തിരഞ്ഞെടുപ്പ് പരാജയം സംബന്ധിച്ച ആലപ്പുഴ സിപിഎം ജില്ലാ കമ്മിറ്റി അവലോകന യോഗത്തിന്റെ സമാപന ദിവസവും മുൻ മുഖ്യമന്ത്രി പിണറായി വിജയനും സംസ്ഥാന സെക്രട്ടറി എം.വി.ഗോവിന്ദനുമെതിരെ ശക്തമായ വിമർശനം ഉയർന്നു. പാർട്ടിയുടെ പ്രവർത്തന ശൈലിയിൽ അടിമുടി മാറ്റം വേണമെന്നും, തിരുത്തൽ നടപടികളിലേക്ക് കടന്നില്ലെങ്കിൽ സംഘടനയുടെ നിലനിൽപ്പ് തന്നെ അപകടത്തിലാകുമെന്നും അംഗങ്ങൾ മുന്നറിയിപ്പ് നൽകി.
സംസ്ഥാന കമ്മിറ്റിയുടെ പ്രവർത്തനങ്ങൾ ഫലപ്രദമല്ലെന്നും ജനകീയ വിഷയങ്ങളിൽ കൃത്യമായ ഇടപെടൽ നടത്തുന്നതിൽ നേതൃത്വം പരാജയപ്പെട്ടെന്നും യോഗത്തിൽ അഭിപ്രായമുയർന്നു. പിണറായി വിജയനെതിരെ നിലനിൽക്കുന്ന ജനവികാരത്തെ നേതൃത്വം വേണ്ടത്ര ഗൗരവത്തോടെ കണ്ടില്ലെന്നതും വിമർശന വിഷയമായി.
മറുപക്ഷത്ത്, എല്ലാ ഉത്തരവാദിത്തങ്ങളും പിണറായി വിജയന്റെ മാത്രം തലയിൽ കെട്ടിവെക്കുന്നതിനെ എതിർക്കുന്നവരും ഉണ്ടായിരുന്നു. പാർട്ടിയും മുന്നണിയും ഒറ്റക്കെട്ടായി നേരിട്ട
തിരഞ്ഞെടുപ്പിലെ പരാജയത്തിന് ഒരാളെ മാത്രം കുറ്റപ്പെടുത്തുന്നത് ശരിയല്ലെന്നും, ക്രിക്കറ്റ് ടീം തോൽക്കുമ്പോൾ ക്യാപ്റ്റൻ മാത്രമാണോ കുറ്റക്കാരനെന്നും ഇവർ ചോദിച്ചു. പ്രതിപക്ഷ നേതൃസ്ഥാനത്തുനിന്ന് പിണറായിയെ മാറ്റണമെന്ന ആവശ്യം ഉയർന്നുവെങ്കിലും, തോമസ് ഐസക് ഇത് തള്ളിക്കളഞ്ഞു.
പിണറായി വിജയനെ മാറ്റില്ലെന്ന് സംസ്ഥാന സെക്രട്ടേറിയറ്റിന്റെ പ്രതിനിധിയായി പങ്കെടുത്ത തോമസ് ഐസക് വ്യക്തമാക്കി. തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ എ.ഡി.തോമസിനെ സുരക്ഷാ ഉദ്യോഗസ്ഥർ മർദിച്ച സംഭവവും ചർച്ചയായി.
ഇത് സ്ത്രീകൾക്കിടയിൽ തോമസിനോട് വലിയ സഹതാപം ഉണ്ടാക്കിയെന്നും, ഇതിനെ ‘രക്ഷാപ്രവർത്തനം’ എന്ന് വിളിച്ച് ന്യായീകരിച്ചത് ജനങ്ങൾ തിരിച്ചറിഞ്ഞുവെന്നും വിമർശകർ ചൂണ്ടിക്കാട്ടി. ശബരിമല സ്വർണക്കൊള്ള കേസിലെ എ.പത്മകുമാറിന്റെ വിഷയത്തിലും നേതൃത്വത്തിനെതിരെ ആരോപണങ്ങൾ ഉയർന്നു.
കായംകുളം മുൻ എംഎൽഎ യു.പ്രതിഭ, ജി.സുധാകരനെതിരെ രൂക്ഷമായ ഭാഷയിലാണ് പ്രതികരിച്ചത്. ‘‘കായംകുളത്തു സുധാകരൻ എന്നെ തോൽപിക്കാൻ ശ്രമിച്ചു.
തോൽപിക്കണമെന്നു പലരോടും ഫോണിൽ ആവശ്യപ്പെട്ടു. അമ്പലപ്പുഴയിലും ഇതേ പണി ചെയ്തു.
2021ൽ സ്ഥാനാർഥിയല്ലാഞ്ഞിട്ടും സുധാകരൻ പണം പിരിച്ചു. അതിന്റെ കണക്കു പാർട്ടിക്കു നൽകിയിട്ടില്ല.
എന്നിട്ടും ഈ വിവരം നേതൃത്വം ജനങ്ങളിൽനിന്നു മറച്ചുവച്ചു.’’ എന്ന് പ്രതിഭ ആരോപിച്ചു. കൂടാതെ, തന്റെ മകനെ അവഹേളിച്ച വെള്ളാപ്പള്ളി നടേശനെതിരെ നിയമനടപടി സ്വീകരിക്കാൻ പാർട്ടി അനുമതി തേടുകയും ചെയ്തു.
അതേസമയം, ജി.സുധാകരൻ കോൺഗ്രസിന്റെയും ബിജെപിയുടെയും കൈക്കോടാലിയായി അധഃപതിക്കുകയാണെന്ന് സിപിഎം ജില്ലാ സെക്രട്ടേറിയറ്റ് ഔദ്യോഗികമായി പ്രസ്താവിച്ചു. പാർട്ടിയുടെ ആനുകൂല്യങ്ങൾ പറ്റി വളർന്നശേഷം, എംഎൽഎ പദവി ഉപയോഗിച്ച് പാർട്ടിയെയും നേതാക്കളെയും അപമാനിക്കുകയാണ് സുധാകരനെന്നും സെക്രട്ടേറിയറ്റ് ആരോപിച്ചു.
ജില്ലാ നേതൃത്വത്തിന്റെ ദൗർബല്യങ്ങളും യോഗത്തിൽ ചർച്ചയായി. കീഴ്ഘടകങ്ങളിലെ സംഘടനാ പ്രവർത്തനങ്ങൾ മന്ദഗതിയിലാണെന്നും ബ്രാഞ്ച് യോഗങ്ങൾ പോലും കൃത്യമായി ചേരുന്നില്ലെന്നും അംഗങ്ങൾ ചൂണ്ടിക്കാട്ടി.
തിരഞ്ഞെടുപ്പ് അവലോകനത്തിനായി സംസ്ഥാന കമ്മിറ്റിയംഗങ്ങളുടെ നേതൃത്വത്തിൽ ഇന്ന് മുതൽ ഏരിയ കമ്മിറ്റി യോഗങ്ങൾ ആരംഭിക്കും. തുടർന്ന് ലോക്കൽ കമ്മിറ്റി, ബ്രാഞ്ച് കമ്മിറ്റി തലങ്ങളിലും അവലോകന യോഗങ്ങൾ നടക്കും.
ഈ വിവരങ്ങൾ ക്രോഡീകരിച്ചായിരിക്കും സംസ്ഥാന കമ്മിറ്റി അന്തിമ റിപ്പോർട്ട് തയ്യാറാക്കുക.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
