പശ്ചിമേഷ്യൻ സംഘർഷം രൂക്ഷമാകുന്നു; ഇറാനെതിരെ കടുത്ത നീക്കത്തിന് യുഎസ് പ്രസിഡന്റ് ഡോണൾഡ് ട്രംപ്

ആഗോള തലത്തിൽ വ്യാപാര മേഖലയെ അനിശ്ചിതത്വത്തിലേക്ക് തള്ളിവിട്ടുകൊണ്ട് പശ്ചിമേഷ്യൻ പ്രതിസന്ധി ചെങ്കടലിലേക്കും വ്യാപിച്ച് ഗുരുതരമായി തുടരുന്നു. ഈ പശ്ചാത്തലത്തിൽ നിർണായക പ്രഖ്യാപനവുമായി യുഎസ് പ്രസിഡന്റ് ഡോണൾഡ് ട്രംപ് രംഗത്തെത്തി.

ഇറാനെതിരെ അതിശക്തമായ സൈനിക നടപടി സ്വീകരിക്കുന്നതിനുള്ള തീരുമാനം അധികം വൈകാതെ ഉണ്ടാകുമെന്ന് അദ്ദേഹം വ്യക്തമാക്കി. ഇതുവരെ ഇറാൻ വലിയ തോതിലുള്ള പ്രതിസന്ധികൾ അനുഭവിച്ചിട്ടില്ലെന്നും, മുൻപ് ഒരിക്കലും കണ്ടിട്ടില്ലാത്ത വിധത്തിലുള്ള വലിയ തിരിച്ചടിക്ക് അമേരിക്ക ഒരുങ്ങുകയാണെന്നും അദ്ദേഹം മുന്നറിയിപ്പ് നൽകി.

മേഖലയിൽ സമാധാനം പുനഃസ്ഥാപിക്കുന്നതിനായി പാക്കിസ്ഥാന്റെ നേതൃത്വത്തിൽ വിവിധ തലങ്ങളിൽ ചർച്ചകൾ നടക്കുന്നുണ്ടെന്ന റിപ്പോർട്ടുകൾ പുറത്തുവരുന്നതിനിടയിലാണ് ട്രംപിന്റെ ഈ പ്രസ്താവന. അടുത്തിടെ ഇറാൻ ആഭ്യന്തര മന്ത്രി ഇസ്കന്ദർ മൊമേനി പാക്കിസ്ഥാൻ സന്ദർശിച്ചിരുന്നു.

ഈ സംഭവവികാസങ്ങൾ താൽക്കാലികമായെങ്കിലും ആഗോള വിപണിയിൽ സമാധാനാന്തരീക്ഷം സൃഷ്ടിക്കുമെന്ന പ്രതീക്ഷയിലാണ് നിക്ഷേപകർ. ഇന്ത്യൻ വിപണിയുടെ പ്രവർത്തന സമയം അവസാനിച്ചതിനു ശേഷം പുറത്തുവന്ന ഇത്തരം വാർത്തകൾ യുഎസ് ഓഹരി സൂചികകളിൽ നേരിയ മുന്നേറ്റമുണ്ടാക്കാൻ സഹായിച്ചു.

കൂടാതെ ക്രൂഡോയിൽ വിലയിൽ ഇടിവും സ്വർണവിലയിൽ നേരിയ വർധനവും രേഖപ്പെടുത്തി. നിയമക്കുരുക്കിൽ പെട്ട് യുഎസ് ഭരണകൂടം
ഇന്ത്യ ഉൾപ്പെടെയുള്ള രാജ്യങ്ങളുടെ മേൽ പുതിയ വ്യാപാര തീരുവകൾ പ്രഖ്യാപിച്ചതിന് പിന്നാലെ ട്രംപിന്റെ തീരുമാനത്തിനെതിരെ വ്യാപാരികൾ കോടതിയെ സമീപിച്ചു.

മുൻപ് ട്രംപ് ഭരണകൂടം നടപ്പിലാക്കിയ പ്രതികാര തീരുവ യുഎസ് കോടതി മുമ്പ് റദ്ദാക്കിയിരുന്നു. സമാനമായ രീതിയിൽ ഇപ്പോഴത്തെ പുതിയ തീരുവയും നിയമപരമായി ചോദ്യം ചെയ്യപ്പെടുമെന്ന പ്രതീക്ഷയിലാണ് വ്യവസായ ലോകം.

