മംഗളൂരുവിൽ സഹപാഠികളെ സംഘം ചേർന്ന് മർദിച്ച സംഭവത്തിൽ മലയാളി വിദ്യാർഥികൾ പിടിയിലായി. പാണ്ഡേശ്വർ ശ്രീനിവാസ കോളജിലെ രണ്ടാം വർഷ ലോജിസ്റ്റിക്സ് ഡിപ്ലോമ വിദ്യാർഥികളായ പയ്യന്നൂർ കവ്വായി സ്വദേശി രോഹൻ രമേഷ് (19), കെ.വേദാന്ത് സുഹാസ് (19), രാമന്തളി സ്വദേശി എം.പി.റഹാൻ (19), കണ്ണൂർ വേങ്ങര സ്വദേശി പി.മുഹമ്മദ് ഹർബാൻ (19), തൃശൂർ കണ്ടശാംകടവ് സ്വദേശി പി.കെ.റെജിൻ (19) എന്നിവരെയാണ് പാണ്ഡേശ്വർ പൊലീസ് കസ്റ്റഡിയിലെടുത്തത്.
ഒന്നാം വർഷ വിദ്യാർഥികളായ മലയാളികൾ തന്നെയായ ജസീൻ ഖാദർ, പി.എസ്.ആദർശ് എന്നിവരുടെ പരാതിയുടെ അടിസ്ഥാനത്തിലാണ് ഈ നടപടി. തുടർന്ന് പ്രതികളെ കോടതിയിൽ ഹാജരാക്കി ജാമ്യത്തിൽ വിടുകയുണ്ടായി.
ചൊവ്വാഴ്ച വൈകീട്ട് ജെപ്പു ഗുജ്ജരെക്കരെ പ്രദേശത്തുവെച്ചായിരുന്നു കേസിനാസ്പദമായ സംഭവം നടന്നത്. ഭക്ഷണം കഴിക്കാനായി എത്തിയ പുതുമുഖ വിദ്യാർഥികളെ തടഞ്ഞുനിർത്തിയ സീനിയർ വിഭാഗം അസഭ്യം പറയുകയും അതിക്രമം അഴിച്ചുവിടുകയുമാണുണ്ടായത്.
കോളജിൽ ഇവർ ഷൂസ് ധരിച്ച് വന്നതുമായി ബന്ധപ്പെട്ട് നേരത്തെ തന്നെ തർക്കങ്ങൾ നിലനിന്നിരുന്നു. “ഇനി ഇത് ആവർത്തിക്കരുത്” എന്ന് താക്കീത് നൽകിയായിരുന്നു മർദനം.
അക്രമത്തിൽ പരിക്കേറ്റവരിൽ ഒരാളുടെ കഴുത്തിന് ഗുരുതരമായി പരിക്കേറ്റിട്ടുണ്ട്. തുടർന്ന് ഇരുവരും ചേർന്ന് ഒരു സ്വകാര്യ ആശുപത്രിയിൽ ചികിത്സ തേടുകയും ചെയ്തു.
ആകെ ആറുപേർ ചേർന്നാണ് തങ്ങളെ ആക്രമിച്ചതെന്നും ഇതിൽ ഒരാൾ കൂടി ഇനി പിടിയിലാകാനുണ്ടെന്നും പരിക്കേറ്റ വിദ്യാർഥികൾ വ്യക്തമാക്കിയിട്ടുണ്ട്. നിയമനടപടികളുടെ ഭാഗമായി പ്രതികളെ കോടതിയിൽ ഹാജരാക്കിയ ശേഷമാണ് ജാമ്യത്തിൽ വിട്ടയച്ചത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
