രക്തത്തിലെ പഞ്ചസാരയുടെ അളവ് ക്രമമായി നിലനിർത്താം; ഒഴിവാക്കേണ്ട പ്രധാന ശീലങ്ങൾ

പ്രമേഹ ബാധിതർക്ക് മാത്രമല്ല, പൊതുവായ ആരോഗ്യ സംരക്ഷണത്തിനും രക്തത്തിലെ പഞ്ചസാരയുടെ അളവ് കൃത്യതയോടെ മുൻപോട്ടു കൊണ്ടുപോകേണ്ടത് അത്യന്താപേക്ഷിതമാണ്. ആരോഗ്യകരമായ ഈ അവസ്ഥയുമായി ബന്ധപ്പെട്ട

സങ്കീർണ്ണതകൾ തടയാനും മാനസിക ഏകാഗ്രത വർദ്ധിപ്പിക്കാനും ഇത് കാരണമാകുന്നു. ദിവസം മുഴുവൻ ഊർജ്ജസ്വലത നിലനിർത്താനും, ക്ഷീണം അകറ്റാനും, ജീവിതനിലവാരം ഉയർത്താനും ഇത് ഏറെ സഹായകരമാണ്.

എന്നാൽ, ദിനചര്യയിലെ ചില അശ്രദ്ധകൾ ബ്ലഡ് ഷുഗർ അളവ് അനിയന്ത്രിതമായി ഉയരുന്നതിന് ഇടയാക്കാറുണ്ട്. സോഡ, ചോക്ലേറ്റ് മിൽക്ക്, പഴച്ചാറുകൾ എന്നിവ പതിവായി ശീലമാക്കുന്നത് രക്തത്തിലെ പഞ്ചസാര പെട്ടെന്ന് ഉയരുന്നതിന് കാരണമാകും.

ഇത്തരം പാനീയങ്ങളുടെ നിരന്തരമായ ഉപയോഗം ടൈപ്പ് 2 പ്രമേഹം, മെറ്റബോലിക് സിൻഡ്രോം എന്നിവയ്ക്കുള്ള സാധ്യത വർദ്ധിപ്പിക്കും. അതിനാൽ മധുരമുള്ള പാനീയങ്ങളുടെ ഉപയോഗം കുറച്ച്, പരമാവധി വെള്ളമോ മധുരമില്ലാത്ത ചായയോ കുടിക്കാൻ ശ്രദ്ധിക്കുക.

ഭക്ഷണം ഒഴിവാക്കുന്ന ശീലം ശരീരത്തിൽ ഗ്ലൂക്കോസിന്റെയും സമ്മർദ്ദ ഹോർമോണായ കോർട്ടിസോളിന്റെയും ഉത്പാദനം വർദ്ധിപ്പിക്കും. ഇത് രക്തത്തിലെ പഞ്ചസാരയുടെ അളവ് പെട്ടെന്ന് ഉയരാൻ ഇടയാക്കും.

കൃത്യസമയത്ത് പ്രഭാതഭക്ഷണം കഴിക്കുന്നത് പിന്നീട് അമിതമായി ആഹാരം കഴിക്കുന്നത് തടയാനും, ഉച്ചയ്ക്കും അത്താഴത്തിനും ശേഷമുള്ള ഗ്ലൂക്കോസ് നില നിയന്ത്രിക്കാനും സഹായിക്കും. ആവശ്യത്തിന് പ്രോട്ടീനും നാരുകളും അടങ്ങിയ ആഹാരം കഴിക്കാതിരിക്കുന്നത് ബ്ലഡ് ഷുഗർ വർദ്ധിപ്പിക്കാൻ കാരണമാകും.