താൽക്കാലികമായി ഏർപ്പെടുത്തിയിരുന്ന 10 ശതമാനം തീരുവയുടെ കാലാവധി അവസാനിച്ചതിനെ തുടർന്നാണ് ഇന്ത്യ അടക്കമുള്ള 80-ലധികം രാജ്യങ്ങൾക്ക് മേൽ യുഎസ് പുതിയ തീരുവ ചുമത്തിയത്. ഫലത്തിൽ മുൻപ് നിലവിലുണ്ടായിരുന്ന 10 ശതമാനം തീരുവയുടെ ഭാരം മാറ്റമില്ലാതെ തുടരുകയാണ്.

യുഎസ് ട്രേഡ് ആക്ടിലെ 301-ാം വകുപ്പ് പ്രകാരം നിർബന്ധിത തൊഴിൽ സാഹചര്യങ്ങളുമായി ബന്ധപ്പെട്ടാണ് പുതിയ തീരുവ ഏർപ്പെടുത്തിയിരിക്കുന്നത്. അമേരിക്കയുമായി വ്യാപാര ബന്ധമുള്ള രാജ്യങ്ങളുടെ 99.4 ശതമാനത്തിനും ഈ നിയമം ബാധകമാണ്.

കടലിൽ കപ്പലുകൾക്ക് നേരെ വ്യാപക ആക്രമണം
പശ്ചിമേഷ്യയ്ക്ക് പുറമെ യൂറോപ്പിന്റെ വിവിധ ഭാഗങ്ങളിലും എണ്ണക്കപ്പലുകൾ ലക്ഷ്യമിട്ട് ആക്രമണങ്ങൾ വർധിക്കുന്നത് കടുത്ത ആശങ്കയാണ് സൃഷ്ടിക്കുന്നത്. ഹോർമുസ് കടലിടുക്കിൽ ഇറാനും ചെങ്കടലിൽ ഹൂതി വിമതരുമാണ് ഈ ആക്രമണങ്ങൾക്ക് ചുക്കാൻ പിടിക്കുന്നത്.

അതേസമയം ഇറാനിൽ നിന്നുള്ള കപ്പലുകളെ അമേരിക്കയും ലക്ഷ്യമിടുന്നുണ്ട്. കരിങ്കടലിൽ റഷ്യയുടെ ‘ഡാർക്ക് ഫ്ലീറ്റിന്റെ’ ഭാഗമായ 150 ഓളം എണ്ണ-ചരക്ക് കപ്പലുകൾക്ക് നേരെ ആക്രമണം ഉണ്ടായതായി യുക്രെയ്നും വ്യക്തമാക്കുന്നു.

റഷ്യയും യുക്രെയ്നുമായി ബന്ധപ്പെട്ട കപ്പലുകളെ ലക്ഷ്യമിടുന്നുണ്ട്.

വിവിധ സമുദ്രപാതകളിൽ കപ്പലുകൾ നേരിടുന്ന ഈ തുടർച്ചയായ ആക്രമണങ്ങൾ ക്രൂഡോയിൽ വിപണിയെയും ആഗോള വ്യാപാരത്തെയും ഗുരുതരമായി ബാധിക്കുമെന്ന് സാമ്പത്തിക വിദഗ്ധർ വിലയിരുത്തുന്നു. നിലവിലെ സ്ഥിതി തുടർന്നാൽ ക്രൂഡോയിൽ വില 2008-ൽ രേഖപ്പെടുത്തിയ എക്കാലത്തെയും ഉയർന്ന നിരക്കായ ബാരലിന് 148 ഡോളർ എന്ന നിലവാരം മറികടന്ന് കുതിച്ചുയരാൻ സാധ്യതയുണ്ട്.

കനത്ത നഷ്ടം നേരിട്ട് ഇന്ത്യൻ വിപണി
കഴിഞ്ഞ ആഴ്ചയിലെ അഞ്ച് വ്യാപാര ദിവസങ്ങളിലും ഇന്ത്യൻ ഓഹരി വിപണിക്ക് കനത്ത തിരിച്ചടിയാണ് നേരിടേണ്ടി വന്നത്. പശ്ചിമേഷ്യയിലെ യുദ്ധസമാനമായ അന്തരീക്ഷം മുറുകിയതാണ് വിപണിയെ തകർച്ചയിലേക്ക് നയിച്ചത്.

