ഓണക്കാലത്ത് കേരളത്തിൽ ട്രെൻഡായി ലൈറ്റ് വെയ്റ്റ് ആഭരണങ്ങൾ: എം.പി. അഹമ്മദ്

സംസ്ഥാനത്ത് ഈ ഓണക്കാലത്ത് വിപണിയിൽ ഏറ്റവുമധികം ആവശ്യക്കാരുള്ളത് ഭാരം കുറഞ്ഞ സ്വർണാഭരണങ്ങൾക്കാണെന്ന് മലബാർ ഗോൾഡ് ആൻഡ് ഡയമണ്ട്സ് ചെയർമാൻ എം.പി. അഹമ്മദ് വ്യക്തമാക്കി.

പുതുതലമുറയും വിശേഷിച്ചും ജെൻസിയും തങ്ങളുടെ വസ്ത്രധാരണത്തിന് അനുയോജ്യമായ ആഭരണങ്ങൾ തിരഞ്ഞെടുക്കാനാണ് താൽപ്പര്യപ്പെടുന്നത്. മുൻകാലങ്ങളെ അപേക്ഷിച്ചു വിലയിൽ വർധനവുണ്ടായിട്ടുണ്ടെങ്കിലും സ്വർണം വാങ്ങുന്നവരുടെ എണ്ണത്തിൽ യാതൊരു കുറവും വന്നിട്ടില്ലെന്നും അദ്ദേഹം ഒരു മാധ്യമത്തിന് നൽകിയ അഭിമുഖത്തിൽ ചൂണ്ടിക്കാട്ടി.

വില വർധനവും വിപണിയും
സ്വർണവിപണി നിലവിൽ വളരെ മികച്ച രീതിയിലാണ് മുന്നോട്ടുപോകുന്നത്. വിവാഹ സീസണും ഓണക്കാലവും ഒരുമിച്ചെത്തുന്ന ഈ ഘട്ടത്തിൽ സമ്മാനങ്ങൾ നൽകുന്ന പ്രവണതയും വ്യാപകമാണ്.

ഇത് തന്നെയാണ് വിപണിയുടെ പ്രധാന പ്രതീക്ഷയും. സ്വർണം വാങ്ങുന്നവരുടെ എണ്ണത്തിലും ബില്ലിങ് കൗണ്ടുകളിലും വർധനവുണ്ടായിട്ടുണ്ടെങ്കിലും, വില കൂടിയതു കാരണം വാങ്ങുന്ന അളവിൽ (ഗ്രാമിൽ) കുറവുണ്ടായിട്ടുണ്ടെന്ന് എം.പി.

അഹമ്മദ് പറഞ്ഞു. പുതുതലമുറയുടെ ചോയ്സ്
ലൈറ്റ് വെയ്റ്റ് ആഭരണങ്ങൾക്കാണ് വിപണിയിൽ ഇപ്പോൾ ഏറ്റവും കൂടുതൽ ഡിസൈൻ ആവശ്യക്കാരുള്ളത്.

ജെൻസി വിഭാഗത്തിൽപെട്ടവർ വസ്ത്രങ്ങൾക്ക് ഇണങ്ങുന്ന ആഭരണങ്ങൾക്കാണ് മുൻഗണന നൽകുന്നത്. ഓരോ പ്രത്യേക ചടങ്ങുകൾക്കും അനുയോജ്യമായ വസ്ത്രങ്ങളും ആഭരണങ്ങളും ഒപ്പത്തിനൊപ്പം വേണമെന്നത് ഇന്നത്തെ പ്രധാന ട്രെൻഡായി മാറിക്കഴിഞ്ഞു.

വജ്രത്തോടും സ്വർണത്തോടും ഒരുപോലെ താൽപ്പര്യമുള്ള പുതിയ തലമുറയിൽ വെസ്റ്റേൺ സ്വാധീനം വ്യക്തമായി കാണാൻ സാധിക്കും. വസ്ത്രങ്ങളിലെന്ന പോലെ ആഭരണങ്ങളിലും ഈ സ്വാധീനം പ്രകടമാണ്.

മലബാർ ഗോൾഡിന് കീഴിൽ ഇരുനൂറോളം ഡിസൈനർമാർ പ്രവർത്തിക്കുന്നുണ്ട്. ഓണം ഉൾപ്പെടെയുള്ള ഓരോ സാംസ്കാരിക അവസരങ്ങൾക്കും അനുയോജ്യമായ ഡിസൈനുകളിൽ ആഭരണങ്ങൾ ഒരുക്കാൻ കമ്പനിയുടെ ഡിസൈൻ സ്റ്റുഡിയോയ്ക്ക് സാധിക്കുന്നുണ്ടെന്നും അദ്ദേഹം കൂട്ടിച്ചേർത്തു.

