മലയാള സിനിമയിലെ പകരം വെക്കാനില്ലാത്ത പ്രതിഭയും ദേശീയ പുരസ്കാര ജേതാവുമായ സലിം കുമാർ അന്തരിച്ചു. അന്തരിച്ച നടന്റെ സംസ്കാര ചടങ്ങുകൾ ഞായറാഴ്ച വൈകുന്നേരം മൂന്ന് മണിക്ക് പറവൂരിലെ അദ്ദേഹത്തിന്റെ വസതിയായ ലാഫിംഗ് വില്ലയിൽ വെച്ച് നടക്കും.
തന്റെ മരണാനന്തര ചടങ്ങുകളെ സംബന്ധിച്ച് വ്യക്തമായ നിർദ്ദേശങ്ങൾ അദ്ദേഹം നേരത്തെ കുടുംബാംഗങ്ങൾക്ക് നൽകിയിരുന്നു. മതപരമായ ചടങ്ങുകൾ ഒഴിവാക്കണമെന്നും, അസ്ഥി പുഴയിൽ ഒഴുക്കേണ്ടതില്ലെന്നുമാണ് സലിം കുമാർ ആഗ്രഹം പ്രകടിപ്പിച്ചിരുന്നത്.
ശ്വാസതടസം അനുഭവപ്പെട്ടതിനെത്തുടർന്ന് അദ്ദേഹത്തെ അമൃത ആശുപത്രിയിൽ പ്രവേശിപ്പിക്കുകയായിരുന്നു. തുടർന്ന് ന്യൂമോണിയയും രക്തത്തിൽ അണുബാധയും കണ്ടെത്തിയതിനെ തുടർന്ന് വെന്റിലേറ്റർ, ആന്റിബയോട്ടിക്കുകൾ, ഡയാലിസിസ് ഉൾപ്പെടെയുള്ള വിദഗ്ദ്ധ ചികിത്സകൾ നൽകി വരികയായിരുന്നു.
ഇതിനിടെ സംഭവിച്ച ഹൃദയാഘാതമാണ് മരണകാരണമായത്. കഴിഞ്ഞ കുറച്ചു വർഷങ്ങളായി കരൾ സംബന്ധമായ അസുഖങ്ങളെത്തുടർന്ന് താരം ആരോഗ്യപരമായ വെല്ലുവിളികൾ നേരിട്ടിരുന്നു.
ലിവർ സിറോസിസ് മദ്യപാനം കൊണ്ടല്ല, മറിച്ച് പാരമ്പര്യമായി ലഭിച്ചതാണെന്ന് അദ്ദേഹം നേരത്തെ വെളിപ്പെടുത്തിയിരുന്നു. രോഗാവസ്ഥയിലായിരുന്ന കാലയളവിൽ വ്യാജ ചികിത്സകൾ തേടേണ്ടി വന്നതും അത് ആരോഗ്യനില വഷളാക്കിയതും അദ്ദേഹം മുമ്പ് പരസ്യമായി പങ്കുവെച്ചിട്ടുണ്ട്.
