സൗദിയിൽ മയക്കുമരുന്ന് കേസിൽ കുടുങ്ങിയ പ്രവാസി മലയാളിക്ക് മോചനം; ഇരുപത് വർഷത്തെ തടവുശിക്ഷയൊഴിവായത് നിയമപോരാട്ടത്തിനൊടുവിൽ

റിയാദ്: സ്പോൺസറുടെ മകന്റെ നിർദേശപ്രകാരം കടയിലെത്തിയ പാർസൽ ഏറ്റുവാങ്ങി സൂക്ഷിച്ചതിന്റെ പേരിൽ സൗദി അറേബ്യയിൽ മയക്കുമരുന്ന് കേസിൽ കുടുങ്ങി 20 വർഷത്തെ തടവുശിക്ഷ നേരിടേണ്ടിവന്ന പ്രവാസി ഇന്ത്യക്കാരന് ആശ്വാസ മോചനം. കേളി കലാ സാംസ്കാരിക വേദിയുടെ ശക്തമായ നിയമപോരാട്ടത്തിനൊടുവിലാണ് ഉത്തർപ്രദേശ് സ്വദേശിയായ മുഹമ്മദ് ഷംസിന്റെ നിരപരാധിത്വം കോടതിയിൽ തെളിയിക്കാനായത്.

ഗൾഫ് രാജ്യങ്ങളിൽ ജോലിക്കായെത്തുന്ന പ്രവാസികൾക്ക് വലിയൊരു മുന്നറിയിപ്പുകൂടിയാണ് ഈ സംഭവം. അൽഖർജ് മേഖലയിൽ പിതാവും മകനും ചേർന്ന് നടത്തുന്ന വക്കാലയിലാണ് കേസിനാസ്പദമായ സംഭവം നടന്നത്.

സ്ഥാപനത്തിൽ ജീവനക്കാരനായിരുന്ന മുഹമ്മദ് ഷംസിനെ സ്പോൺസറുടെ മൂത്ത മകൻ ഫോണിൽ വിളിച്ച് കടയ്ക്ക് മുന്നിൽ ഒരു വാഹനം എത്തിയിട്ടുണ്ടെന്നും അതിലുള്ള സാധനങ്ങൾ സ്ഥാപനത്തിനുള്ളിലേക്ക് മാറ്റി സൂക്ഷിക്കണമെന്നും നിർദേശിക്കുകയായിരുന്നു. പരിചയമുള്ളവരുടെ വാക്ക് വിശ്വസിച്ച് തൊഴിലാളികൾ പാർസൽ കടയ്ക്കുള്ളിൽ ഇറക്കിവെച്ചെങ്കിലും, അതിൽ മയക്കുമരുന്നായിരുന്നുവെന്ന കാര്യം ഇവർ അറിഞ്ഞിരുന്നില്ല.

പിന്നീട് സ്ഥലത്തെത്തിയ സിഐഡി സംഘം നടത്തിയ പരിശോധനയിലാണ് പാർസലിൽ മയക്കുമരുന്നാണെന്ന് വ്യക്തമായത്. സ്പോൺസറുടെ മകന്റെ നിർദേശപ്രകാരമാണ് സാധനങ്ങൾ ഏറ്റുവാങ്ങിയതെന്ന് തൊഴിലാളികൾ വിശദീകരിച്ചതിനെ തുടർന്ന്, ആ നമ്പറിലേക്ക് തിരികെ വിളിക്കാൻ ഉദ്യോഗസ്ഥർ ആവശ്യപ്പെട്ടു.

എന്നാൽ ഫോണിൽ സംസാരിച്ചത് മൂത്ത മകനല്ല, ഇളയ മകനായിരുന്നുവെന്ന് അന്വേഷണത്തിൽ തെളിഞ്ഞു. ഇയാളെ കസ്റ്റഡിയിലെടുത്ത് നടത്തിയ പരിശോധനയിൽ വീട്ടിൽനിന്നും സമാനമായ മയക്കുമരുന്ന് വസ്തുക്കൾ കണ്ടെത്തി.

