സ്മാർട്ട്ഫോണുകളിൽ ഇടയ്ക്കിടെ സ്റ്റോറേജ് കുറഞ്ഞു വരുന്ന പ്രശ്നം പലരെയും അലട്ടാറുണ്ട്. വലിയ വീഡിയോകളോ നിരവധി ആപ്പുകളോ ഡൗൺലോഡ് ചെയ്യാതിരുന്നിട്ടും ഫോൺ മെമ്മറി വേഗത്തിൽ നിറയുന്നത് പലപ്പോഴും ആശയക്കുഴപ്പം സൃഷ്ടിക്കാറുണ്ട്.
ഈ സാഹചര്യത്തിലാണ് ഫയൽസ് ബൈ ഗൂഗിൾ (Files by Google) ആപ്പ് ഉപയോക്താക്കൾക്ക് ഏറെ സഹായകരമാകുന്നത്. ഫോൾഡറുകൾ തോറും പരതി സമയം കളയുന്നതിന് പകരം, ഫോണിലെ അനാവശ്യ ഫയലുകൾ കൃത്യമായി കണ്ടെത്തി ഒഴിവാക്കാൻ ഈ ആപ്പിലൂടെ സാധിക്കുന്നു.
ഫോണിന്റെ മെമ്മറി പരിശോധിക്കുമ്പോൾ ഡ്യൂപ്ലിക്കേറ്റ് ഫയലുകൾ, പഴയ ഡൗൺലോഡുകൾ, ഉപയോഗിക്കാത്ത ആപ്പുകൾ, അവ്യക്തമായ ചിത്രങ്ങൾ എന്നിവയാണ് പ്രധാനമായും സ്ഥലം നഷ്ടപ്പെടുത്തുന്നത്. ആപ്പിലെ ഹാംബർഗർ മെനു ഐക്കൺ ക്ലിക്ക് ചെയ്ത് ക്ലീൻ (Clean) ഓപ്ഷൻ തിരഞ്ഞെടുക്കുന്നതിലൂടെ ഫോൺ ഡീറ്റെക്റ്റീവ് വർക്കുകൾ ആപ്പ് സ്വയം ചെയ്യും.
വലിയ ഫയലുകളെ ഡ്യൂപ്ലിക്കേറ്റുകൾ, സ്ക്രീൻഷോട്ടുകൾ, ഡൗൺലോഡ് ചെയ്ത ഫയലുകൾ, ഉപയോഗിക്കാത്ത ആപ്പുകൾ എന്നിങ്ങനെ വിഭാഗങ്ങളായി ഇത് തിരിച്ചു നൽകുന്നു. ഡൗൺലോഡ് ഫോൾഡറുകൾ പലപ്പോഴും ആളുകൾ ശ്രദ്ധിക്കാത്ത വലിയൊരു സ്റ്റോറേജ് ഭാരമാണ്.
മാസങ്ങളായി ഉപയോഗിക്കാത്ത പിഡിഎഫുകൾ, എപികെ ഫയലുകൾ, സിപ് ഫയലുകൾ എന്നിവയെല്ലാം ഇവിടെ കെട്ടിക്കിടക്കാറുണ്ട്. ഫയൽസ് ബൈ ഗൂഗിൾ ആപ്പിലെ ഡൗൺലോഡ് കാറ്റഗറിയിൽ പ്രവേശിച്ച് ഏറ്റവും വലുത് ആദ്യം (Largest first) എന്ന രീതിയിൽ സോർട്ട് ചെയ്താൽ വലിയ ഫയലുകൾ എളുപ്പത്തിൽ കണ്ടെത്താനാകും.
ഫോട്ടോകളെക്കാളും ആപ്പുകളെക്കാളും കൂടുതൽ സ്ഥലം പലപ്പോഴും ചില വലിയ വീഡിയോകളാണ് കൈയടക്കുന്നത്. നൂറുകണക്കിന് മെഗാബൈറ്റോ ജിഗാബൈറ്റോ വരുന്ന ഇത്തരം വീഡിയോകൾ ഒരിടത്ത് തന്നെ കാണാൻ ഈ ആപ്പ് സഹായിക്കുന്നു.
ഇതിലൂടെ ആവശ്യമുള്ളവ നിലനിർത്തി മറ്റുള്ളവ നീക്കം ചെയ്ത് ഫോണിൽ വലിയ അളവിൽ സ്റ്റോറേജ് തിരികെ പിടിക്കാൻ സാധിക്കും. ഇത്തരം ആപ്പിലൂടെ ഡിലീറ്റ് ചെയ്യുന്ന ഫയലുകൾ ആദ്യം ട്രാഷ് (Trash) ഫോൾഡറിലേക്കാണ് പോവുക.
ഇത് 30 ദിവസത്തോളം അവിടെ സൂക്ഷിക്കപ്പെടും. പെട്ടെന്ന് തന്നെ സ്പേസ് ലഭ്യമാകണമെങ്കിൽ മെനുവിൽ പോയി ട്രാഷ് എംപ്റ്റി ചെയ്യാവുന്നതാണ്.
അതേസമയം ജങ്ക് ഫയലുകൾ ഉടൻ തന്നെ ശാശ്വതമായി നീക്കം ചെയ്യപ്പെടും. മാസങ്ങളായി തുറന്നു നോക്കാത്ത ആപ്പുകളെയും പഴയ സ്ക്രീൻഷോട്ടുകളെയും മീമുകളെയും കൃത്യമായി വേർതിരിച്ചെടുത്ത് ഒഴിവാക്കാനും ഈ സംവിധാനത്തിലൂടെ സാധിക്കുന്നു.
ഈ രീതി മാസത്തിലൊരിക്കൽ ശീലമാക്കുന്നത് ഫോൺ സ്റ്റോറേജ് എപ്പോഴും കൃത്യതയോടെ സൂക്ഷിക്കാൻ ഉപയോക്താക്കളെ സഹായിക്കും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
