ഐഡിബിഐ ബാങ്ക് ഓഹരി വിൽപന: ഫെയർഫാക്സ് ഗ്രൂപ്പുമായി ധാരണയിലെത്താൻ നീക്കം

കേന്ദ്രസർക്കാരിന്റെയും ലൈഫ് ഇൻഷുറൻസ് കോർപറേഷൻ ഓഫ് ഇന്ത്യയുടെയും (എൽഐസി) ഉടമസ്ഥതയിലുള്ള ഐഡിബിഐ ബാങ്കിന്റെ ഓഹരികൾ വിറ്റഴിക്കുന്നതുമായി ബന്ധപ്പെട്ട നടപടികൾ നിർണായക ഘട്ടത്തിൽ.

കനേഡിയൻ ശതകോടീശ്വരൻ പ്രേം വാട്‌സ നയിക്കുന്ന ഫെയർഫാക്സ് ഗ്രൂപ്പിന് ബാങ്കിന്റെ നിയന്ത്രണം കൈമാറാൻ കേന്ദ്രസർക്കാർ തത്വത്തിൽ തീരുമാനിച്ചതായാണ് സൂചനകൾ. യുഎഇ ആസ്ഥാനമായ എൻബിഡി എമിറേറ്റ്സ് അടക്കമുള്ള സ്ഥാപനങ്ങൾ മത്സരരംഗത്തുണ്ടെങ്കിലും, ഫെയർഫാക്സുമായുള്ള കരാറിനാണ് മുൻഗണന നൽകുന്നത്.

ഇതുസംബന്ധിച്ച ഔദ്യോഗിക സ്ഥിരീകരണം കേന്ദ്രസർക്കാരിന്റെ ഭാഗത്തുനിന്നോ ഫെയർഫാക്സിൽ നിന്നോ ഉണ്ടായിട്ടില്ല. നിലവിൽ കേന്ദ്രസർക്കാരിന് 45.48 ശതമാനവും എൽഐസിക്ക് 50 ശതമാനത്തോളവും ഓഹരികളാണ് ഐഡിബിഐയിലുള്ളത്.

ഇതിൽ 60.72 ശതമാനം ഓഹരികളാണ് വിറ്റഴിക്കാൻ ഉദ്ദേശിക്കുന്നത്. നിലവിലെ ഓഹരി വിപണി നിരക്ക് അനുസരിച്ച് കേന്ദ്രം വിൽക്കുന്ന 30.48 ശതമാനം ഓഹരികളിൽ നിന്ന് 26,620 കോടി രൂപ ലഭിക്കുമെന്നാണ് കണക്കുകൂട്ടൽ.

എൽഐസിയുടെ 30.24 ശതമാനം ഓഹരികൾ കൂടി ചേരുമ്പോൾ മൊത്തം ഇടപാട് മൂല്യം 53,000 കോടി രൂപയായി ഉയരും. നേരത്തെ, ഓഹരിയൊന്നിന് 75 രൂപ നിരക്കിലായിരുന്നു ഫെയർഫാക്സ് ഓഫർ നൽകിയിരുന്നത്.

എന്നാൽ ഈ വില മതിയാകില്ലെന്ന് കണ്ട് സർക്കാർ നടപടികൾ മന്ദഗതിയിലാക്കിയിരുന്നു. പുതുക്കിയ ഓഫറിൽ 81 രൂപയാണ് ഫെയർഫാക്സ് വാഗ്ദാനം ചെയ്യുന്നത്.

എന്നിരുന്നാലും, എൻഎസ്ഇയിൽ കഴിഞ്ഞ വ്യാപാരദിവസം ഓഹരി വില 86.54 രൂപയായിരുന്നു. റിസർവ് ബാങ്ക്, കോംപറ്റീഷൻ കമ്മിഷൻ ഓഫ് ഇന്ത്യ തുടങ്ങിയ ഏജൻസികളുടെ അനുമതി ലഭിച്ചശേഷമേ ഓഹരി കൈമാറ്റം പൂർത്തിയാകൂ.

പ്രതിസന്ധികളും നിയമപരമായ തടസ്സങ്ങളും
തൃശൂർ ആസ്ഥാനമായി പ്രവർത്തിക്കുന്ന സിഎസ്ബി ബാങ്കിന്റെ പ്രധാന നിക്ഷേപകരാണ് ഫെയർഫാക്സ്. റിസർവ് ബാങ്കിന്റെ ബാങ്കിങ് നിയന്ത്രണങ്ങൾ പ്രകാരം ഒരേ വ്യക്തിക്കോ സ്ഥാപനത്തിനോ ഒരേസമയം രണ്ട് ബാങ്കുകളിൽ പ്രൊമോട്ടർ പദവി വഹിക്കാൻ കഴിയില്ല.

അതിനാൽ, ഐഡിബിഐ ഏറ്റെടുത്താൽ ഫെയർഫാക്സിന് സിഎസ്ബി ബാങ്കിലെ ഓഹരികൾ വിറ്റൊഴിയേണ്ടി വരും. ബാങ്ക് ഏറ്റെടുക്കൽ ചരിത്രം
സാമ്പത്തിക പ്രതിസന്ധിയിലായ ഐഡിബിഐ ബാങ്കിനെ 2019-ൽ എൽഐസിയും കേന്ദ്രസർക്കാരും ചേർന്ന് 21,264 കോടി രൂപ മുടക്കിയാണ് രക്ഷപ്പെടുത്തിയത്.

തുടർന്ന് 2021-ലാണ് ഓഹരി വിറ്റഴിക്കാൻ തീരുമാനിച്ചത്. 2026 ജൂലൈയിൽ ലഭിച്ച പുതുക്കിയ ബിഡ് വഴി ഏകദേശം 570 കോടി ഡോളറിന്റെ നിക്ഷേപമാണ് ഇന്ത്യൻ ബാങ്കിങ് മേഖലയിൽ പ്രതീക്ഷിക്കുന്നത്.

പൊതുമേഖലാ വിറ്റഴിക്കൽ ലക്ഷ്യങ്ങൾ
2026-27 സാമ്പത്തിക വർഷത്തിൽ 80,000 കോടി രൂപയാണ് പൊതുമേഖലാ സ്ഥാപനങ്ങളുടെ ഓഹരി വിൽപനയിലൂടെ സർക്കാർ ലക്ഷ്യമിടുന്നത്. നിലവിൽ വിപണിയിൽ ഐഡിബിഐ ബാങ്ക് ഓഹരികൾ 2.61 ശതമാനം നേട്ടത്തോടെ 88.80 രൂപയിലാണ് വ്യാപാരം തുടരുന്നത്.

സിഎസ്ബി ബാങ്കിന്റെ ഓഹരി വില 4.59 ശതമാനം ഉയർന്ന് 372.60 രൂപയിലെത്തി. Disclaimer: ഈ ലേഖനം ഓഹരി, കടപ്പത്രം, മ്യൂച്വൽ ഫണ്ട്, ക്രിപ്റ്റോകറൻസി, ഐപിഒ, സ്വർണം മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല.

നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് സ്വയം പഠനങ്ങൾ നടത്തുകയോ വിദഗ്ധന്റെ ഉപദേശം തേടുകയോ ചെയ്യുക.