തൊടുപുഴയിൽ ഇറച്ചിക്കോഴി വില കുതിച്ചുയരുന്നു: പ്രതിസന്ധിയിൽ ഹോട്ടൽ മേഖലയും ഉപഭോക്താക്കളും

ഇടുക്കി ജില്ലയിലെ വിപണിയിൽ ഇറച്ചിക്കോഴി വിലയിൽ വൻ വർധന. കഴിഞ്ഞ ദിവസം കിലോഗ്രാമിന് 183 മുതൽ 190 രൂപ വരെയായിരുന്നു ഇറച്ചിക്കോഴിയുടെ വിപണി വില.

ഒറ്റ ദിവസം കൊണ്ട് മാത്രം 5 മുതൽ 8 രൂപ വരെയാണ് വിലയിൽ വർധന രേഖപ്പെടുത്തിയത്. സാധാരണ ഗതിയിൽ ജൂൺ, ജൂലൈ മാസങ്ങളിൽ വിപണിയിൽ കോഴിവില കുറയാറാണ് പതിവ്.

എന്നാൽ ഇത്തവണ വിപരീത സാഹചര്യം ഉണ്ടായതിന് പിന്നിൽ ഉൽപാദനത്തിലെ കുറവും കോഴിത്തീറ്റയുടെ വിലയിലുണ്ടായ വർധനയുമാണെന്നാണ് വ്യാപാരികൾ ചൂണ്ടിക്കാട്ടുന്നത്. വരും ദിവസങ്ങളിലും വില ഇനിയും ഉയരാനാണ് സാധ്യതയെന്ന് ഇവർ മുന്നറിയിപ്പ് നൽകുന്നു.

ഈ വിലവർധന വിപണിയിൽ വലിയ പ്രത്യാഘാതങ്ങൾ ഉണ്ടാക്കിയിട്ടുണ്ട്. പലയിടത്തും ഇറച്ചിക്കോഴിയുടെ കച്ചവടത്തിൽ ഗണ്യമായ കുറവുണ്ടായി.

ഹോട്ടൽ മേഖലയ്ക്കും ഈ പ്രതിസന്ധി കനത്ത തിരിച്ചടിയാണ് നൽകിയിരിക്കുന്നത്. നിലവിലെ സാഹചര്യത്തിൽ ചിക്കൻ വിഭവങ്ങളുടെ വില വർധിപ്പിക്കേണ്ടി വരുമെന്ന് ഹോട്ടലുടമകൾ വ്യക്തമാക്കി.

നിലവിൽ ബീഫ്, പോർക്ക്, മത്സ്യം തുടങ്ങി മറ്റ് നോൺ-വെജ് വിഭവങ്ങൾക്കും ഉയർന്ന വില നൽകേണ്ടി വരുന്ന സ്ഥിതിയാണ് ഉപഭോക്താക്കൾ നേരിടുന്നത്. വിപണിയിലെ ഈ അനിയന്ത്രിതമായ വിലക്കയറ്റം പിടിച്ചുനിർത്താൻ സർക്കാർ തലത്തിൽ അടിയന്തര ഇടപെടൽ വേണമെന്ന ആവശ്യം ശക്തമായി ഉയരുകയാണ്.