ലോക കാഴ്ചാ ദിനം: കണ്ണിന്റെ ആരോഗ്യം സംരക്ഷിക്കാൻ ശ്രദ്ധിക്കേണ്ട പ്രധാന കാര്യങ്ങൾ

എല്ലാ വർഷവും ഒക്ടോബർ മാസത്തിലെ രണ്ടാമത്തെ വ്യാഴാഴ്ചയാണ് ‘ലോക കാഴ്ചാ ദിനം’ (World Sight Day) ആചരിക്കുന്നത്. ലയൺസ് ക്ലബ് ഇന്റർനാഷണൽ ഫൗണ്ടേഷന്റെ ‘സൈറ്റ് ഫസ്റ്റ് ക്യാമ്പെയ്‌ൻ’ ആണ് 2000-ൽ ഈ ദിനം ആചരിക്കാൻ തുടക്കമിട്ടത്.

കൃത്യമായ ആരോഗ്യപരിപാലനത്തോടൊപ്പം ചില ശീലങ്ങൾ കൂടി പിന്തുടരുന്നത് കാഴ്ചശക്തി സംരക്ഷിക്കാനും ആരോഗ്യകരമായ വാർദ്ധക്യം ഉറപ്പാക്കാനും സഹായിക്കും. കണ്ണുകളുടെ ആരോഗ്യം നിലനിർത്തുന്നതിനുള്ള പ്രധാന മാർഗ്ഗങ്ങൾ താഴെ പറയുന്നവയാണ്.

ഒന്നാമതായി, കൃത്യമായ ഇടവേളകളിൽ നേത്രപരിശോധന നടത്തേണ്ടതുണ്ട്. പ്രായമാകുമ്പോൾ കാഴ്ചശക്തി സംരക്ഷിക്കുന്നതിനുള്ള ഏറ്റവും ലളിതമായ മാർഗ്ഗങ്ങളിലൊന്ന്, സമഗ്രമായ നേത്രപരിശോധനകളെ പ്രതിരോധ ആരോഗ്യപരിപാലനത്തിന്റെ ഭാഗമാക്കുക എന്നതാണ്.

ഗ്ലോക്കോമ, തിമിരം, പ്രായം മൂലമുണ്ടാകുന്ന മാക്യുലാർ ഡീജനറേഷൻ, പ്രമേഹം മൂലമുള്ള നേത്രരോഗങ്ങൾ തുടങ്ങിയവ ക്രമേണ വികസിച്ചുവരുന്നവയാണ്. പലപ്പോഴും ഇവയുടെ പ്രാരംഭഘട്ടത്തിൽ കാര്യമായ ലക്ഷണങ്ങൾ പ്രകടമാകണമെന്നില്ല.

രണ്ടാമത്തെ കാര്യം, കമ്പ്യൂട്ടർ, മൊബൈൽ ഫോൺ എന്നിവ ഉപയോഗിക്കുമ്പോൾ ഓരോ 20 മിനിറ്റിലും 20 സെക്കൻഡ് നേരം സ്ക്രീനിൽ നിന്ന് മാറി 20 അടി അകലെയുള്ള ഏതെങ്കിലും വസ്തുവിലേക്ക് നോക്കുക എന്നുള്ളതാണ്. മൂന്നാമതായി, പുകവലി ശ്വാസകോശത്തിന് മാത്രമല്ല ദോഷകരമാകുന്നത്.

തിമിരം, പ്രായവുമായി ബന്ധപ്പെട്ട മാക്യുലാർ ഡീജനറേഷൻ (age-related macular degeneration) തുടങ്ങിയ പല നേത്രരോഗങ്ങളുടെയും സാധ്യത വർദ്ധിപ്പിക്കാനും ഒപ്റ്റിക് നാഡിയെ തകരാറിലാക്കാനും ഇതിന് കഴിയും.

