ജയസൂര്യയുടെ ‘മായൻ’ വിദേശ ഷെഡ്യൂൾ പൂർത്തിയായി; അടുത്ത ഘട്ടം കേരളത്തിൽ

നടൻ ജയസൂര്യയെ നായകനാക്കി ജിതിൻ കെ ജോസ് സംവിധാനം ചെയ്യുന്ന പുതിയ ചിത്രമായ ‘മായൻ’ എന്ന സിനിമയുടെ വിദേശ ഷെഡ്യൂൾ ചിത്രീകരണം വിജയകരമായി പൂർത്തിയായി. റഷ്യയിൽ ആരംഭിച്ച അന്താരാഷ്ട്ര ഷെഡ്യൂളാണ് ഇപ്പോൾ പൂർത്തിയായിരിക്കുന്നത്.

തുടർന്നുള്ള ചിത്രീകരണം കേരളത്തിലാണ് നടക്കാനിരിക്കുന്നത്. മമ്മൂട്ടി നായകനായ ‘കളങ്കാവൽ’ എന്ന ചിത്രത്തിലൂടെ ശ്രദ്ധേയനായ സംവിധായകനൊപ്പം ജയസൂര്യ ഒന്നിക്കുന്നു എന്ന പ്രത്യേകതയും ഈ പ്രൊജക്റ്റിനുണ്ട്.

ജൂലൈ അവസാനം റഷ്യയിലാണ് ചിത്രത്തിന്റെ വിദേശ ഷെഡ്യൂൾ ആരംഭിച്ചത്. സിനിമയുടെ പ്രധാന ഭാഗങ്ങളിൽ ഒന്നാണ് റഷ്യൻ പശ്ചാത്തലത്തിൽ ചിത്രീകരിച്ചത്.

മിസ്റ്ററി ആക്ഷൻ ത്രില്ലർ വിഭാഗത്തിൽപ്പെടുന്ന ഈ ചിത്രം പ്രഖ്യാപന സമയം മുതൽ തന്നെ സിനിമാപ്രേമികൾക്കിടയിൽ വലിയ ചർച്ചയായിരുന്നു. മാജിക് മൂൺ പ്രൊഡക്ഷൻസിന്റെ ബാനറിൽ പ്രശസ്ത നിർമ്മാതാവ് രാജീവ് ഗോവിന്ദൻ ആണ് ചിത്രം നിർമ്മിക്കുന്നത്.

നൈല ഉഷയാണ് ചിത്രത്തിൽ നായികയായി എത്തുന്നത്. ഇവർക്ക് പുറമെ വിജയ് ബാബു, ഐശ്വര്യ രാജ്, ജിബിൻ ഗോപിനാഥ് എന്നിവരും ചിത്രത്തിന്റെ കഥാഗതിയെ മാറ്റിമറിക്കുന്ന അതീവ പ്രാധാന്യമുള്ള വേഷങ്ങളിൽ അണിനിരക്കുന്നുണ്ട്.

വിവിധ രാജ്യങ്ങളിലേക്ക് പടർന്നുകിടക്കുന്ന പുരാതനമായ ആഭിചാര ആചാരങ്ങളുടെയും ലോകത്തിന്റെ വിവിധ കോണുകളിൽ രഹസ്യമായി പ്രവർത്തിക്കുന്ന അദൃശ്യ ശക്തികളുടെയും ഒരു ആഗോള ശൃംഖലയെ ചുറ്റിപ്പറ്റിയാണ് ‘മായൻ’ എന്ന ചിത്രത്തിന്റെ പ്രമേയം വികസിക്കുന്നത്. നൂറ്റാണ്ടുകളായി മറഞ്ഞിരിക്കുന്ന നിഗൂഢതകളുടെയും ശക്തികളുടെയും വേരുകൾ തേടിയുള്ള യാത്ര സ്വാഭാവികമായും ഇന്ത്യയുടെ അതിരുകൾക്ക് പുറത്തേക്ക് നീളുന്ന ഒന്നാണ്.

ഈ അന്താരാഷ്ട്ര ശൃംഖലയിലെ ഏറ്റവും നിർണ്ണായകമായ ഒരു അധ്യായമാണ് റഷ്യൻ പശ്ചാത്തലത്തിൽ ഒരുങ്ങുന്നത്. വെറും ഒരു ത്രില്ലർ എന്നതിനപ്പുറം, വളരെ ആഴത്തിലുള്ള വേൾഡ് ബിൽഡിംഗും ലെയറുകളുമുള്ള തിരക്കഥയാണ് ചിത്രത്തിന്റെ പ്രധാന ആകർഷണം.

പ്രേക്ഷകനെ കഥയുടെ അന്തരീക്ഷത്തിലേക്ക് പൂർണ്ണമായി ആഴ്ന്നിറക്കുന്ന ഒരു സിനിമാറ്റിക് അനുഭവമായിരിക്കും ചിത്രം സമ്മാനിക്കുകയെന്ന് അണിയറപ്രവർത്തകർ വ്യക്തമാക്കുന്നു. മലയാളത്തിലെ പ്രമുഖ തിരക്കഥാകൃത്ത് റാഫിയും സംവിധായകൻ ജിതിൻ കെ ജോസും ചേർന്ന് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നു.

സിനിമയുടെ അന്താരാഷ്ട്ര നിലവാരത്തിന് അനുയോജ്യമായ രീതിയിൽ ദൃശ്യങ്ങളും ശബ്ദവും ഒരുക്കാൻ സിനിമാമേഖലയിലെ പ്രഗത്ഭരായ സാങ്കേതിക പ്രവർത്തകരാണ് ക്യാമറയ്ക്ക് പിന്നിൽ അണിനിരന്നിരിക്കുന്നത്. പ്രശസ്ത ഛായാഗ്രാഹകൻ ഫൈസൽ അലി ചിത്രത്തിന്റെ ക്യാമറ കൈകാര്യം ചെയ്യുമ്പോൾ, മുജീബ് മജീദ് സംഗീതവും പശ്ചാത്തല സംഗീതവും നിർവ്വഹിക്കുന്നു.

പ്രവീൺ പ്രഭാകറാണ് എഡിറ്റിംഗ് കൈകാര്യം ചെയ്യുന്നത്. സുനിൽ ദാസ് ആണ് ചിത്രത്തിന്റെ പ്രൊഡക്ഷൻ ഡിസൈനർ.