നിർമിതബുദ്ധി നിക്ഷേപങ്ങൾക്കിടയിൽ ചെലവ് ചുരുക്കാൻ ഗൂഗിൾ; ജീവനക്കാർക്ക് സ്വമേധയാ പിരിഞ്ഞുപോകാൻ അവസരം

നിർമിതബുദ്ധി (എഐ) മേഖലയിലെ നിക്ഷേപങ്ങൾ വൻതോതിൽ വർധിപ്പിക്കുന്നതിനിടയിൽ, പ്രവർത്തനച്ചെലവുകൾ നിയന്ത്രിക്കുന്നതിന്റെ ഭാഗമായി സുപ്രധാന തീരുമാനവുമായി ഗൂഗിൾ. ഇതിന്റെ തുടർച്ചയായി അഞ്ച് രാജ്യങ്ങളിലെ ജീവനക്കാർക്കാണ് സ്വമേധയാ ജോലിയിൽ നിന്ന് വിരമിക്കാനുള്ള പുതിയ ഓഫർ കമ്പനി നൽകിയിരിക്കുന്നത്.

ഇത്തരത്തിൽ കമ്പനി വിട്ടുപോകാൻ തയ്യാറാകുന്നവർക്ക് സേവനകാലയളവ് പരിഗണിച്ച് പ്രത്യേക സാമ്പത്തിക ആനുകൂല്യങ്ങളും ലഭിക്കുമെന്ന് റോയിട്ടേഴ്സ് റിപ്പോർട്ട് ചെയ്യുന്നു. കാനഡ, ഫ്രാൻസ്, ജർമനി, ജപ്പാൻ, സ്വിറ്റ്സർലൻഡ് എന്നീ രാജ്യങ്ങളിലെ ഉദ്യോഗസ്ഥർക്കാണ് നിലവിൽ ഈ പദ്ധതി ബാധകമാക്കിയിട്ടുള്ളത്.

കഴിഞ്ഞ ജൂൺ മാസത്തോടെയാണ് ഈ പദ്ധതി കൂടുതൽ രാജ്യങ്ങളിലേക്ക് വ്യാപിപ്പിച്ചത്. എന്നാൽ, എത്ര ഉദ്യോഗസ്ഥർ ഈ പ്രത്യേക അവസരം ഇതുവരെ പ്രയോജനപ്പെടുത്തിയിട്ടുണ്ടെന്ന കൃത്യമായ കണക്കുകൾ കമ്പനി ഔദ്യോഗികമായി പുറത്തുവിട്ടിട്ടില്ല.

ഡീപ്‌മൈൻഡിനും ഗൂഗിൾ ക്ലൗഡിനും ഇളവ്
എല്ലാ വിഭാഗം ജീവനക്കാർക്കും ഒരേപോലെ ബാധകമല്ല ഈ തീരുമാനം. കമ്പനിയുടെ നിർമിതബുദ്ധി ഗവേഷണ വിഭാഗമായ ഡീപ്‌മൈൻഡിനെയും ഗൂഗിൾ ക്ലൗഡിനെയും ഈ പദ്ധതിയിൽനിന്ന് ഒഴിവാക്കിയിട്ടുണ്ട്.

ഭാവി വളർച്ചയ്ക്ക് നിർണായകമെന്ന് കരുതുന്ന ഇത്തരം മേഖലകളിൽ കൂടുതൽ നിയമനങ്ങൾ ആവശ്യമാണെന്നാണ് കമ്പനിയുടെ വിലയിരുത്തൽ. എഐ, ക്ലൗഡ് കമ്പ്യൂട്ടിങ് രംഗങ്ങളിൽ മുൻനിരയിലെത്താൻ ശ്രമിക്കുന്നതിന്റെ ഭാഗമായാണ് ചില മേഖലകളിൽ ഉദ്യോഗസ്ഥരുടെ എണ്ണം കുറയ്ക്കുമ്പോൾ തന്നെ പ്രധാന വിഭാഗങ്ങളിൽ നിയമനം വർധിപ്പിക്കുന്നത്.

മാതൃകമ്പനിയായ ആൽഫബെറ്റ് എഐ മേഖലയിലേക്ക് വലിയ തോതിലുള്ള മൂലധന നിക്ഷേപമാണ് നടത്തിക്കൊണ്ടിരിക്കുന്നത്. സ്വിറ്റ്സർലൻഡിൽ ജീവനക്കാർ പടിയിറങ്ങിതുടങ്ങി
ഈ പദ്ധതിയുടെ ഭാഗമായി സ്വിറ്റ്സർലൻഡിലെ ജീവനക്കാർക്ക് ജൂൺ മാസത്തിൽ തന്നെ ഓഫർ ലഭിച്ചിരുന്നു.

