അമേരിക്കൻ പ്രസിഡന്റ് ഡോണൾഡ് ട്രംപിന്റെ ഉടമസ്ഥതയിലുള്ള സോഷ്യൽ മീഡിയ കമ്പനിയായ ‘ട്രംപ് മീഡിയ ആന്ഡ് ടെക്നോളജി ഗ്രൂപ്പ്’ കനത്ത സാമ്പത്തിക പ്രതിസന്ധിയിലേക്ക്. കമ്പനിയുടെ ഏറ്റവും പുതിയ രണ്ടാം പാദ സാമ്പത്തിക ഫലങ്ങൾ പുറത്തുവന്നപ്പോൾ മൊത്തം നഷ്ടം 238 ദശലക്ഷം ഡോളറായി (ഏകദേശം 2,284.8 കോടി രൂപ) വർധിച്ചതായി കണക്കുകൾ വ്യക്തമാക്കുന്നു.
കമ്പനിയുടെ കൈവശമുള്ള ക്രിപ്റ്റോ കറൻസി ആസ്തികളുടെ മൂല്യത്തിലുണ്ടായ വൻ ഇടിവാണ് ഈ വലിയ തിരിച്ചടിക്ക് കാരണമായി ചൂണ്ടിക്കാണിക്കപ്പെടുന്നത്. ട്രൂത്ത് സോഷ്യലിന്റെ മാതൃ കമ്പനിക്ക് കഴിഞ്ഞ വർഷം സമാന കാലയളവിൽ 20 ദശലക്ഷം ഡോളറിന്റെ (ഏകദേശം 192 കോടി രൂപ) നഷ്ടം മാത്രമാണുണ്ടായിരുന്നത്.
ഡിജിറ്റൽ ആസ്തികൾ ശേഖരിക്കുക, റിന്യൂവബിൾ എനർജി കമ്പനിയെ ഏറ്റെടുക്കുക തുടങ്ങിയ വിവിധ പുതിയ ബിസിനസ് പരീക്ഷണങ്ങൾ നടത്തിയിട്ടും സ്ഥാപനത്തിന് ഇതുവരെ ലാഭത്തിലേക്ക് എത്താൻ സാധിച്ചിട്ടില്ല. ഈ പ്രതിസന്ധികൾക്കിടയിലാണ് സാമ്പത്തിക വിപണിയെ സ്വാധീനിക്കാൻ ശേഷിയുള്ള ട്രംപിന്റെ പോസ്റ്റുകൾ മറ്റുള്ളവരേക്കാൾ വേഗത്തിൽ ലഭ്യമാക്കുന്ന പുതിയ ‘വിഐപി’ സേവനവുമായി കമ്പനി മുന്നോട്ട് വന്നത്.
‘ട്രൂത്ത് എപിഐ’ എന്ന് നാമകരണം ചെയ്തിട്ടുള്ള ഈ പ്രത്യേക സേവനത്തിന് പ്രതിമാസം 60,000 ഡോളർ മുതൽ 1,00,000 ഡോളർ വരെയാണ് (ഏകദേശം 57.6 ലക്ഷം രൂപ മുതൽ 96 ലക്ഷം രൂപ വരെ) ഈടാക്കുന്നത്. എന്നാൽ രാഷ്ട്രീയ തലത്തിലും ബിസിനസ് രംഗത്തും ഈ നീക്കം വലിയ വിമർശനങ്ങൾക്ക് വഴിവെച്ചിട്ടുണ്ട്.
ഡെമോക്രാറ്റുകളിൽ നിന്നും വാൾസ്ട്രീറ്റിലെ പ്രമുഖരിൽ നിന്നുമാണ് ശക്തമായ എതിർപ്പുകൾ ഉയർന്നിരിക്കുന്നത്. മൈക്രോ സെക്കൻഡുകളുടെ വ്യത്യാസത്തിൽ വിവരങ്ങൾ ശേഖരിച്ച് വ്യാപാരം നടത്തുന്ന പത്തിലേറെ ‘ഹൈ- ഫ്രീക്വൻസി ട്രേഡിംഗ്’ കമ്പനികൾ ഇതിനോടകം ഈ സേവനം സ്വന്തമാക്കിക്കഴിഞ്ഞതായി ഇടക്കാല സിഇഒ കെവിൻ മക്ഗേൺ അറിയിച്ചു.
വ്യക്തിഗത ഓഹരി നിക്ഷേപകർ, പ്രമുഖ വാർത്താ ഏജൻസികൾ, ആർട്ടിഫിഷ്യൽ ഇന്റലിജൻസ് വികസിപ്പിക്കുന്ന സ്ഥാപനങ്ങൾ എന്നിവരിലേക്കും ഈ സേവനം വ്യാപിപ്പിക്കാനാണ് ഫ്ലോറിഡയിലെ സരസോട്ട ആസ്ഥാനമായി പ്രവർത്തിക്കുന്ന കമ്പനി നിലവിൽ ലക്ഷ്യമിടുന്നത്.
ഭാവിയിൽ ഇതൊരു പ്രധാന വരുമാന സ്രോതസായി മാറുമെന്നാണ് അധികൃതരുടെ പ്രതീക്ഷ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
