പിറവം മേഖലയിൽ അതിഥിത്തൊഴിലാളികൾ താമസിക്കുന്ന കേന്ദ്രങ്ങളിലെ ശോച്യാവസ്ഥയെക്കുറിച്ചും സുരക്ഷാ മാനദണ്ഡങ്ങളിലെ വീഴ്ചകളെക്കുറിച്ചും പൊലീസ് രഹസ്യാന്വേഷണ വിഭാഗം തെളിവു ശേഖരണം ആരംഭിച്ചു. വാസയോഗ്യമല്ലാത്ത കെട്ടിടങ്ങൾ പോലും ഉയർന്ന വാടകയ്ക്ക് വാടകയ്ക്ക് നൽകുകയും, താമസക്കാരുടെ കൃത്യമായ വിലാസമോ വ്യക്തിവിവരങ്ങളോ ശേഖരിക്കാതിരിക്കുകയും ചെയ്യുന്ന പ്രവണത വ്യാപകമാണെന്ന് ഉന്നതതല പരിശോധനയിൽ വ്യക്തമായിട്ടുണ്ട്.
കഴിഞ്ഞ ദിവസം നെച്ചൂരിലെ വാടക കെട്ടിടത്തിന്റെ ടെറസിൽ അതിഥിത്തൊഴിലാളിയുടെ മൃതദേഹം കണ്ടെത്തിയ സംഭവത്തെത്തുടർന്നാണ് അധികൃതർ നടപടികൾ കർശനമാക്കിയത്. രണ്ടു ദിവസത്തിലേറെ പഴക്കമുള്ള മൃതദേഹം കണ്ടെത്തിയപ്പോൾ മരിച്ചയാളുടെ വിലാസം പോലും കൃത്യമായി രേഖപ്പെടുത്തിയിരുന്നില്ലെന്ന് പൊലീസ് വ്യക്തമാക്കി.
കൊലപാതക സാധ്യതയുണ്ടെന്ന സംശയത്തിൽ അന്വേഷണം തുടങ്ങിയെങ്കിലും, പിന്നീട് ഹൃദയാഘാതമാണ് മരണകാരണമെന്ന് സ്ഥിരീകരിക്കുകയായിരുന്നു. അതിഥിത്തൊഴിലാളികളുടെ വിവരങ്ങൾ അതത് പൊലീസ് സ്റ്റേഷനുകളിൽ സമർപ്പിക്കണമെന്ന നിർദ്ദേശം പലയിടത്തും അട്ടിമറിക്കപ്പെടുകയാണ്.
പത്തു പേർക്ക് താമസിക്കാൻ സൗകര്യമുള്ള ഇടങ്ങളിൽ മുപ്പതോളം പേരെ വരെ തിങ്ങിപ്പാർപ്പിക്കുന്ന സാഹചര്യം നിലവിലുണ്ട്. കുടിവെള്ളമോ ശുചിമുറി സൗകര്യങ്ങളോ ഇല്ലാത്ത കെട്ടിടങ്ങളിൽ, മലിനജലം കെട്ടിക്കിടക്കുന്നതിന് തൊട്ടടുത്തായാണ് പലരും പാചകം ചെയ്യുന്നത്.
കൂടാതെ, പ്ലൈവുഡ് കമ്പനികളിൽ പ്രായപൂർത്തിയാകാത്ത കുട്ടികളെ ജോലിക്കെടുക്കുന്നതായുള്ള പരാതികളും ഉയരുന്നുണ്ട്. നിർമ്മാണ മേഖലയിലടക്കം തൊഴിലാളികൾക്ക് മതിയായ താമസ സൗകര്യങ്ങൾ തൊഴിലുടമകൾ ഒരുക്കാത്ത സാഹചര്യമാണ് ഇടനിലക്കാർ മുതലെടുക്കുന്നത്.
നേരത്തെ, അതിഥിത്തൊഴിലാളികൾക്ക് താമസിക്കാൻ പട്ടിക്കൂട് സമാനമായ സൗകര്യം നൽകിയ സംഭവം വലിയ വിവാദങ്ങൾക്ക് വഴിവെച്ചിരുന്നു. ഇത്തരം സുരക്ഷാ ലംഘനങ്ങൾക്കെതിരെ വരുംദിവസങ്ങളിൽ കർശന നിയമനടപടികൾ സ്വീകരിക്കുമെന്നും അധികൃതർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
