ദക്ഷിണാഫ്രിക്കയ്‌ക്കെതിരായ നിര്‍ണായകമായ മൂന്നാം ടെസ്റ്റിന് മുന്നോടിയായി ഓപ്പണര്‍ നിക് മാഡിന്‍സണെ ഓസ്‌ട്രേലിയ നാട്ടിലേക്ക് മടക്കിയയച്ചു. ദീർഘകാലത്തെ ഇടവേളയ്ക്ക് ശേഷം റെഡ്-ബോൾ ടീമിലേക്ക് മടങ്ങിയെത്തിയ ഈ ഇടങ്കയ്യൻ ബാറ്റർ, പരമ്പരയിലെ ആദ്യ രണ്ട് മത്സരങ്ങളിലെ നിരാശാജനകമായ പ്രകടനത്തെ തുടർന്നാണ് സ്ക്വാഡിൽ നിന്നും ഒഴിവാക്കപ്പെട്ടത്.
കേപ് ടൗണിൽ വെച്ച് നടക്കുന്ന അവസാന മത്സരത്തിന് തൊട്ടുമുമ്പാണ് താരം ഓസ്ട്രേലിയയിലേക്ക് മടങ്ങിയത്. പരമ്പരയിൽ ആകെ നാല് ഇന്നിംഗ്സുകളിൽ ബാറ്റ് വീശിയ താരം, ഡർബനിൽ നടന്ന ഒന്നാം ടെസ്റ്റിന്റെ രണ്ടാം ഇന്നിംഗ്സിൽ കണ്ടെത്തിയ 48 റൺസാണ് കരിയറിലെ എടുത്തുപറയാവുന്ന മികച്ച സംഭാവന.
എന്നാൽ മറ്റ് രണ്ട് ഇന്നിംഗ്സുകളിൽ പൂജ്യത്തിന് പുറത്തായതും ടീമിന് തിരിച്ചടിയായി. മാഡിന്‍സണ്‍ ഓപ്പണറുടെ റോളിലേക്ക് എത്തിയതോടെ മാത്യൂ റെന്‍ഷോയ്ക്ക് ബാറ്റിംഗ് നിരയില്‍ അഞ്ചാം നമ്പറിലേക്ക് മാറേണ്ടി വന്നിരുന്നു.
നിക് മാഡിന്‍സണില്‍ നിന്ന് മികച്ച സംഭാവനകളാണ് ടീം പ്രതീക്ഷിച്ചിരുന്നതെന്ന് ഓസ്‌ട്രേലിയന്‍ സെലക്ഷന്‍ കമ്മിറ്റി ചെയര്‍മാന്‍ ജോര്‍ജ്ജ് ബെയ്ലി വ്യക്തമാക്കി. എങ്കിലും ന്യൂസിലന്‍ഡിനെതിരായ ഹോം സീരീസിലേക്കും തുടര്‍ന്നുള്ള ഇന്ത്യന്‍ പര്യടനത്തിലേക്കും അദ്ദേഹത്തെ പരിഗണിക്കുന്നതില്‍ നിന്ന് പൂർണ്ണമായി ഒഴിവാക്കിയിട്ടില്ലെന്നും അദ്ദേഹം കൂട്ടിച്ചേര്‍ത്തു.
കേപ് ടൗണ്‍ ടെസ്റ്റിന് മുന്‍പ് ഓസ്‌ട്രേലിയയെ അലട്ടുന്ന ഏക പ്രശ്നം മാഡിന്‍സണിന്റെ മോശം ഫോം മാത്രമല്ല. മൂന്നാം നമ്പറില്‍ ബാറ്റിംഗിനെത്തുന്ന മാര്‍നസ് ലബുഷെയ്‌ന്റെ തുടര്‍ച്ചയായ ഫോം ഇല്ലായ്മയും ടീം മാനേജ്മെന്റില്‍ ആശങ്ക സൃഷ്ടിക്കുന്നുണ്ട്.
2023-ലാണ് ലബുഷെയ്ന് അവസാനമായി ഒരു ടെസ്റ്റ് സെഞ്ച്വറി സ്വന്തമാക്കിയത്. ടീമിന് മികച്ച സ്‌കോറുകള്‍ പടുത്തുയര്‍ത്തുന്നതില്‍ ലബുഷെയ്‌ന്റെ മന്ദഗതിയിലുള്ള ബാറ്റിംഗ് തടസ്സമാകുന്നുണ്ടോ എന്ന് സെലക്ടര്‍മാര്‍ ഗൗരവമായി പരിശോധിക്കുന്നുണ്ട്.
ക്രീസില്‍ ഏറെ നേരം പിടിച്ചുനില്‍ക്കാന്‍ സാധിക്കുന്നുണ്ടെങ്കിലും സ്‌കോര്‍ ബോര്‍ഡ് ചലിപ്പിക്കുന്നതില്‍ പരാജയപ്പെടുന്നത് വലിയ ആശങ്കയാണെന്ന് ജോര്‍ജ്ജ് ബെയ്ലി സമ്മതിച്ചു. ലബുഷെയ്ന് പകരക്കാരനായി ജോഷ് ഇംഗ്ലിസിനെ മൂന്നാം നമ്പറിലേക്ക് പരിഗണിക്കാന്‍ സാധ്യത കൽപ്പിക്കപ്പെടുന്നുണ്ട്.
അങ്ങനെയെങ്കില്‍ കഴിഞ്ഞ ഓഗസ്റ്റില്‍ ബംഗ്ലാദേശിനെതിരായ മത്സരത്തിൽ തിളങ്ങിയ കാമറൂണ്‍ ഗ്രീന്‍ വീണ്ടും തന്റെ സ്ഥിരം സ്ഥാനമായ അഞ്ചാം നമ്പറിലേക്ക് തിരിച്ചെത്തും. മൂന്നാം ടെസ്റ്റിനുള്ള ഓസ്‌ട്രേലിയന്‍ സ്‌ക്വാഡ്: പാറ്റ് കമ്മിന്‍സ് (ക്യാപ്റ്റന്‍), സ്‌കോട്ട് ബോളണ്ട്, അലക്‌സ് ക്യാരി, കൂപ്പര്‍ കൊനോലി, കാമറൂണ്‍ ഗ്രീന്‍, ജോഷ് ഹാസല്‍വുഡ്, ട്രെവിസ് ഹെഡ്, ജോഷ് ഇംഗ്ലിസ്, മാത്യൂ കുനെമാന്‍, മാര്‍നസ് ലബുഷെയ്ന്, നഥാന്‍ ലിയോണ്‍, മൈക്കല്‍ നെസര്‍, മാത്യൂ റെന്‍ഷോ, സ്റ്റീവ് സ്മിത്ത്, മിച്ചല്‍ സ്റ്റാര്‍ക്ക്, ബ്യൂ വെബ്സ്റ്റര്‍.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
