രാജസ്ഥാൻ ഭിൽവാരയിലെ സർക്കാർ ആശുപത്രിയിൽ അഞ്ച് പ്രസവമരണങ്ങൾ; അനാസ്ഥ ആരോപണവുമായി ബന്ധുക്കൾ

രാജസ്ഥാനിലെ ഭിൽവാരയിലുള്ള മഹാത്മാഗാന്ധി സർക്കാർ ആശുപത്രിയിൽ കഴിഞ്ഞ ആറ് ദിവസത്തിനിടെയുണ്ടായ അഞ്ച് പ്രസവമരണങ്ങൾ വലിയ വിവാദങ്ങൾക്ക് വഴിയൊരുക്കുന്നു. മാതൃ-ശിശു ആരോഗ്യ വിഭാഗത്തിൽ ചികിത്സയിലിരിക്കെയാണ് ഇത്രയധികം മരണങ്ങൾ സംഭവിച്ചത്.

ആശുപത്രി അധികൃതരുടെ ഭാഗത്തുനിന്നുണ്ടായ ഗുരുതരമായ മെഡിക്കൽ അനാസ്ഥയാണ് മരണകാരണമെന്നാണ് ബന്ധുക്കളുടെയും നാട്ടുകാരുടെയും ആരോപണം. ഓപ്പറേഷൻ തിയേറ്ററിൽ നിന്നുള്ള കൾച്ചർ പരിശോധനാ റിപ്പോർട്ടിൽ അപകടകരമായ ബാക്ടീരിയൽ അണുബാധയുടെ സാന്നിധ്യം കണ്ടെത്തിയതായി വിവരങ്ങൾ പുറത്തുവന്നിട്ടുണ്ട്.

എന്നാൽ ഈ ആരോപണങ്ങൾ ജില്ലാ കളക്ടർ ജാസ്മീത് സിംഗ് സന്ധുവും ആശുപത്രി അധികൃതരും നിഷേധിച്ചു. മരണപ്പെട്ട

ഓരോ സ്ത്രീക്കും വ്യത്യസ്തമായ ആരോഗ്യപ്രശ്നങ്ങളും സങ്കീർണ്ണതകളും ഉണ്ടായിരുന്നുവെന്നും അണുബാധയല്ല മരണത്തിന് കാരണമായതെന്നുമാണ് ഔദ്യോഗിക വിശദീകരണം. മുൻകരുതൽ നടപടിയുടെ ഭാഗമായി ഓപ്പറേഷൻ തിയേറ്റർ കഴിഞ്ഞ മൂന്ന് ദിവസമായി അടച്ചിട്ടിരിക്കുകയാണ്.

നിലവിൽ ഇവിടെ അണുവിമുക്തമാക്കൽ നടപടികൾ പുരോഗമിക്കുകയാണ്. അമിതമായ ജോലിഭാരവും ആവശ്യത്തിന് ഉപകരണങ്ങൾ ഇല്ലാത്തതുമാണ് ഈ പ്രതിസന്ധിക്ക് കാരണമെന്നാണ് വിമർശനം.

പ്രതിദിനം 30 മുതൽ 40 വരെ പ്രസവ ശസ്ത്രക്രിയകൾ നടക്കുന്ന ഈ ആശുപത്രിയിൽ ആകെ 8 സർജിക്കൽ ഇൻസ്ട്രുമെന്റ് സെറ്റുകൾ മാത്രമാണുള്ളത്. ഒരു സെറ്റ് വീണ്ടും ഉപയോഗിക്കുന്നതിന് മുൻപ് 3 മണിക്കൂറെങ്കിലും അണുവിമുക്തമാക്കേണ്ടതുണ്ട്.

എന്നാൽ തിരക്ക് കാരണം കൃത്യമായ മാനദണ്ഡങ്ങൾ പാലിക്കാതെ ഉപകരണങ്ങൾ ഉപയോഗിച്ചതാകാം അണുബാധയ്ക്ക് കാരണമെന്നാണ് കുടുംബാംഗങ്ങളുടെ ആരോപണം. കഴിഞ്ഞ മാർച്ച് മാസത്തിന് ശേഷം ഈ ആശുപത്രിയിൽ നടക്കുന്ന മാതൃമരണങ്ങളുടെ എണ്ണം ഒൻപതായി ഉയർന്നു.

ഇതിൽ അഞ്ചു മരണങ്ങളും ജൂലൈ ആദ്യ വാരത്തിലാണ് നടന്നത്. രാജസ്ഥാനിലെ മറ്റ് സർക്കാർ ആശുപത്രികളിലും സമാനമായ സംഭവങ്ങൾ മുൻപ് റിപ്പോർട്ട് ചെയ്യപ്പെട്ടിട്ടുണ്ട്.

മെയ് മാസത്തിൽ കോട്ടയിലെ ആശുപത്രിയിൽ അഞ്ച് ഗർഭിണികളും, ജൂണിൽ ബിക്കാനീറിലെ ആശുപത്രിയിൽ സിസേറിയന് ശേഷം വൃക്ക തകരാറിലായി രണ്ട് പേരും മരിച്ചിരുന്നു. ഭിൽവാരയിലെ സംഭവത്തിൽ അന്വേഷണ റിപ്പോർട്ട് പുറത്തുവന്നാൽ മാത്രമേ യഥാർത്ഥ വീഴ്ചകൾ വ്യക്തമാകൂ.