അതുകൊണ്ട്, പുകയില ഉപയോഗിക്കാതിരിക്കുന്നത് ദീർഘകാലം ആരോഗ്യത്തോടെ ജീവിക്കാൻ സഹായിക്കുന്ന ഒരു ശീലം മാത്രമല്ല, മറിച്ച് ദീർഘകാലത്തേക്ക് കാഴ്ചശക്തി സംരക്ഷിക്കുന്നതിലെ ഒരു പ്രധാന ഘടകം കൂടിയാണ്. നിങ്ങൾ പുകവലിക്കുന്നയാളാണെങ്കിൽ, അത് ഉപേക്ഷിക്കുന്നത് നിങ്ങളുടെ മൊത്തത്തിലുള്ള ആരോഗ്യത്തെ മെച്ചപ്പെടുത്തുന്നതിനൊപ്പം നേത്രരോഗങ്ങളുമായി ബന്ധപ്പെട്ട

ചില അപകടസാധ്യതകൾ കുറയ്ക്കാനും സഹായിക്കും. നാലാമതായി, അൾട്രാവയലറ്റ് രശ്മികൾ ദീർഘകാലം ഏൽക്കുന്നത് കണ്ണുകൾക്ക് ദോഷം വരുത്തുകയും ചില നേത്രരോഗങ്ങൾക്കുള്ള സാധ്യത വർദ്ധിപ്പിക്കുകയും ചെയ്തേക്കാം.

പുറത്ത് സമയം ചെലവഴിക്കുമ്പോൾ, UVA, UVB രശ്മികളെ 99 മുതൽ 100 ശതമാനം വരെ തടയുന്ന സൺഗ്ലാസുകൾ തിരഞ്ഞെടുക്കുക. അഞ്ചാമത്, ആരോഗ്യകരമായ പോഷകാഹാര ശീലങ്ങൾ കണ്ണിന്റെ ആരോഗ്യത്തിനും ഗുണം ചെയ്യും.

ഇലക്കറികൾ, വിവിധ നിറങ്ങളിലുള്ള പഴങ്ങളും പച്ചക്കറികളും, ധാന്യങ്ങൾ, മറ്റ് പോഷകസമൃദ്ധമായ ഭക്ഷണങ്ങൾ എന്നിവ ഭക്ഷണക്രമത്തിൽ ധാരാളമായി ഉൾപ്പെടുത്തുക. കണ്ണിന്റെ ആരോഗ്യത്തെ സഹായിക്കുന്ന സമീകൃതാഹാരത്തിന്റെ ഭാഗമായി ഒമേഗ-3 ഫാറ്റി ആസിഡുകൾ അടങ്ങിയ ഭക്ഷണങ്ങളും ഉൾപ്പെടുത്താവുന്നതാണ്.

ആറാമതായി, കണ്ണുകളുടെ ആരോഗ്യത്തിന് മതിയായ ഉറക്കം അത്യന്താപേക്ഷിതമാണ്. കാരണം, കോശങ്ങളെ പുനരുജ്ജീവിപ്പിക്കാനും കണ്ണുനീർ പാളികളെ പുനഃസ്ഥാപിക്കാനും കണ്ണിലെ മർദ്ദം ക്രമീകരിക്കാനും ഇത് സഹായിക്കുന്നു.

കണ്ണുകളുടെ ആയാസം കുറയ്ക്കാനും പേശികൾക്ക് വിശ്രമം നൽകാനും ദിവസവും 7 മുതൽ 8 മണിക്കൂർ വരെ ഉറക്കം അത്യാവശ്യമാണ്. ഏഴാമത്തെ കാര്യം, കാഴ്ച മങ്ങുക, കണ്ണിൽ വിട്ടുമാറാത്ത വേദന, പെട്ടെന്ന് കാഴ്ച നഷ്ടപ്പെടുക എന്നിവയെ വാർദ്ധക്യസഹജമായ സാധാരണ ലക്ഷണങ്ങളായി അവഗണിക്കരുത്.

ഈ ലക്ഷണങ്ങൾ കണ്ടാൽ ഉടനെ ഡോക്ടറെ സമീപിക്കേണ്ടതാണ്.