ബിഗ് ബോസ് മലയാളം സീസണ്‍ 8-ല്‍ ഇതുവരെ അരങ്ങേറിയതില്‍ ഏറ്റവും കൗതുകമുണര്‍ത്തുന്ന വീക്കിലി ടാസ്കുകളിലൊന്നാണ് ഇത്തവണ സമാപിച്ചത്. അധോലോക നായകന്റെ ബംഗ്ലാവും അവിടെയെത്തുന്ന മാഫിയ സംഘാംഗങ്ങളും തുടര്‍ന്നുള്ള കൊലപാതകങ്ങളും അതിന്‍റെ അന്വേഷണവുമൊക്കെയായി പ്രേക്ഷകരിലും മത്സരാര്‍ഥികളിലും ഒരുപോലെ ആകാംക്ഷ പരത്തുന്നതായിരുന്നു ഈ ടാസ്ക്.
പതിവായി കാണാറുള്ള ടാസ്കുകളില്‍ നിന്നും വ്യത്യസ്തമായി ഏറെ മനോഹരമായാണ് ഇത്തവണ ബിഗ് ബോസ് ഇത് രൂപകല്‍പ്പന ചെയ്തിരുന്നത്. ഈ ടാസ്കിന്റെ ഭാഗമായി കൊലപാതകങ്ങള്‍ നടപ്പിലാക്കാന്‍ മൃദുല വിജയ്യെയും വിക്കി തഗ്ഗിനെയുമാണ് ബിഗ് ബോസ് ചുമതലപ്പെടുത്തിയത്.
ഇവരുടെ നേതൃത്വത്തില്‍ ആകെ നാല് കൊലപാതകങ്ങളാണ് അരങ്ങേറിയത്. വേദാംഗി, താഷി, കടല്‍ കൊമ്പന്‍, ആസിഫ് എന്നിവരാണ് ഈ ടാസ്കില്‍ കൊല്ലപ്പെട്ടത്.
തങ്ങള്‍ക്ക് ലഭിച്ച രഹസ്യ ദൗത്യം ഇരുവരും ചേര്‍ന്ന് വളരെ കൃത്യമായി തന്നെ പൂര്‍ത്തിയാക്കുകയും ചെയ്തു. എന്നാല്‍ കൊലയാളികളെ കണ്ടെത്താനുള്ള അന്വേഷണോദ്യോഗസ്ഥരായ നേഹയ്ക്കോ അഞ്ജലിക്കോ മറ്റ് സഹമത്സരാര്‍ഥികള്‍ക്കോ സാധിക്കുമോ എന്നതായിരുന്നു ഈ ടാസ്കിലെ ഏറ്റവും വലിയ സസ്പെന്‍സ്.
ഇതിനായുള്ള പ്രത്യേക വേദി ജനസഭയിലായിരുന്നു ബിഗ് ബോസ് ഒരുക്കിയത്. തങ്ങള്‍ക്ക് സംശയമുള്ള വ്യക്തികള്‍ ആരൊക്കെയെന്നും അതിനുള്ള കാരണങ്ങള്‍ എന്തൊക്കെയാണെന്നും വെളിപ്പെടുത്താന്‍ മത്സരാര്‍ഥികളോട് ബിഗ് ബോസ് ആവശ്യപ്പെടുകയുണ്ടായി.
മത്സരാര്‍ഥികള്‍ ഏറ്റവുമധികം പേര് സംശയത്തിന്റെ നിഴലില്‍ നിര്‍ത്തിയ പേരുകളില്‍ ഒരെണ്ണം തികച്ചും കൃത്യമായിരുന്നു; അത് വിക്കി തഗ്ഗിന്റെ പേരായിരുന്നു. എന്നാല്‍ രണ്ടാമത്തെ കൊലയാളിയായ മൃദുല വിജയ്യുടെ പേര് ഭൂരിപക്ഷം പേരുടെയും തിരഞ്ഞെടുപ്പില്‍ എത്തിയില്ല.
ഇതേത്തുടര്‍ന്ന് ഈ ടാസ്കില്‍ വിക്കി തഗ് പരാജയപ്പെടുകയും മൃദുല വിജയ് വിജയം കരസ്ഥമാക്കുകയും ചെയ്തു. ഈ വിജയത്തിലൂടെ അടുത്ത ആഴ്ചയിലെ ലീഡര്‍ഷിപ്പ് നോമിനേഷന്‍ സ്വന്തമാക്കാന്‍ മൃദുല വിജയ്ക്ക് സാധിച്ചു.
കൂടാതെ, മത്സരാര്‍ഥികള്‍ കൃത്യമായ ഒരു ഉത്തരത്തില്‍ എത്തിയതിനാല്‍ ഈ ആഴ്ചയിലെ ലക്ഷ്വറി ബജറ്റ് പോയിന്റുകള്‍ നേടിയെടുക്കാന്‍ സാധിച്ചതായും ബിഗ് ബോസ് ഔദ്യോഗികമായി പ്രഖ്യാപിച്ചു. ഇത് ഹൗസിലെ മത്സരാര്‍ഥികള്‍ക്ക് വലിയ ആശ്വാസമാണ് നല്‍കിയത്.
മത്സരാര്‍ഥികളുടെ ബുദ്ധിവൈഭവവും അപഗ്രഥന ശേഷിയും ഭാവനയും എത്രത്തോളമുണ്ടെന്ന് അളക്കുന്നതായിരുന്നു ഈ ആഴ്ചയിലെ വീക്കിലി ടാസ്ക്. ഔദ്യോഗികമായി അന്വേഷണോദ്യോഗസ്ഥരുടെ ചുമതല ലഭിച്ചില്ലെങ്കിലും തങ്ങളുടെ മികച്ച ചിന്താശേഷികൊണ്ട് ചില മത്സരാര്‍ഥികൾ കയ്യടി നേടി.
അതില്‍ ഏറ്റവും പ്രധാനിയായിരുന്നു നോബി. അന്വേഷണോദ്യോഗസ്ഥരുടെ ചോദ്യങ്ങള്‍ക്ക് മറുപടിയായി, താന്‍ എന്തുകൊണ്ട് മൃദുലയെ സംശയിക്കുന്നു എന്ന് വളരെ വ്യക്തമായ പോയിന്റുകൾ നിരത്തി സമര്‍ത്ഥിക്കാന്‍ നോബിക്ക് സാധിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
