സമൂഹത്തോടുള്ള തുറന്ന സമീപനവും കാഴ്ച്ചപ്പാടുകളും; കർദിനാൾ മാർ ബസേലിയോസ് ക്ലീമീസ് പിന്നിടുന്നത് മെത്രാൻ പദവിയിലെ കാൽനൂറ്റാണ്ട്

ഫ്രാൻസിസ് മാർപാപ്പയും മുൻഗാമി ബനഡിക്ട് മാർപാപ്പയും തമ്മിലുള്ള ആശയഭിന്നതകളും പിന്നീട് അവർക്കിടയിൽ രൂപപ്പെട്ട അഗാധമായ സൗഹൃദവും പ്രമേയമാക്കിയ ചലച്ചിത്രമാണ് ‘ ദ് ടു പോപ്സ്.’ ദൈവത്തിനു മാറ്റമില്ലെന്നു വാദിക്കുന്ന ബനഡിക്ട് മാർപാപ്പയുടെ കഥാപാത്രത്തോട് കർദിനാളിന്റെ മറുപടി പ്രശസ്തമാണ്– ‘‘ഇല്ല, പക്ഷേ ദൈവത്തെ നമ്മളെങ്ങനെ കാണുന്നുവെന്നത് മാറിക്കൊണ്ടേയിരിക്കും.’’‌ മാറ്റാൻ ശ്രമിച്ചാൽ തകർന്നടിയുന്ന ശിലയായാണ് ബനഡിക്ട് മാർപാപ്പ സഭയെ കണ്ടതെങ്കിൽ, ലോകത്തിനൊത്തു മാറിയില്ലെങ്കിൽ സഭ ചിതറിപ്പോകുമെന്നായിരുന്നു ഫ്രാൻസിസ് മാർപാപ്പയുടെ വിശ്വാസം.

ഫ്രാൻസിസ് മാർപാപ്പയോട് ഹൃദയം കൊണ്ട് ഐക്യപ്പെട്ട വ്യക്തിയാണ് മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമീസ് കാതോലിക്കാബാവാ.

വിശ്വാസത്തിന്റെ ഒറ്റശില മാത്രമായി സഭയെ ചുരുക്കാതെ, ലോകത്തിലേക്കും മനുഷ്യനിലേക്കും തുറന്നിടേണ്ട വാതിലായാണ് അദ്ദേഹം സഭാപ്രവർത്തനങ്ങളെ കാണുന്നത്.

ചിത്രത്തിൽ രണ്ടു മാർപാപ്പമാരും 2014ലെ ജർമനി– അർജന്റീന ലോകകപ്പ് ഫുട്ബോൾ ഫൈനൽ ടെലിവിഷനിൽ വീക്ഷിക്കുന്ന ഒരു രംഗമുണ്ട്. നിഷ്പക്ഷരായിരിക്കണമെന്നും ഇരു ടീമുകൾക്കു വേണ്ടിയും പ്രാർത്ഥിക്കണമെന്നുമാണ് ജർമൻകാരനായ ബനഡിക്ട് മാർപാപ്പ അഭിപ്രായപ്പെടുന്നത്.

എന്നാൽ ഫുട്ബോളിന്റെ കാര്യത്തിൽ ദൈവത്തിന് നിഷ്പക്ഷനാകാൻ കഴിയില്ലെന്നായിരുന്നു അർജന്റീനക്കാരനായ ഫ്രാൻസിസ് മാർപാപ്പയുടെ മറുപടി. ഈ നിലപാടിലും മാർ ക്ലീമീസിന് ഫ്രാൻസിസ് മാർപാപ്പയോട് പൂർണ്ണ ഹൃദയൈക്യമുണ്ട്.

അദ്ദേഹത്തിന്റെ മുറിയിൽ ബൈബിളിനൊപ്പം പ്രാധാന്യത്തോടെ ഇന്ത്യൻ ഭരണഘടനയുമുണ്ട്. രാഷ്ട്രീയകാര്യങ്ങളിൽ ഒളിച്ചുകളിക്കുന്ന ബിഷപ്പല്ല മാർ ക്ലീമീസ്; സാമൂഹികവിഷയങ്ങളിൽ വ്യക്തമായ നിലപാടുകൾ തുറന്നുപറയാൻ അദ്ദേഹം എപ്പോഴുമുള്ള തയാറുള്ള വ്യക്തിയാണ്.

‘‘ പേപ്പൽ പതാകയ്ക്കു മുൻപേ ഞാൻ ദേശീയ പതാകയെ സല്യൂട്ട് ചെയ്യും. ഗാന്ധിജിയെ മറന്നാൽ ഇന്ത്യ നിലനിൽക്കില്ലെന്ന് എവിടെയും പറയും.