* കഴിഞ്ഞ അഞ്ച് വ്യാപാരദിനങ്ങളിലായി സെൻസെക്‌സ് 2091 പോയിന്റ് (2.7%) ആണ് ഇടിഞ്ഞത്.
* നിഫ്റ്റി സൂചികയാകട്ടെ 567 പോയിന്റും (2.33%) നഷ്ടം രേഖപ്പെടുത്തി.
* നിഫ്റ്റി ബാങ്ക് സൂചിക 3 ശതമാനവും റിയൽറ്റി സൂചിക ഏകദേശം 4 ശതമാനവുമാണ് ഈ വാരം ഇടിഞ്ഞത്.
* മുൻനിര ഓഹരിയായ എച്ച്ഡിഎഫ്സി ബാങ്കിന്റെ ഓഹരി വിലയിൽ 9.4 ശതമാനത്തിന്റെ ഇടിവുണ്ടായി. കഴിഞ്ഞ രണ്ടര വർഷത്തിനിടയിലെ ഏറ്റവും ശക്തമായ തിരിച്ചടിയാണിത്.

ആക്സിസ് ബാങ്ക് ഓഹരികളും 7 ശതമാനത്തിലേറെ നഷ്ടം നേരിട്ടു.
* ഹോർമുസിന് പിന്നാലെ ചെങ്കടൽ പാതയും അടഞ്ഞതോടെ ബ്രെന്റ് ക്രൂഡോയിൽ വില ബാരലിന് 100 ഡോളർ കടന്നത് വിപണിയിൽ പ്രതിഫലിച്ചു. യുഎസ് ഏർപ്പെടുത്തിയ പുതിയ 10 ശതമാനം തീരുവയും തിരിച്ചടിയായി.
* യുഎസ് ട്രഷറി വരുമാനം 4.6 ശതമാനമായി ഉയർന്നതും ഡോളർ ശക്തി പ്രാപിച്ചതും നിക്ഷേപകരെ ഇന്ത്യൻ വിപണിയിൽ നിന്ന് പണം പിൻവലിച്ച് ഡോളറിലേക്ക് നിക്ഷേപം മാറ്റാൻ പ്രേരിപ്പിച്ചു.
* വിദേശ നിക്ഷേപകർ ഇന്ത്യൻ വിപണിയിൽ നിന്ന് ഏകദേശം 3184 കോടി രൂപയാണ് പിൻവലിച്ചത്.

കമ്പനികളുടെ മോശം പാദഫലങ്ങളും വിപണിക്ക് ആഘാതമായി.
* മൊത്തത്തിൽ അഞ്ച് ദിവസത്തിനിടെ നിക്ഷേപകർക്ക് ഉണ്ടായ നഷ്ടം അഞ്ച് ലക്ഷം കോടി രൂപയാണ്. ജൂലൈ 17-ന് വിപണി അവസാനിക്കുമ്പോൾ ബിഎസ്ഇയിൽ ലിസ്റ്റ് ചെയ്ത കമ്പനികളുടെ ആകെ വിപണി മൂല്യം 480 ലക്ഷം കോടി രൂപയായിരുന്നത്, പിന്നീട് 475 ലക്ഷം കോടി രൂപയായി കുറഞ്ഞു.
* വിപണിയുടെ ഗതി സൂചിപ്പിക്കുന്ന ഗിഫ്റ്റ് നിഫ്റ്റി നഷ്ടത്തിലാണ് ക്ലോസ് ചെയ്തത്.

തിങ്കളാഴ്ചയും വിപണി നഷ്ടത്തോടെയാകും വ്യാപാരം തുടങ്ങുക എന്നാണ് ഇത് നൽകുന്ന സൂചന. ക്രൂഡോയിൽ വില താഴ്ന്നതും സമാധാന ശ്രമങ്ങൾ പുരോഗമിക്കുന്നതും വിപണിയിൽ എന്തെങ്കിലും മാറ്റമുണ്ടാക്കുമോയെന്നാണ് നിക്ഷേപകർ ആകാംക്ഷയോടെ ഉറ്റുനോക്കുന്നത്.

