പ്രസംഗത്തിനിടെ കറന്റ് പോയി; വേദി വിട്ടിറങ്ങി മന്ത്രി സണ്ണി ജോസഫ്

കൊച്ചിയിൽ നടന്ന ഔദ്യോഗിക പരിപാടിക്കിടെ അപ്രതീക്ഷിതമായി വൈദ്യുതി നിലച്ചത് വേദിയിൽ കൗതുകകരമായ രംഗങ്ങൾക്ക് വഴിയൊരുക്കി. സംസ്ഥാനത്തെ വൈദ്യുതി പ്രതിസന്ധിയെക്കുറിച്ച് വിശദീകരിക്കുന്നതിനിടയിലാണ് സംഭവം.

കൊച്ചി കച്ചേരിപ്പടി ആശിര്‍ഭവനിൽ നടന്ന കെഎസ്ഇബി ഓഫിസേഴ്സ് ഫെഡറേഷന്റെ 18–ാമത് സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി സണ്ണി ജോസഫ്. സംസ്ഥാനത്തെ വൈദ്യുതി നിയന്ത്രണങ്ങളും പ്രതിസന്ധികളും സംബന്ധിച്ച് സംസാരിച്ചുകൊണ്ടിരിക്കവെയാണ് ഹാളിലെ വെളിച്ചം അണഞ്ഞത്.

സ്വിച്ചിട്ട പോലെ പെട്ടെന്ന് പരിഹരിക്കാൻ കഴിയുന്ന ഒന്നല്ല വൈദ്യുതി പ്രതിസന്ധിയെന്ന് അദ്ദേഹം വ്യക്തമാക്കി.

മുൻ സർക്കാരിന്റെ കാലത്തെ നടപടികളാണ് ഇപ്പോഴത്തെ പ്രതിസന്ധിക്ക് കാരണമെന്ന് മന്ത്രി കുറ്റപ്പെടുത്തി. വൈദ്യുതി വകുപ്പ് ഏറ്റെടുക്കുന്നത് ‘മുൾക്കിരീടം’ ശിരസ്സിലേറ്റുന്നത് പോലെയാണെന്ന് മുതിർന്ന കോൺഗ്രസ് നേതാവ് എ.കെ.ആന്റണി തനിക്ക് മുന്നറിയിപ്പ് നൽകിയിരുന്നുവെന്നും, എന്നാൽ അത് പുഷ്പകിരീടമാക്കാനുള്ള ശ്രമത്തിലാണ് താനെന്നും അദ്ദേഹം പറഞ്ഞു.

ഈ പ്രസംഗം പൂർത്തിയാക്കിയതിന് തൊട്ടുപിന്നാലെയാണ് വേദി ഇരുട്ടിലായത്. വേദി ഇരുട്ടിലായതിനെ തുടർന്ന് അൽപസമയം കൂടി അവിടെ തുടർന്ന മന്ത്രി, ഉദ്ഘാടനച്ചടങ്ങ് പൂർത്തിയായതായി പ്രഖ്യാപിച്ചുകൊണ്ട് പ്രസംഗം അവസാനിപ്പിച്ച് മടങ്ങുകയായിരുന്നു.

താൻ എപ്പോൾ പ്രസംഗം നിർത്തണമെന്ന് കെഎസ്ഇബിക്ക് കൃത്യമായി അറിയാമെന്നും അതാണ് അവർ വൈദ്യുതി നിർത്തിയതെന്നും പിന്നീട് അദ്ദേഹം തമാശരൂപേണ പ്രതികരിച്ചു. പകൽ സമയത്തുണ്ടായ ഈ തടസ്സം ഔദ്യോഗിക വൈദ്യുതി നിയന്ത്രണത്തിന്റെ ഭാഗമല്ലെന്നും മന്ത്രി കൂട്ടിച്ചേർത്തു.

യൂണിറ്റിന് 4.29 രൂപ നിരക്കിൽ 465 മെഗാവാട്ട് വൈദ്യുതി 25 വർഷത്തേക്ക് ലഭ്യമാക്കുന്ന തരത്തിൽ യുഡിഎഫ് സർക്കാർ ഏർപ്പെട്ട ദീർഘകാല കരാർ മുൻ എൽഡിഎഫ് സർക്കാരിന്റെ കാലത്ത് റദ്ദാക്കിയതാണ് നിലവിലെ പ്രതിസന്ധിയുടെ പ്രധാന കാരണമെന്ന് അദ്ദേഹം വിശദീകരിച്ചു.

ഈ കരാർ റദ്ദാക്കിയതിനെത്തുടർന്ന് വിതരണ കമ്പനികൾ മറ്റു സംസ്ഥാനങ്ങൾക്ക് കൂടിയ വിലയ്ക്ക് വൈദ്യുതി നൽകാൻ തുടങ്ങി. 4.29 രൂപയ്ക്ക് ലഭിക്കേണ്ടിയിരുന്ന വൈദ്യുതി ഇപ്പോൾ 10 കൊടുത്താലും കിട്ടാത്ത അവസ്ഥയാണ്.

കരാർ പുനഃസ്ഥാപിക്കുന്നതിനായി സുപ്രീം കോടതിയിൽ ശക്തമായി കേസ് നടത്തിവരികയാണെന്നും സണ്ണി ജോസഫ് വ്യക്തമാക്കി.