മതാധിഷ്ഠിതമായി വിഘടിക്കുകയല്ല, ഇന്ത്യയ്ക്കു വേണ്ടത്. ഒരുമിച്ചു പോകണം.’’ മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമീസ് കാതോലിക്കാബാവാ എന്ന ഔദ്യോഗിക നാമത്തിലേക്ക് എത്തുന്നതിന് മുൻപ് കുട്ടിക്കാലത്ത് അദ്ദേഹത്തിന്റെ പേര് ‘കുഞ്ഞ്’ എന്നു മാത്രമായിരുന്നു.

ഔദ്യോഗിക രേഖകളിൽ ഐസക് എന്നാണ് പേര്. 1986 ജൂൺ 11ന് ഫാ.

ഐസക് തോട്ടുങ്കലായും 2001 ഓഗസ്റ്റ് 15ന് 42–ാം വയസ്സിൽ ഐസക് മാർ ക്ലീമീസ് എന്ന പേരിൽ ബിഷപ്പുമായി. തുടർന്ന് 2006 മേയ് 15ന് ആർച്ച് ബിഷപ്പாகவும், 2007 ഫെബ്രുവരി 10ന് മലങ്കര കത്തോലിക്കാസഭയുടെ കാതോലിക്കാബാവായും മേജർ ആർച്ച് ബിഷപ്പുമായി ഉയർത്തപ്പെട്ടു.

2012 ഒക്ടോബർ 24ന് 53–ാം വയസ്സിൽ കർദിനാൾ പദവിയും അദ്ദേഹത്തെ തേടിയെത്തി. കേരളത്തിലെ ഒരു ബിഷപ്പിന് ലഭിക്കാവുന്ന ഏറ്റവും ഉയർന്ന പദവികളോടെ തന്റെ 67–ാം വയസ്സിൽ അദ്ദേഹം മെത്രാൻ പദവിയിൽ 25 വർഷം പൂർത്തിയാക്കുകയാണ്.

വരുന്ന 22നാണ് ഇതിന്റെ ആഘോഷങ്ങൾ നിശ്ചയിച്ചിരിക്കുന്നത്. തലസ്ഥാന നഗരിയിൽ മാർ ക്ലീമീസ് ഒരു വലിയ വ്യക്തിത്വമായി മാറുന്നത് പേരിനൊപ്പമുള്ള പദവികൾ കൊണ്ടോ സഭയുടെ ലക്ഷക്കണക്കിന് വരുന്ന അംഗബലം കൊണ്ടോ മാത്രമല്ല.

സമൂഹവുമായുള്ള നിരന്തരമായ ഇടപെടലുകളും വിവിധ വിഭാഗങ്ങൾക്കിടയിൽ ഒരു പാലമായി വർത്തിക്കാനുള്ള അദ്ദേഹത്തിന്റെ വൈഭവവുമാണ് അദ്ദേഹത്തെ ഏവരുടെയും സ്വീകാര്യനാക്കുന്നത്. വ്യക്തിബന്ധങ്ങളുടെ കരുത്തിൽ എല്ലാവരിലേക്കും ഹൃദയം തുറന്നിടുന്നതാണ് അദ്ദേഹത്തിന്റെ ശൈലി.

നയതന്ത്രവഴക്കമുള്ള രീതികളും സൗമ്യവും നർമ്മപൂർണ്ണവുമായ ഭാഷയും അദ്ദേഹത്തിന്റെ പ്രത്യേകതയാണ്. വാക്കുകൾ കൊണ്ട് ആരുടെയും മുന്നിൽ വാതിലടയ്ക്കാറില്ല, ആരെയും മുറിപ്പെടുത്താറുമില്ല.

നരേന്ദ്ര മോദിയായാലും വി.ഡി. സതീശൻ ആയാലും പിണറായി വിജയൻ ആയാലും ആരെയും പോയിക്കാണാനോ ഇങ്ങോട്ടു ക്ഷണിക്കാനോ അദ്ദേഹത്തിന് യാതൊരു മടിയുമില്ല.

ആർക്കും അദ്ദേഹത്തോട് ഒരുവിധത്തിലുള്ള വൈമുഖ്യവുമില്ലെന്നതാണ് യാഥാർത്ഥ്യം. മാർ ഇവാനിയോസ് കോളജിന്റെ വളപ്പിൽ ആർഎസ്എസ് പരിപാടിക്ക് സൗകര്യം നൽകിയതിനെക്കുറിച്ച് അദ്ദേഹം വ്യക്തമാക്കുന്നത് ഇതാണ്– ‘ അയിത്തമല്ല ക്രൈസ്തവരീതി.

