കള്ളാടി-ആനക്കാംപൊയിൽ തുരങ്കപാത: ദിലിപ് ബിൽഡ്കോൺ ഓഹരികളിൽ ഇടിവ് തുടരുന്നു

കള്ളാടി-ആനക്കാംപൊയിൽ തുരങ്കപാത നിർമാണത്തിന്റെ ചുമതല വഹിക്കുന്ന ഭോപ്പാൽ ആസ്ഥാനമായ ദിലിപ് ബിൽഡ്കോൺ കമ്പനി ഓഹരി വിപണിയിൽ പ്രതിസന്ധി നേരിടുന്നു. നിർമാണ സ്ഥലത്തുണ്ടായ മണ്ണിടിച്ചിലുമായി ബന്ധപ്പെട്ട് കമ്പനി ഓഹരി വിപണിയിൽ വിശദീകരണം നൽകിയെങ്കിലും ഓഹരി വിലയിലെ ഇടിവ് തുടരുകയാണ്.

പദ്ധതി പ്രദേശത്ത് ഇന്നലെയുണ്ടായ മണ്ണിടിച്ചിൽ കമ്പനിയുടെ പിഴവു മൂലമല്ലെന്നും, ജൂലൈ മാസത്തിലുണ്ടായ അമിതമായ മഴയാണ് ഇതിന് കാരണമെന്നുമാണ് കമ്പനി അധികൃതർ ഓഹരി വിപണിയിൽ നൽകിയ റിപ്പോർട്ടിൽ വ്യക്തമാക്കിയത്. എന്നാൽ വിപണിയിൽ ഇതിനകം തന്നെ കമ്പനിയുടെ ഓഹരികൾക്ക് തിരിച്ചടി നേരിട്ടു കഴിഞ്ഞു.

ഓഹരിയൊന്നിന് 427.40 രൂപ എന്ന നിലയിലാണ് ഇന്ന് വ്യാപാരം ആരംഭിച്ചത്. വ്യാപാര സമയം പുരോഗമിച്ചതോടെ ഓഹരി വിലയിൽ രണ്ട് ശതമാനത്തോളം ഇടിവ് രേഖപ്പെടുത്തി.

ഉച്ചയ്ക്ക് 12 മണിയോടെ 1.20 ശതമാനം നഷ്ടത്തിലാണ് ഓഹരികൾ വ്യാപാരം തുടരുന്നത്. ഇന്നലെയും കമ്പനിയുടെ ഓഹരികൾക്ക് നേരിയ ഇടിവ് സംഭവിച്ചിരുന്നു.

കമ്പനിയുടെ വളർച്ചാ പാത
ദിലിപ് സൂര്യവംശി 1987-ൽ അഞ്ച് ജീവനക്കാരുമായി ചേർന്ന് ആരംഭിച്ച ‘ദിലിപ് ബിൽഡേഴ്സ്’ എന്ന ചെറുകിട നിർമാണ സംരംഭമാണ് ഇന്ന് കോടികളുടെ ആസ്തിയുള്ള ദിലിപ് ബിൽഡ്കോൺ ആയി വളർന്നത്.

മധ്യപ്രദേശിൽ പ്രവർത്തനം ആരംഭിച്ച കമ്പനി 2006-ൽ പ്രൈവറ്റ് ലിമിറ്റഡ് കമ്പനിയായി മാറുകയും 2016-ൽ ഓഹരി വിപണിയിൽ ലിസ്റ്റ് ചെയ്യുകയും ചെയ്തു. ഐപിഒ വഴി മികച്ച പ്രതികരണം ലഭിച്ചതായി കമ്പനിയുടെ ഔദ്യോഗിക രേഖകൾ വ്യക്തമാക്കുന്നു.

നിലവിലെ പ്രവർത്തന മേഖലകൾ
റോഡ്, ഹൈവേ നിർമാണത്തിന് പുറമെ വിമാനത്താവളങ്ങൾ, റെയിൽവേ, പാലങ്ങൾ, പെട്രോളിയം തുടങ്ങിയ അടിസ്ഥാന സൗകര്യ വികസന മേഖലകളിലും കമ്പനിക്ക് പങ്കാളിത്തമുണ്ട്. രാജ്യത്തെ നാല് ഇടങ്ങളിൽ തുരങ്ക നിർമാണ പദ്ധതികൾ ഇപ്പോൾ നടന്നുവരുന്നുണ്ട്.

മധ്യപ്രദേശിലെ രേവ-സിധി തുരങ്കപാതയുടെ നിർമാണം പൂർത്തിയാക്കി ദേശീയപാത അതോറിറ്റിക്ക് കമ്പനി കൈമാറിയിട്ടുണ്ട്. 2024-25 സാമ്പത്തിക വർഷത്തിലാണ് കോഴിക്കോട് ജില്ലയെ വയനാടുമായി ബന്ധിപ്പിക്കുന്ന തുരങ്കപാതയുടെ കരാർ കമ്പനിക്ക് ലഭിച്ചത്.

ഇതിനു പുറമെ പാലക്കാട് വ്യവസായ സ്മാർട് സിറ്റിയുടെ നിർമാണത്തിനായി 1115.37 കോടി രൂപയുടെ കരാറും കഴിഞ്ഞ വർഷം കമ്പനി സ്വന്തമാക്കിയിരുന്നു. സാമ്പത്തിക സ്ഥിതിവിവരക്കണക്കുകൾ
ഓഹരി വിപണിയിലെ റിപ്പോർട്ടുകൾ പ്രകാരം 2024-25 സാമ്പത്തിക വർഷത്തിൽ 5.8 ശതമാനം ഇടിവുണ്ടായെങ്കിലും 11,317 കോടി രൂപയുടെ വരുമാനം കമ്പനിക്ക് നേടാൻ സാധിച്ചു.

വരുമാനത്തിൽ നേരിയ കുറവുണ്ടായെങ്കിലും ലാഭത്തിൽ 317 ശതമാനം വർധന രേഖപ്പെടുത്തി 841 കോടി രൂപയിലെത്തി. നിലവിൽ കമ്പനിയുടെ വിപണി മൂല്യം 6890 കോടി രൂപയാണ്.

ഏകദേശം 28,830 കോടി രൂപയുടെ ഓർഡർ ബുക്ക് നിലവിൽ കമ്പനിക്കുള്ളതായാണ് കണക്കുകൾ സൂചിപ്പിക്കുന്നത്.