ഇവ ദഹനപ്രക്രിയയുടെ വേഗത കുറയ്ക്കുകയും, ഭക്ഷണത്തിന് ശേഷമുള്ള പഞ്ചസാരയുടെ വർദ്ധനവ് തടയുകയും ചെയ്യും. ടൈപ്പ് 2 പ്രമേഹമുള്ളവരിൽ 2020-ൽ നടത്തിയ ഒരു പഠനത്തിൽ, കാർബോഹൈഡ്രേറ്റുകൾക്ക് മുൻപായി പ്രോട്ടീനും പച്ചക്കറികളും കഴിക്കുന്നത് ഭക്ഷണത്തിന് ശേഷമുള്ള രക്തത്തിലെ പഞ്ചസാരയുടെ അളവ് 40% കുറയ്ക്കുന്നതായി കണ്ടെത്തിയിട്ടുണ്ട്.

ഫാസ്റ്റ് ഫുഡുകളിൽ ശുദ്ധീകരിച്ച കാർബോഹൈഡ്രേറ്റുകളും അനാരോഗ്യകരമായ കൊഴുപ്പുകളും അമിതമായ കലോറിയുമാണ് അടങ്ങിയിരിക്കുന്നത്. ഇവ രക്തത്തിലെ പഞ്ചസാരയുടെ അളവ് പെട്ടെന്ന് ഉയർത്തും.

അതിനാൽ വീടുകളിൽ തയ്യാറാക്കുന്ന ഭക്ഷണം കഴിക്കുന്നത് പ്രമേഹവും അമിതവണ്ണവും ഉണ്ടാകാനുള്ള സാധ്യത ഗണ്യമായി കുറയ്ക്കും. ശരീരത്തിൽ ജലാംശം കുറയുന്നത് (നിർജ്ജലീകരണം) വാസോപ്രെസിൻ, കോർട്ടിസോൾ തുടങ്ങിയ ഹോർമോണുകളെ വർദ്ധിപ്പിച്ച് ഗ്ലൂക്കോസ് നിയന്ത്രണത്തെ ബാധിക്കും.

അതിനാൽ ദാഹിക്കുമ്പോൾ മാത്രമല്ല, ദിവസം മുഴുവൻ ഇടയ്ക്കിടെ വെള്ളം കുടിക്കുന്നത് പ്രമേഹ സാധ്യത ഒഴിവാക്കാൻ സഹായിക്കും. വ്യായാമമില്ലായ്മയും ഗുരുതരമായ ആരോഗ്യപ്രശ്നങ്ങൾക്ക് കാരണമാകും.

അത്താഴത്തിന് ശേഷം വെറും 10 മിനിറ്റ് നടക്കുന്നത് പോലെയുള്ള ചെറിയ ശാരീരിക പ്രവർത്തനങ്ങൾ പോലും പഞ്ചസാരയുടെ അളവ് നിയന്ത്രിക്കാൻ മികച്ചതാണ്. മാനസിക സമ്മർദ്ദം ഉണ്ടാകുമ്പോൾ അഡ്രിനാലിൻ, കോർട്ടിസോൾ ഹോർമോണുകൾ പുറത്തുവരികയും അത് ബ്ലഡ് ഷുഗർ കൂട്ടുകയും ചെയ്യും.

ഇത്തരം സാഹചര്യങ്ങളിൽ നടത്തം, ധ്യാനം തുടങ്ങിയവയിലൂടെ സമ്മർദ്ദം ലഘൂകരിക്കുക. രാവിലെ കുടിക്കുന്ന ലാറ്റെ അല്ലെങ്കിൽ എനർജി ഡ്രിങ്കുകൾ ഉന്മേഷം നൽകുമെങ്കിലും, അവയിലെ പഞ്ചസാരയുടെ അളവ് രക്തത്തിലെ ഗ്ലൂക്കോസ് നില ദോഷകരമായി ബാധിക്കും.

മതിയായ ഉറക്കം ലഭിക്കാത്തതും രക്തത്തിലെ പഞ്ചസാരയുടെ അളവിനെ പ്രതികൂലമായി ബാധിക്കാം. ഇത് വിശപ്പും മധുരത്തോടുള്ള ആഗ്രഹവും വർദ്ധിപ്പിക്കും.

അതിനാൽ ദിവസവും കുറഞ്ഞത് ഏഴ് മണിക്കൂറെങ്കിലും ഉറങ്ങാൻ ശ്രദ്ധിക്കുക.