ഇത് സ്വീകരിച്ചവർ കഴിഞ്ഞ ഓഗസ്റ്റ് മാസം മുതൽ കമ്പനി വിട്ടുതുടങ്ങിയതായാണ് വിവരങ്ങൾ വ്യക്തമാക്കുന്നത്. സ്വിറ്റ്സർലൻഡിൽ ഏകദേശം 5,000 ഗൂഗിൾ ജീവനക്കാരാണ് നിലവിലുള്ളത്.

സൂറിച്ചിൽ കമ്പനിയുടെ പ്രധാന എൻജിനീയറിങ് കേന്ദ്രവും പ്രവർത്തിക്കുന്നുണ്ട്. കമ്പനിയിൽ ജോലി ചെയ്ത ഓരോ വർഷത്തിനും ഒരു മാസത്തെ ശമ്പളം എന്ന കണക്കിലാണ് സാമ്പത്തിക ആനുകൂല്യം നൽകുന്നത്.

പരമാവധി 12 മാസത്തെ ശമ്പളം വരെ ഇതിലൂടെ ലഭിക്കും. ഏകദേശം 50 ജീവനക്കാരുള്ള ഒരു ടീമിൽനിന്ന് കുറഞ്ഞത് നാല് പേരെങ്കിലും ഈ ഓഫർ സ്വീകരിച്ചതായി റിപ്പോർട്ടുകളുണ്ട്.

സമാനമായ നീക്കവുമായി മൈക്രോസോഫ്റ്റും
നിർമിതബുദ്ധി രംഗത്തെ വൻതോതിലുള്ള ചെലവുകൾ കാരണം ജീവനക്കാരുടെ എണ്ണത്തിൽ പുനഃപരിശോധന നടത്തുന്ന മറ്റൊരു പ്രമുഖ ടെക് ഭീമനാണ് മൈക്രോസോഫ്റ്റ്. അമേരിക്ക, കാനഡ, ഇന്ത്യ, ബ്രിട്ടൻ എന്നീ രാജ്യങ്ങളിലെ ഏകദേശം 60,000 ജീവനക്കാരെ ഉൾക്കൊള്ളാൻ സാധ്യതയുള്ള സ്വമേധയാ പിരിഞ്ഞുപോകൽ പദ്ധതിയാണ് ഈ കമ്പനിയും പ്രഖ്യാപിച്ചിരിക്കുന്നത്.

മൈക്രോസോഫ്റ്റിലെ 70-ാം ഗ്രേഡോ അതിൽ താഴെയോ ഉള്ള യോഗ്യരായ ജീവനക്കാർക്കാണ് ഈ ആനുകൂല്യം ലഭിക്കുക. കമ്പനിയിലെ മൊത്തം 2,23,000 ജീവനക്കാരിൽ ഏകദേശം 27 ശതമാനം പേർക്ക് ഇതിലൂടെ അവസരം ലഭിക്കും.

ഈ ഓഫർ സ്വീകരിക്കുന്നവർക്ക് വരുന്ന ഡിസംബർ അവസാനത്തോടെ കമ്പനിയിൽനിന്ന് പടിയിറങ്ങാം. എഐ പ്രവർത്തനങ്ങൾക്കായി ഡാറ്റാ സെന്ററുകളിലും കമ്പ്യൂട്ടിങ് അടിസ്ഥാനസൗകര്യങ്ങളിലും കോടിക്കണക്കിന് ഡോളറാണ് മൈക്രോസോഫ്റ്റ് മുതൽമുടക്കുന്നത്.

ഇതിന്റെ തുടർച്ചയായാണ് ഈ വിരമിക്കൽ പദ്ധതി. ഏപ്രിലിൽ സ്വമേധയാ വിരമിക്കൽ പദ്ധതി പ്രഖ്യാപിച്ച കമ്പനി, ജൂലൈയിൽ 4,800 ജീവനക്കാരെ ബാധിക്കുന്ന തൊഴിൽ വെട്ടിക്കുറയ്ക്കലും നടത്തിയിരുന്നു.

ആഗോള ടെക് മേഖലയിൽ നിർമിതബുദ്ധിക്കായുള്ള ഭീമൻ നിക്ഷേപങ്ങൾ തൊഴിൽ ഘടനയിലും ജീവനക്കാരുടെ ആവശ്യകതയിലും വലിയ മാറ്റങ്ങളാണ് സൃഷ്ടിച്ചുകൊണ്ടിരിക്കുന്നത്.