കുറഞ്ഞ ചെലവിൽ സ്വർണം വാങ്ങാൻ ചില ടിപ്പുകൾ
സ്വർണവില ഭാവിയിലും കുറയാൻ സാധ്യതയില്ലെന്നും, വില കുറഞ്ഞുകിട്ടണമെങ്കിൽ കൃത്രിമത്വം കാണിക്കേണ്ടിവരുമെന്നും എം.പി. അഹമ്മദ് അഭിപ്രായപ്പെട്ടു.

22 കാരറ്റ് സ്വർണത്തെ അപേക്ഷിച്ച് വിലക്കുറവുള്ള 18 കാരറ്റ്, 14 കാരറ്റ് ആഭരണങ്ങൾ വാങ്ങുന്നവരുടെ എണ്ണം ഇപ്പോൾ വർധിച്ചുവരുന്നുണ്ട്. ഗോൾഡ് സ്കീമുകളിൽ ചേർന്നും കുറഞ്ഞ ചെലവിൽ ഉപഭോക്താക്കൾക്ക് സ്വർണം സ്വന്തമാക്കാം.

ഇടത്തരം കുടുംബങ്ങൾക്ക് ഏറെ പ്രയോജനപ്പെടുന്ന ഈ പദ്ധതിയിലൂടെ ലക്ഷക്കണക്കിന് ആളുകളാണ് മലബാർ ഗോൾഡിൽ ആനുകൂല്യങ്ങൾ നേടുന്നത്. ഇത്തരം പദ്ധതികൾ വഴി പണിക്കൂലിയിൽ ഉൾപ്പെടെ വലിയ ഇളവുകൾ സ്വന്തമാക്കാൻ സാധിക്കും.

വ്യാപാരവും വിപണിയും
കേരളത്തിൽ പ്രതിവർഷം ഒരു ലക്ഷം കോടി രൂപയുടെയല്ല, മറിച്ച് കുറഞ്ഞത് രണ്ട് ലക്ഷം കോടി രൂപയുടെയെങ്കിലും സ്വർണവ്യാപാരം നടക്കുന്നുണ്ട്. മലബാർ ഗോൾഡിന്റെ മാത്രം വിറ്റുവരവ് 12,000 കോടി രൂപയിലേറെ വരും.

സംസ്ഥാനത്ത് ആകെ 12,000ത്തോളം ജ്വല്ലറികളാണ് പ്രവർത്തിക്കുന്നത്. ഇതിൽ മൊത്തം വാർഷിക വിൽപനയുടെ അഞ്ച് മുതൽ പത്ത് ശതമാനം വരെയാണ് ഓണക്കാലത്ത് നടക്കുന്നത്.

അതേസമയം, നികുതി വെട്ടിച്ചുള്ള സമാന്തര വിപണി കേരളത്തിൽ ശക്തമാണെന്നും, അതിനെ പ്രതിരോധിക്കാനും നിയമപരമായി വ്യാപാരം നടത്തുന്നവരെ സംരക്ഷിക്കാനും സർക്കാർതലത്തിൽ നടപടികൾ ഉണ്ടാകണമെന്നും അദ്ദേഹം ആവശ്യപ്പെട്ടു. പൊതുജനങ്ങൾക്കുള്ള ജാഗ്രതാ നിർദേശം
സ്വർണം വെറുമൊരു ആഭരണം മാത്രമല്ല, മറിച്ച് സുരക്ഷിതമായ ഒരു നിക്ഷേപം കൂടിയാണെന്ന് എം.പി.

അഹമ്മദ് ഓർമിപ്പിച്ചു. ലോകമെമ്പാടും മൂല്യമുള്ള കട്ടിയുള്ള കറൻസിയായാണ് (ഹാർഡ് കറൻസി) സ്വർണം കണക്കാക്കപ്പെടുന്നത്.

അതുകൊണ്ടുതന്നെ ജനങ്ങൾ സ്വർണം വാങ്ങുന്നതിൽ യാതൊരു കുറവും വരുത്തിയിട്ടില്ല. എന്നാൽ, ആരും കടം വാങ്ങി സ്വർണം വാങ്ങാൻ മുതിരരുതെന്നും അദ്ദേഹം മുന്നറിയിപ്പ് നൽകി.

നിലവിൽ ഡ്യൂപ്ലിക്കേറ്റ് സ്വർണവും വ്യാജ ഹോൾമാർക്കും വിപണിയിൽ സജീവമായതിനാൽ തട്ടിപ്പുകൾക്കെതിരെ ജനങ്ങൾ കനത്ത ജാഗ്രത പാലിക്കേണ്ടതുണ്ട്.