സംഭാഷണമാണ് വേണ്ടത്, ബഹിഷ്കരണമല്ല. ഏതു വിയോജിപ്പും സമാധാനത്തോടെയും സൗഹൃദത്തോടെയും ഒന്നിച്ചിരുന്നു സംസാരിക്കാൻ പറ്റണം, ആരോടായാലും.

രാഹുൽ ഗാന്ധിയുടെ യാത്ര ഇതുവഴി വന്നപ്പോഴും ഞങ്ങൾ ആവശ്യമായ സൗകര്യങ്ങൾ ഒരുക്കിയിട്ടുണ്ട്. സഹായം നൽകുന്നു എന്നതുകൊണ്ട് അവരുടെ ആശയങ്ങൾ പൂർണ്ണമായി പങ്കുവെക്കുന്നു എന്ന് അർത്ഥമില്ല.

തർക്കങ്ങൾ പരമാവധി കുറയ്ക്കുകയും യോജിക്കാവുന്ന കാര്യങ്ങൾ കണ്ടെത്തുകയുമാണ് ഉചിതം. വാക്കു കൊണ്ടുപോലും യുദ്ധമല്ല ഇതിനുള്ള പരിഹാരം.

ജീവിതത്തിൽ സന്തോഷവാനായിരിക്കുന്നതിനെയും തമാശകൾ ഇഷ്ടപ്പെടുന്നതിനെയും കുറിച്ച് മാർ ക്ലീമീസ് പറയുന്നതിങ്ങനെ: ‘‘സങ്കടപ്പെടുന്നതിനെക്കാൾ ആഹ്ലാദിക്കാനുള്ള നിരവധി കാര്യങ്ങൾ ജീവിതത്തിലുണ്ട്. തമാശകൾ ജീവിതത്തിന്റെ ഭാരം കുറയ്ക്കാൻ സഹായിക്കും.

അനുവാദം ചോദിച്ചുറപ്പുവരുത്തി പുറത്തുവരേണ്ടതല്ല തമാശ. തോന്നിയാൽ അപ്പോൾ തന്നെ പറയണം.

ചിലപ്പോൾ ചിലർക്ക് തമാശ മനസ്സിലായെന്ന് വരില്ല, ചിലർക്ക് അത് ഇഷ്ടപ്പെടണമെന്നുമില്ല. എങ്കിലും ഭൂരിപക്ഷം പേരും അതിനെ ആസ്വദിക്കുന്നവരാണ്.

ചില നിർണായക സന്ദർഭങ്ങളെ പോലും ഒരു നല്ല തമാശയ്ക്ക് രക്ഷിച്ചെടുക്കാൻ സാധിക്കും. എനിക്ക് ദേഷ്യം വരാറില്ലെന്നല്ല, കർമ്മരംഗത്ത് ചെയ്യാനാഗ്രഹിക്കുന്നത് നടക്കാതെ വരുമ്പോൾ സ്വാഭാവികമായും ദേഷ്യം വരാറുണ്ട്.

എന്നാൽ ആരോടും ഒന്നിനോടും വൈരാഗ്യം മനസ്സിൽ സൂക്ഷിക്കാറില്ല. ആരും എനിക്ക് ശത്രുവല്ല.

മനുഷ്യരുമായുള്ള ഇടപെടലുകളിൽ കണക്കുപുസ്തകം തുറന്നുനോക്കാറില്ല. വ്യക്തിബന്ധങ്ങളാണ് എന്റെ ഏറ്റവും വലിയ കരുത്ത്, ചിലപ്പോഴത് ദൗർബല്യവുമാകാം.’’ മതവും സഭയുമില്ലാത്ത സന്തോഷത്തിന്റെ സാധ്യതകളെക്കുറിച്ച് മാർ ക്ലീമീസിന് പങ്കുവെക്കാനുള്ളത് ഇതാണ്– ‘‘ആത്മീയത എന്നത് എപ്പോഴും മതാത്മകമാകണമെന്നില്ല.

മനുഷ്യരെ ഒരുമിപ്പിക്കുന്ന എന്തു കാര്യവും സന്തോഷദായകമാണ്. സുഖവും സമാധാനവും ശരീരത്തിന്റേതു മാത്രമാവില്ല, അത് മനസ്സിന്റേതു കൂടിയാണ്.

അതിനാണ് യഥാർത്ഥത്തിൽ സഭയും മതങ്ങളും പരിശ്രമിക്കുന്നത്.’’