തിരുവനന്തപുരത്ത് വിവിഐപി യാത്രയ്ക്കായി സിഗ്നൽ ലൈറ്റുകൾ ഓഫ് ചെയ്യുന്നതായി പരാതി; വിശദീകരണവുമായി ട്രാഫിക് പൊലീസ്

നഗരത്തിൽ മന്ത്രിമാരുടെയും ഉന്നത ഉദ്യോഗസ്ഥരുടെയും യാത്ര സുഗമമാക്കുന്നതിനായി സിഗ്നൽ ലൈറ്റുകൾ ഓഫ് ചെയ്തു നൽകുന്നുവെന്ന ആക്ഷേപം ശക്തമാകുന്നു. ഗവർണർ, മുഖ്യമന്ത്രി തുടങ്ങിയ അതിപ്രധാന വ്യക്തികളുടെ സഞ്ചാരവേളകളിൽ മാത്രമാണ് സാധാരണയായി സിഗ്നൽ സംവിധാനങ്ങൾ ഓഫ് ചെയ്യാറുള്ളത്.

എന്നാൽ, അടിയന്തര സാഹചര്യങ്ങൾ ഇല്ലാത്ത അവസരങ്ങളിൽ പോലും മറ്റ് മന്ത്രിമാർക്കും മുതിർന്ന ഉദ്യോഗസ്ഥർക്കും വേണ്ടി പൊലീസ് സിഗ്നൽ ലൈറ്റുകൾ മനഃപൂർവം ഓഫ് ചെയ്യുകയാണെന്നാണ് പ്രധാന പരാതി. മുൻ സർക്കാരിന്റെ ഭരണകാലത്ത് ഇത്തരത്തിൽ മന്ത്രിമാരുടെയും ഉദ്യോഗസ്ഥരുടെയും യാത്രാവേളകളിൽ പൊതുജനങ്ങളുടെ വാഹനങ്ങൾ തടഞ്ഞിടുന്നതിനെതിരെ വലിയ രീതിയിലുള്ള പ്രതിഷേധങ്ങൾ ഉയർന്നു വന്നിരുന്നു.

കഴിഞ്ഞ ദിവസം സംസ്ഥാന പൊലീസ് മേധാവി വിമാനത്താവളത്തിലേക്ക് യാത്ര ചെയ്യുന്ന വേളയിൽ പാളയം മുതൽ സിഗ്നൽ ലൈറ്റുകൾ ഓഫ് ചെയ്തതായി ചൂണ്ടിക്കാണിച്ചുകൊണ്ടുള്ള ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു. ഇതിന്റെ തുടർച്ചയായാണ് നഗരത്തിലെ സിഗ്നൽ നിയന്ത്രണവുമായി ബന്ധപ്പെട്ട് കനത്ത പരാതികൾ ഉയർന്നുവന്നിട്ടുള്ളത്.

അതേസമയം, സിഗ്നൽ ലൈറ്റുകൾ പൂർണ്ണമായി ഓഫ് ചെയ്യാറില്ലെന്നും അത്യാഹിത ഘട്ടങ്ങളിൽ ഒരു വരി ഗതാഗതം മാത്രമാണ് നിയന്ത്രിക്കുന്നതെന്നുമാണ് ട്രാഫിക് പൊലീസ് നൽകുന്ന വിശദീകരണം. സ്മാർട്സിറ്റി പദ്ധതിയുടെ ഭാഗമായി യാഥാർത്ഥ്യമാക്കിയ ഇന്റഗ്രേറ്റഡ് ട്രാഫിക് കൺട്രോൾ സിസ്റ്റവുമായി തലസ്ഥാനത്തെ സിഗ്നൽ ലൈറ്റുകൾ ബന്ധിപ്പിച്ചിട്ടുണ്ടെന്ന് അധികൃതർ വ്യക്തമാക്കി.

തിരക്കേറിയ റോഡുകളിൽ വാഹനപ്പെരുപ്പത്തിനനുസരിച്ച് സിഗ്നൽ ലൈറ്റുകളുടെ സമയക്രമം സ്വയം മാറുന്നതിനുള്ള സാങ്കേതിക സൗകര്യം ഇതിലുണ്ട്. അതിനാൽത്തന്നെ തുടർച്ചയായി സിഗ്നൽ ലൈറ്റുകൾ ഓഫ് ചെയ്യേണ്ട

സാഹചര്യം നിലവിലില്ല എന്നാണ് ട്രാഫിക് പൊലീസിന്റെ നിലപാട്. ഇതിനിടയിൽ, കെൽട്രോണും സ്മാർട്സിറ്റിയും ചേർന്ന് സ്ഥാപിച്ച സിഗ്നൽ ലൈറ്റുകളിൽ പലതും നിലവിൽ പ്രവർത്തനരഹിതമായ അവസ്ഥയിലാണ്.

വാർഷിക അറ്റകുറ്റപ്പണികൾ നടത്തുന്നതുമായി ബന്ധപ്പെട്ട് കെൽട്രോണുമായുള്ള കരാർ കൃത്യസമയത്ത് പുതുക്കാത്തതാണ് ഇതിലൊരു പ്രധാന കാരണം. കൂടാതെ, സോഫ്റ്റ്‌വെയർ അപ്ഡേഷൻ വൈകുന്നതുമാണ് സ്മാർട്സിറ്റിയുടെ കീഴിലുള്ള സിഗ്നൽ ലൈറ്റുകൾ പണിമുടക്കാൻ ഇടയാക്കുന്നത്.