വിയറ്റ്നാമിലുണ്ടായ ബോട്ടപകടത്തിൽ ദാരുണമായി മരണപ്പെട്ട വിക്ടറി ഗ്രൂപ്പ് മാനേജിങ് ഡയറക്ടർ എ.സി.തോമസ് (56), ഭാര്യ ലൗനി തോമസ് (56) എന്നിവരുടെ സംസ്കാര ശുശ്രൂഷകൾ ഭക്തിനിർഭരമായ ചടങ്ങുകളോടെ നടന്നു.
കൊട്ടാരക്കര കിഴക്കേക്കര കൃപാ നഗർ 90 ആവിയോട്ട് ഹൗസിലെ വസതിയിൽ നടന്ന പ്രാഥമിക ശുശ്രൂഷകൾക്ക് ശേഷം, മൃതദേഹങ്ങൾ പൊതുദർശനത്തിനായി പുലമൺ മാർത്തോമ്മാ ജൂബിലി മന്ദിരത്തിൽ എത്തിച്ചിരുന്നു. അന്ത്യാഞ്ജലി അർപ്പിച്ചു
നാടിന്റെ നാനാഭാഗങ്ങളിൽ നിന്നായി ആയിരക്കണക്കിനാളുകളാണ് പ്രിയദമ്പതികൾക്ക് അന്ത്യാഞ്ജലി അർപ്പിക്കാൻ എത്തിയത്.
ഡോ. തിയഡോഷ്യസ് മാർത്തോമ്മാ മെത്രാപ്പൊലീത്ത സംസ്കാര ശുശ്രൂഷകൾക്ക് നേതൃത്വം നൽകി.
കൊട്ടാരക്കര–പുനലൂർ ഭദ്രാസനാധിപൻ ഡോ. തോമസ് മാർ തീത്തോസ് ചടങ്ങുകളുടെ ആദ്യഘട്ടത്തിന് കാർമ്മികത്വം വഹിച്ചു.
ജനബാഹുല്യം കണക്കിലെടുത്ത് വിലാപയാത്ര ഒഴിവാക്കി, അടുത്ത ബന്ധുക്കൾ മാത്രം മൃതദേഹത്തെ അനുഗമിക്കുന്ന രീതിയിലാണ് ക്രമീകരണങ്ങൾ നടത്തിയത്. വൈകിട്ട് 4 മണിയോടെ കൊട്ടാരക്കര മാർത്തോമ്മാ വലിയപള്ളിയിൽ സംസ്കാരം പൂർത്തിയായി.
പ്രമുഖരുടെ സാന്നിധ്യം
മന്ത്രിമാരായ സി.പി.ജോൺ, പി.സി. വിഷ്ണുനാഥ്, ബിന്ദു കൃഷ്ണ, മോൻസ് ജോസഫ്, എംപിമാരായ കൊടിക്കുന്നിൽ സുരേഷ്, എൻ.കെ.
പ്രേമചന്ദ്രൻ, ബെന്നി ബഹനാൻ, എംഎൽഎമാരായ കെ.എൻ.ബാലഗോപാൽ, വർഗീസ് മാമ്മൻ എന്നിവർ അന്ത്യാഞ്ജലി അർപ്പിച്ചു. മുഖ്യമന്ത്രിയുടെ അനുശോചന സന്ദേശം ചടങ്ങിൽ വായിച്ചു.
കൂടാതെ ഡോ.യുയാക്കിം മാർ കൂറിലോസ്, ജോസഫ് മാർ ബർണബാസ്, ഡോ. ഐസക് മാർ പീലക്സിനോസ്, തോമസ് മാർ തിമോത്തിയോസ്, മാത്യൂസ് മാർ സെറാഫിം, ഡോ.
ജോഷ്വ മാർ ഇഗ്നാത്തിയോസ്, ഡോ. സെൽവിസ്റ്റർ പൊന്നുമുത്തൻ, ഡോ.
യൂഹാനോൻ മാർ തേവോദോറോസ്, മുൻ മന്ത്രി കെ.സി.ജോസഫ്, സിപിഐ ജില്ലാ സെക്രട്ടറി പി.എസ്. സുപാൽ, ജില്ലാ എക്സിക്യൂട്ടീവ് അംഗം എ.മൻമഥൻ നായർ, ഡിസിസി പ്രസിഡന്റ് പി.രാജേന്ദ്ര പ്രസാദ് തുടങ്ങിയവർ പങ്കെടുത്തു.
നിർമിതി കേന്ദ്രം സിഇഒ ഡോ. ഫെബി വർഗീസ് ചടങ്ങുകൾ ഏകോപിപ്പിച്ചു.
ജീവകാരുണ്യത്തിന്റെ മാതൃക
‘ജോമോൻ’ എന്ന സ്നേഹപ്പേരിൽ അറിയപ്പെട്ടിരുന്ന എ.സി. തോമസ് ബിസിനസ് രംഗത്ത് മാത്രമല്ല, ജീവകാരുണ്യ പ്രവർത്തനങ്ങളിലും വലിയ മാതൃകയായിരുന്നുവെന്ന് ചടങ്ങിൽ പങ്കെടുത്തവർ അനുസ്മരിച്ചു.
അർഹരായവർക്ക് സഹായമെത്തിക്കുന്നതിലും മരുന്നുകൾ ലഭ്യമാക്കുന്നതിലും അദ്ദേഹം കാണിച്ച താൽപ്പര്യം നാടിന് തീരാനഷ്ടമാണെന്ന് അനുശോചന പ്രസംഗങ്ങളിൽ പരാമർശിച്ചു.
