നുള്ള മാസങ്ങളിലും വിവിധ ഗൗരവമേറിയ കുറ്റകൃത്യങ്ങളിൽ പ്രതികളായവർക്ക് കർശനമായ ശിക്ഷാ നടപടികളാണ് ജഡ്ജി സ്വീകരിച്ചത്.
അതേസമയം, ഇത്തരം വധശിക്ഷാ വിധികളെ അനുകൂലിച്ചും വിമർശിച്ചും വിവിധ കോണുകളിൽ നിന്ന് ചർച്ചകൾ ഉയരുന്നുണ്ട്. സെഷൻസ് കോടതി പുറപ്പെടുവിക്കുന്ന എതൊരു വധശിക്ഷയും നടപ്പിലാകണമെങ്കിൽ ബന്ധപ്പെട്ട
ഹൈക്കോടതിയുടെ ഔദ്യോഗിക അംഗീകാരം ലഭിക്കേണ്ടതുണ്ട്. വാരണാസിയിൽ സിവിൽ ജഡ്ജിയായി സേവനം അനുഷ്ഠിക്കവേയാണ് ജഡ്ജി രവികുമാർ ദിവാകർ ആദ്യമായി ദേശീയ തലത്തിൽ വാർത്തകളിൽ ഇടം പിടിച്ചത്.
ഗ്യാൻവാപി പള്ളി സമുച്ചയത്തിൽ പരിശോധന നടത്താൻ ഉത്തരവിട്ടതായിരുന്നു ആ സംഭവത്തിന് ആധാരം.