നിക്ഷേപകർ ഉറ്റുനോക്കുന്ന മറ്റ് നിർണായക വിവരങ്ങൾ
വരും ദിവസങ്ങളിൽ അമേരിക്കയിൽ നിന്ന് പുറത്തുവരാനിരിക്കുന്ന ചില നിർണായക പ്രഖ്യാപനങ്ങളുടെ കാത്തിരിപ്പിലാണ് നിക്ഷേപകർ. പ്രത്യേകിച്ചും യുഎസ് ഫെഡറൽ റിസർവിന്റെ പലിശ നിരക്ക് സംബന്ധിച്ച നയവും ചെയർമാൻ ജെറോം പവൽ നടത്തുന്ന പ്രസ്താവനകളും വിപണിക്ക് നിർണായകമാകും.

കൂടാതെ, ബാങ്ക് ഓഫ് ജപ്പാന്റെ സുപ്രധാന യോഗവും ആഗോളതലത്തിലെ പലിശ നിരക്കുകളുടെ ഗതി നിർണ്ണയിക്കുന്നതിൽ പ്രധാന പങ്കുവേവിക്കും. യുഎസ് വിപണിയുടെ അവസ്ഥ
ക്രൂഡോയിൽ വില ബാരലിന് 100 ഡോളറിൽ നിന്ന് താഴേക്ക് ഇറങ്ങിയതോടെ യുഎസ് വിപണി സൂചികകൾ വെള്ളിയാഴ്ച ചെറിയ തോതിൽ നേട്ടമുണ്ടാക്കി.

എന്നിരുന്നാലും, ആഴ്ചയിലെ മൊത്തത്തിലുള്ള കണക്കുകൾ പരിശോധിച്ചാൽ സൂചികകൾ നഷ്ടത്തിലാണ് അവസാനിച്ചത്. ആപ്പിൾ ഓഹരികളുടെ മുന്നേറ്റം ഡൗ ജോൺസ് സൂചികയിലുണ്ടായ നഷ്ടത്തിൽ നിന്നും ചെറിയൊരു തിരിച്ചുവരവിന് സഹായിച്ചു.

എന്നാൽ മറ്റ് ടെക്നോളജി ഓഹരികൾ നേരിട്ട തകർച്ച വിപണിയെ കടുത്ത സമ്മർദ്ദത്തിലാക്കി.

എസ് ആൻഡ് പി സൂചിക ലാഭവോ നഷ്ടമോ ഇല്ലാതെയാണ് വ്യാപാരം അവസാനിപ്പിച്ചത്. അതേസമയം നാസ്ഡാക് സൂചിക 0.64 ശതമാനം നഷ്ടത്തിലേക്ക് കൂപ്പുകുത്തി.

ക്രൂഡോയിൽ വിലയിൽ വീണ്ടും ഇടിവ്
സമാധാന ചർച്ചകളുമായി പാക്കിസ്ഥാൻ രംഗത്തുണ്ടെന്ന വാർത്തകൾ ക്രൂഡോയിൽ വില ബാരലിന് 100 ഡോളറിന് താഴെ എത്തിക്കാൻ കാരണമായി. ബ്രെന്റ് ക്രൂഡോയിൽ വില ഒരു ഘട്ടത്തിൽ നാല് ശതമാനത്തിലധികം ഇടിഞ്ഞു.

നിലവിൽ ഇത് ബാരലിന് 96.78 ഡോളറിലാണ് വ്യാപാരം അവസാനിപ്പിച്ചത്. ഡബ്ല്യുടിഐ ക്രൂഡോയിൽ ബാരലിന് 89.31 ഡോളറിലും മർബൻ ക്രൂഡോയിൽ ബാരലിന് 97.05 ഡോളറിലുമാണ് ക്ലോസ് ചെയ്തത്.

എങ്കിലും പശ്ചിമേഷ്യയിലെ സംഘർഷാവസ്ഥ തുടരുന്നത് ക്രൂഡോയിൽ വില കൂടുതൽ ഇടിയുന്നതിന് തടസ്സമായി നിൽക്കുന്നുണ്ട്.