വെറുതെ സമയം കളയുന്ന സോഷ്യൽ മീഡിയ സ്ക്രോളിംഗിന് പകരമായി ഉപയോക്താക്കൾക്കിടയിൽ ജനപ്രീതി നേടുകയാണ് ഗൂഗിൾ ആർട്സ് ആൻഡ് കൾച്ചർ (Google Arts & Culture) ആപ്പ്. വെറുമൊരു വിദ്യാഭ്യാസ ആപ്പ് എന്നതിലുപരി, സോഷ്യൽ മീഡിയ ഫീഡുകൾ പോലെ എളുപ്പത്തിൽ ഉപയോഗിക്കാൻ കഴിയുന്ന ഒന്നായാണ് ഇത് രൂപകൽപ്പന ചെയ്തിരിക്കുന്നത്.
ചരിത്രം, കല, സംസ്കാരം എന്നിവയെക്കുറിച്ചുള്ള പുതിയ അറിവുകൾ നൽകുന്ന ഈ ആപ്പ് ഡിജിറ്റൽ ലോകത്ത് വലിയ മാറ്റമാണ് സൃഷ്ടിക്കുന്നത്. ആപ്പിലെ ഇൻസ്പയർ ഫീഡ് (Inspire Feed) വഴി ഉപയോക്താക്കൾക്ക് ചിത്രകല, ചരിത്ര സംഭവങ്ങൾ, സാംസ്കാരിക കഥകൾ, വാസ്തുവിദ്യ, ഫോട്ടോഗ്രാഫി തുടങ്ങിയവ വളരെ എളുപ്പത്തിൽ സ്വൈപ്പ് ചെയ്ത് കാണാൻ സാധിക്കും.
പരമ്പരാഗത സോഷ്യൽ മീഡിയകളിൽ നിന്ന് വ്യത്യസ്തമായി, ഇതിലൂടെ ഉപയോക്താക്കൾക്ക് ഓരോ നിമിഷവും പുതിയ കാര്യങ്ങൾ പഠിക്കാനും കണ്ടെത്താനും സാധിക്കുന്നുണ്ടെന്ന് വിദഗ്ധർ ചൂണ്ടിക്കാണിക്കുന്നു. യാത്രകൾ പ്ലാൻ ചെയ്യാതെ തന്നെ ലോകത്തിലെ വിവിധ നഗരങ്ങളെ അറിയാൻ സഹായിക്കുന്ന സിറ്റീസ് ടാബ് (Cities Tab) ഇതിലെ മറ്റൊരു പ്രധാന സവിശേഷതയാണ്.
കാഴ്ചകൾ, ഭക്ഷണരീതികൾ, വാസ്തുവിദ്യ, മറഞ്ഞിരിക്കുന്ന വിനോദസഞ്ചാര കേന്ദ്രങ്ങൾ എന്നിങ്ങനെ വിവിധ വിഭാഗങ്ങളായി നഗരങ്ങളെ തെരഞ്ഞെടുക്കാൻ ഇത് അവസരം നൽകുന്നു. ആർട്ടിഫിഷ്യൽ ഇന്റലിജൻസിന്റെ സഹായത്തോടെയുള്ള ഗൈഡുകളും ഇതിൽ ലഭ്യമാണ്.
പസിലുകൾ, ട്രിവിയ, ആർട്ട് സെൽഫി, ആർട്ട് ട്രാൻസ്ഫർ തുടങ്ങിയ ഫീച്ചറുകളുള്ള പ്ലേ ടാബ് (Play Tab) ഉപയോക്താക്കൾക്ക് സംവേദനാത്മക അനുഭവം പ്രദാനം ചെയ്യുന്നു. കൂടാതെ, ലോകപ്രശസ്തമായ ബ്രിട്ടീഷ് മ്യൂസിയം (British Museum), ലൂവർ (Louvre) തുടങ്ങിയ ആയിരക്കണക്കിന് മ്യൂസിയങ്ങളിലെ കലാരൂപങ്ങൾ അതിശയിപ്പിക്കുന്ന ഹൈ-റെസല്യൂഷനിൽ വീടിനുള്ളിലിരുന്ന് തന്നെ ആസ്വദിക്കാനും വെർച്വൽ ടൂർ നടത്താനും ഈ ആപ്പ് വഴി സാധിക്കും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
