മദ്യലഹരിയിൽ ജെറ്റ് വിമാനം പറത്തി; റൺവേയിൽ നിന്നും തെന്നിമാറി തീപിടിത്തം, പൈലറ്റുമാർ അറസ്റ്റിൽ

പുതുപുത്തൻ സ്വകാര്യ ജെറ്റ് വിമാനം റൺവേയിൽ നിന്നും തെന്നിമാറി തീപിടിച്ച സംഭവത്തിൽ‌, മദ്യപിച്ച് വിമാനം പറത്തിയതിനു ക്യാപ്റ്റൻ ഉൾപ്പെടെ രണ്ട് പൈലറ്റുമാർ അറസ്റ്റിൽ. ലിബിയയിലെ വടക്കുപടിഞ്ഞാറൻ നഗരമായ മിസ്രാത്ത രാജ്യാന്തര വിമാനത്താവളത്തിൽ ആയിരുന്നു ഈ ഗുരുതര സുരക്ഷാ വീഴ്ച ഉണ്ടായത്.

പൈലറ്റുമാരുടെ പേരുവിവരങ്ങൾ അധികൃതർ ഔദ്യോഗികമായി പുറത്തുവിട്ടിട്ടില്ലെങ്കിലും, ഇരുവരും പൂർണ്ണ മദ്യലഹരിയിലായിരുന്നുവെന്ന് പ്രാഥമിക പരിശോധനകളിൽ സ്ഥിരീകരിച്ചിട്ടുണ്ട്. തുർക്കിയിലെ ഇസ്താംബുളിൽ നിന്നും ലിബിയയിലുള്ള വിഐപി യാത്രക്കാരെ കൂട്ടിക്കൊണ്ടുവരുന്നതിനായി യാതൊരുവിധ യാത്രക്കാരുമില്ലാതെ പറന്ന വിമാനമാണ് അപകടത്തിൽപ്പെട്ടത്.

2026ൽ നിർമിച്ച അത്യാധുനിക വിഭാഗത്തിൽ പെടുന്നതാണ് ഈ വിമാനമെന്ന് ന്യൂയോർക്ക് പോസ്റ്റ് റിപ്പോർട്ട് ചെയ്യുന്നു. സംഭവസമയം വിമാനത്തിലുണ്ടായിരുന്ന ജർമൻ സ്വദേശിയായ ക്യാപ്റ്റൻ, തുർക്കി സ്വദേശിയായ കോ പൈലറ്റ്, കൂടാതെ ഒരു ഫ്ലൈറ്റ് അറ്റൻഡന്റ് എന്നിവർ പരുക്കുകൾ ഒന്നും ഏൽക്കാതെ അത്ഭുതകരമായാണ് രക്ഷപ്പെട്ടത്.

അപകടത്തെ തുടർന്നുണ്ടായ ശക്തമായ തീപിടിത്തത്തിൽ വിമാനത്തിന്റെ കോക്ക്പിറ്റ് ഒഴികെയുള്ള പ്രധാന ഭാഗങ്ങളെല്ലാം പൂർണമായും കത്തിനശിച്ചു. സംഭവത്തിൽ ആവശ്യമായ പ്രാഥമിക അന്വേഷണങ്ങൾ പൂർത്തിയാക്കിയതിനു ശേഷം പൈലറ്റുമാരെ ജുഡീഷ്യൽ കസ്റ്റഡിയിലേക്ക് മാറ്റാൻ ലിബിയൻ പബ്ലിക് പ്രോസിക്യൂട്ടർ കർശന ഉത്തരവ് പുറപ്പെടുവിച്ചു.

വിമാനം പറത്തുന്ന വേളയിൽ പൈലറ്റുമാർ മദ്യം ഉപയോഗിച്ചിരുന്നതിന് വ്യക്തമായ തെളിവുകൾ ലഭിച്ചതായി അന്വേഷണ ഉദ്യോഗസ്ഥർ വ്യക്തമാക്കിയിട്ടുണ്ട്. ഇവരുടെ ഭാഗത്തുനിന്നുമുണ്ടായ ഈ വലിയ അശ്രദ്ധ വിമാനത്താവളത്തിനും ജീവനക്കാർക്കും ആകെ വ്യോമമേഖലയ്ക്കും തന്നെ കടുത്ത സുരക്ഷാ ഭീഷണിയാണ് സൃഷ്ടിച്ചതെന്നും അന്വേഷണ സംഘം വിലയിരുത്തുന്നു.

അതേസമയം, പ്രസ്തുത വിമാനം നിയന്ത്രിച്ചിരുന്ന തുർക്കിയിലെ ചാർട്ടർ ഓപ്പറേറ്ററായ ബികെഎൻ ജെറ്റ് ഏവിയേഷൻ കമ്പനി ഈ ആരോപണങ്ങൾ പൂർണ്ണമായും നിഷേധിച്ചു. പൈലറ്റുമാർ മദ്യപിച്ചിരുന്നതായി സ്ഥിരീകരിക്കുന്ന തരത്തിലുള്ള ഔദ്യോഗിക രേഖകളോ മെഡിക്കൽ പരിശോധനാ ഫലങ്ങളോ തങ്ങൾക്ക് ലഭിച്ചിട്ടില്ലെന്നാണ് കമ്പനിയുടെ വിശദീകരണം.

വിമാനാപകടത്തെ തുടർന്ന് വിമാനത്താവളത്തിലെ റൺവേയിൽ ചിതറിക്കിടക്കുന്ന അവശിഷ്ടങ്ങൾ നീക്കം ചെയ്യുന്നതിനായി വ്യോമ സർവീസുകൾ താൽക്കാലികമായി നിർത്തിവച്ചിരിക്കുകയാണ്.