ഓണക്കാലത്ത് ബെംഗളൂരു-കേരള യാത്രാദുരിതം രൂക്ഷം; സ്വകാര്യ ബസുകൾ കൊള്ളനിരക്ക് ഈടാക്കുന്നുവെന്ന് പരാതി

ഓണാവധിയോട് അനുബന്ധിച്ച് ബെംഗളൂരുവിൽ നിന്ന് കേരളത്തിലേക്കും തിരിച്ചുമുള്ള ട്രെയിൻ ടിക്കറ്റുകൾ ലഭ്യമല്ലാതായതോടെ, സ്വകാര്യ യാത്രാ ബസുകൾ നിരക്ക് വൻതോതിൽ വർധിപ്പിച്ചു. സ്ലീപ്പർ വിഭാഗത്തിൽ 3,500 രൂപ മുതലാണ് നിലവിൽ നിരക്ക് ആരംഭിക്കുന്നത്.

ഒരേ ബസിൽ തന്നെ പുഷ്ബാക് സീറ്റുകൾക്ക് 2,600 രൂപയും ബെർത്തുകൾക്ക് 4,390 രൂപ വരെയും ഈടാക്കുന്നുണ്ട്. മാസങ്ങൾക്ക് മുൻപ് തന്നെ ട്രെയിൻ ടിക്കറ്റുകൾ മുഴുവൻ ബുക്ക് ചെയ്യപ്പെട്ടിരുന്നു.

പിന്നീട് റെയിൽവേ പ്രഖ്യാപിച്ച സ്പെഷൽ ട്രെയിനുകളിലും ടിക്കറ്റുകൾ ലഭ്യമാകാത്ത സ്ഥിതിയാണ്. ഓണം കഴിഞ്ഞുള്ള ശനി, ഞായർ ദിവസങ്ങളിലും കേരളത്തിൽ നിന്ന് ബെംഗളൂരുവിലേക്ക് ട്രെയിൻ ടിക്കറ്റുകൾ ലഭ്യമല്ല.

യാത്രക്കാരുടെ വർധിച്ചുവരുന്ന തിരക്ക് കണക്കിലെടുത്ത് കെഎസ്ആർടിസി നിരവധി പ്രത്യേക സർവീസുകൾ പ്രഖ്യാപിച്ചിട്ടുണ്ട്. ഈ ബസുകളിൽ ചുരുക്കം ചില ടിക്കറ്റുകൾ മാത്രമാണ് ഇനി ബാക്കിയുള്ളത്.

കെഎസ്ആർടിസിയിലും ഡൈനാമിക് പ്രൈസിങ് നടപ്പിലാക്കിയിട്ടുള്ളതിനാൽ തുടക്കത്തിൽ കുറഞ്ഞ നിരക്കിൽ ടിക്കറ്റ് ലഭിക്കുമെങ്കിലും, തിരക്ക് വർധിക്കുന്നതനുസരിച്ച് നിരക്ക് ഉയരുന്നതാണ്. ഈ സാഹചര്യത്തിൽ റെയിൽവേ അടിയന്തരമായി കൂടുതൽ സ്പെഷൽ ട്രെയിനുകൾ സർവീസ് നടത്തണമെന്ന് യാത്രക്കാരുടെ ഭാഗത്തുനിന്ന് ശക്തമായ ആവശ്യം ഉയരുന്നുണ്ട്.

എറണാകുളം–ബെംഗളൂരു വന്ദേഭാരത് സർവീസുമായി ബന്ധപ്പെട്ടും വലിയ അനിശ്ചിതത്വമാണ് നിലനിൽക്കുന്നത്. നിലവിലുള്ള 8 കോച്ചുകൾക്ക് പകരം 16 കോച്ചുകളുള്ള പുതിയ ട്രെയിൻ അനുവദിച്ചെങ്കിലും ഇതുവരെയും സർവീസ് ആരംഭിക്കാൻ സാധിച്ചിട്ടില്ല.

പുതിയ റേക്ക് കൈമാറിയിട്ടും ബെംഗളൂരു ഡിവിഷനിലെ മെക്കാനിക്കൽ വിഭാഗത്തിന്റെ പരിശോധനയും ഫിറ്റ്നസ് സർട്ടിഫിക്കറ്റ് നൽകുന്നതും വൈകുന്നതാണ് പ്രധാന തടസ്സം. ഓരോ സർവീസിലും 600-ഓളം സീറ്റുകൾ അധികമായി ലഭിക്കുകയും അതുവഴി വലിയ വരുമാനം നേടാൻ കഴിയുകയും ചെയ്യുമായിരുന്നിട്ടും റെയിൽവേയുടെ ഭാഗത്തുനിന്ന് മെല്ലെപ്പോക്ക് നയമാണ് ഉണ്ടാകുന്നത്.

സ്വകാര്യ ബസ് ലോബികളെ സഹായിക്കാനാണ് ഈ കാലതാമസമെന്ന ഗുരുതരമായ ആക്ഷേപവും ഇതിനോടകം ഉയർന്നിട്ടുണ്ട്. കൂടാതെ, തിരുവനന്തപുരം നോർത്ത്–എസ്എംവിടി ബെംഗളൂരു ഹംസഫർ എക്സ്പ്രസ് ആഴ്ചയിൽ ഒരു സർവീസ് കൂടി നടത്താനുള്ള സാധ്യതയുണ്ടെങ്കിലും ബെംഗളൂരു ഡിവിഷൻ ഇതിന് അനുമതി നൽകാൻ തയാറായിട്ടില്ല.

ബെംഗളൂരുവിൽ ട്രെയിനിനായി പ്ലാറ്റ്ഫോം ലഭ്യമല്ലെങ്കിൽ മൈസൂരു, ശിവമൊഗ്ഗ തുടങ്ങിയ മറ്റ് സമീപ സ്ഥലങ്ങളിലേക്ക് ഈ സർവീസ് നീട്ടാവുന്നതാണ്. എന്നാൽ റെയിൽവേ അധികൃതരുടെ ഭാഗത്തുനിന്ന് ഇതിലും അനുകൂലമായ നടപടികൾ ഒന്നും തന്നെ ഉണ്ടായിട്ടില്ല.