ഇതോടെ കടയിലുണ്ടായിരുന്ന രണ്ട് ജീവനക്കാരെയും പോലീസ് കസ്റ്റഡിയിലെടുക്കുകയായിരുന്നു. സംഭവസമയത്ത് നാട്ടിലായിരുന്ന പിതാവ് വിവരമറിഞ്ഞ് അടിയന്തരമായി അവധി റദ്ദാക്കി സൗദിയിലെത്തി.

മകൻ നിരപരാധിയാണെന്ന് അധികൃതരെ ബോധ്യപ്പെടുത്താൻ ശ്രമിച്ചെങ്കിലും കോടതി 20 വർഷത്തെ തടവുശിക്ഷ വിധിച്ചതോടെ കുടുംബം വലിയ പ്രതിസന്ധയിലായി. ഈ ഘട്ടത്തിലാണ് കേളി കലാ സാംസ്കാരിക വേദി വിഷയത്തിൽ ഇടപെടുന്നത്.

തടവിലായ പ്രവാസിയുടെ പിതാവ് അൻസാരി സഹായ അഭ്യർത്ഥനയുമായി സമീപിച്ചതിനെ തുടർന്ന്, കേളി ജീവകാരുണ്യ വിഭാഗം ജോയിന്റ് കൺവീനർ നാസർ പൊന്നാനിയുടെ നേതൃത്വത്തിൽ നിയമനടപടികൾ ആരംഭിച്ചു. ഇന്ത്യൻ എംബസി മുഖേന ജയിൽ സന്ദർശനത്തിനും നിയമസഹായത്തിനുമുള്ള അനുമതിപത്രം നേടിയെടുത്തു.

തുടർന്ന് എട്ടുമാസത്തോളം കേസുമായി ബന്ധപ്പെട്ട തെളിവുകളും രേഖകളും ശേഖരിച്ച് അഭിഭാഷകൻ വഴി കോടതിയിൽ പുതിയ ഹർജി സമർപ്പിച്ചു.

നാലുമാസം നീണ്ട നിയമപോരാട്ടത്തിനൊടുവിൽ കേസ് വീണ്ടും പരിഗണിച്ച കോടതി പ്രതി കുറ്റക്കാരനല്ലെന്ന് ബോധ്യപ്പെട്ടതിനെ തുടർന്ന് മുഹമ്മദ് ഷംസിനെ പൂർണമായി മോചിപ്പിക്കാൻ ഉത്തരവിടുകയായിരുന്നു.

മറ്റൊരാളുടെ നിർദേശപ്രകാരം എത്തുന്ന പാർസലുകൾ ഏറ്റുവാങ്ങുന്നതും സൂക്ഷിക്കുന്നതും എത്രത്തോളം അപകടകരമായ നിയമപ്രശ്നങ്ങളിലേക്ക് നയിക്കാമെന്നതിന്റെ തെളിവാണ് ഈ കേസ്. സൗദി അറേബ്യയിൽ മയക്കുമരുന്നുമായി ബന്ധപ്പെട്ട

കുറ്റകൃത്യങ്ങൾക്ക് അതീവ ഗുരുതരമായ ശിക്ഷയാണ് നൽകുന്നത്. പാർസലിലുള്ള വസ്തുക്കളെക്കുറിച്ച് അറിവില്ലായിരുന്നു എന്ന വിശദീകരണം മാത്രം പലപ്പോഴും നിയമപരമായ ശിക്ഷയിൽനിന്ന് രക്ഷപ്പെടാൻ പ്രാപ്തമാകണമെന്നില്ല.

ഒരു പാർസൽ ഏറ്റുവാങ്ങിയതിന്റെ പേരിൽ 20 വർഷത്തെ തടവുശിക്ഷ നേരിടേണ്ടിവന്ന ഒരു പ്രവാസിയുടെ ജീവിതത്തിലേക്ക് പ്രതീക്ഷ തിരിച്ചെത്തിക്കാൻ കേളിയുടെ ഇടപെടലിലൂടെ സാധിച്ചു. പ്രവാസികൾ നേരിടുന്ന അടിയന്തര സാഹചര്യങ്ങളിൽ സാമൂഹിക സംഘടനകൾ നൽകുന്ന നിയമസഹായത്തിന്റെയും കൂട്ടായ പരിശ്രമങ്ങളുടെയും പ്രസക്തി കൂടി വ്യക്തമാക്കുന്നതാണ് ഈ സംഭവം.