ആൻഡമാൻ നിക്കോബാർ യാത്ര പ്ലാൻ ചെയ്യുന്നുണ്ടോ? ജൂൺ-ജൂലൈ മാസങ്ങളിലെ യാത്ര അറിഞ്ഞിരിക്കേണ്ട കാര്യങ്ങൾ

ആൻഡമാൻ നിക്കോബാർ ദ്വീപുകളിലേക്ക് വിനോദസഞ്ചാരം ആഗ്രഹിക്കുന്നവർക്ക് ഈ വർഷത്തെ യാത്രയ്ക്കു മുൻപായി കാലാവസ്ഥാപരമായ ചില നിർണ്ണായക വിവരങ്ങൾ അറിഞ്ഞിരിക്കേണ്ടതുണ്ട്. നീലക്കടലും വെള്ളമണൽ വിരിച്ച തീരങ്ങളും വാട്ടർ സ്പോർട്സ് ഇനങ്ങളും കൊണ്ട് സമ്പന്നമാണ് ആൻഡമാൻ എങ്കിലും, വർഷത്തിലെ എല്ലാ മാസങ്ങളിലും ഒരേപോലെയുള്ള യാത്രാനുഭവം ലഭിക്കില്ല എന്നതാണ് വസ്തുത.

പ്രത്യേകിച്ചും ജൂൺ, ജൂലൈ മാസങ്ങളിൽ മൺസൂൺ കാലം ആരംഭിക്കുന്നതിനാൽ യാത്രാ പദ്ധതികളിൽ മാറ്റങ്ങൾ വരുത്തേണ്ടി വരാം. യാത്രയ്ക്കായി ഏറ്റവും അനുയോജ്യമായ സമയം ഒക്ടോബർ മുതൽ മെയ് വരെയുള്ള മാസങ്ങളാണ്.

തെളിഞ്ഞ കാലാവസ്ഥയും ശാന്തമായ കടലും അനുഭവപ്പെടുന്നതിനാൽ സ്കൂബ ഡൈവിംഗ്, സ്നോർക്കെലിംഗ് തുടങ്ങിയ വിനോദങ്ങളിൽ ഏർപ്പെടാൻ ഈ കാലയളവ് ഏറെ അനുയോജ്യമാണ്. എന്നാൽ ജൂൺ, ജൂലൈ മാസങ്ങളിൽ ആൻഡമാനിൽ മൺസൂൺ ശക്തിപ്രാപിക്കുന്നതിനാൽ സ്ഥിതി വ്യത്യസ്തമാണ്.

ഈ സമയത്ത് ചെറിയ മഴ മുതൽ ശക്തമായ മഴ വരെ ലഭിക്കാൻ സാധ്യതയുണ്ട്. തിരമാലകൾ ശക്തമാകുന്നതും കടൽ പ്രക്ഷുബ്ധമാകുന്നതും സ്വാഭാവികമാണ്.

പ്രധാനമായും സ്കൂബ ഡൈവിംഗ്, സീ-വാക്ക്, സ്നോർക്കെലിംഗ് തുടങ്ങിയ വിനോദങ്ങളെയാണ് മോശം കാലാവസ്ഥ പ്രതികൂലമായി ബാധിക്കുക. സുരക്ഷാ കാരണങ്ങളാൽ ഇത്തരം വിനോദങ്ങൾ താൽക്കാലികമായി നിർത്തിവെക്കാറുണ്ട്.

അതിനാൽ, സാഹസിക വിനോദങ്ങളിൽ താല്പര്യമുള്ളവർ യാത്രയ്ക്ക് മുൻപ് കാലാവസ്ഥാ പ്രവചനം കൃത്യമായി പരിശോധിക്കേണ്ടതാണ്. അതേസമയം, ചില ഗുണങ്ങളും ഈ സീസണിലുണ്ട്.

ഓഫ്-സീസൺ ആയതിനാൽ ഹോട്ടലുകളിലും ഫ്ലൈറ്റ് ടിക്കറ്റുകളിലും കുറഞ്ഞ നിരക്കുകൾ ലഭ്യമാകും. ബജറ്റ് യാത്രക്കാർക്കും ദമ്പതികൾക്കും ഇത് സാമ്പത്തിക ലാഭം നൽകുന്നു.

എന്നാൽ, ദ്വീപുകൾ തമ്മിലുള്ള യാത്രാമാർഗ്ഗമായ ഫെറി സർവീസുകളെ മഴയും കാറ്റും ബാധിക്കാൻ സാധ്യതയുള്ളതിനാൽ, യാത്രയ്ക്കിടയിൽ അധിക സമയം കയ്യിൽ കരുതുന്നത് ഉചിതമായിരിക്കും. യാത്രയിൽ കരുതേണ്ടവ:
മഴക്കാല യാത്ര ആയതിനാൽ റെയിൻകോട്ട്, വാട്ടർപ്രൂഫ് ബാഗുകൾ, പെട്ടെന്ന് ഉണങ്ങുന്ന വസ്ത്രങ്ങൾ, അധികമായി ഒരു ജോഡി ചെരിപ്പ് എന്നിവ കയ്യിൽ കരുതണം.

കൊതുകിനെ അകറ്റാനുള്ള ലേപനങ്ങളും സൺസ്ക്രീനും യാത്രയിൽ ഉപകരിക്കും. തിരക്കുകളിൽ നിന്ന് മാറി പ്രകൃതിയുടെ ശാന്തത ആസ്വദിക്കാൻ ആഗ്രഹിക്കുന്നവർക്ക് ജൂൺ-ജൂലൈ മാസങ്ങൾ മികച്ചതാണ്.

എന്നാൽ വാട്ടർ സ്പോർട്സുകൾക്കും തെളിഞ്ഞ കാലാവസ്ഥയ്ക്കുമാണ് മുൻഗണനയെങ്കിൽ ഒക്ടോബർ മുതൽ മാർച്ച് വരെയുള്ള സമയമാണ് ഏറ്റവും ഉചിതം.