നാഗാലാൻഡിൽ കനത്ത മഴയും ഉരുൾപൊട്ടലും: നാല് മൃതദേഹങ്ങൾ കണ്ടെടുത്തു; രക്ഷാപ്രവർത്തനം തുടരുന്നു

നാഗാലാൻഡിലെ മോൺ ജില്ലയിൽ കനത്ത മഴയെത്തുടർന്നുണ്ടായ ശക്തമായ ഉരുൾപൊട്ടലിൽ കുട്ടികൾ ഉൾപ്പെടെ എട്ടുപേർ മരിച്ചതായി സംശയിക്കുന്നു. ദുരന്തസ്ഥലത്തുനിന്ന് ഇതുവരെ നാല് മൃതദേഹങ്ങൾ കണ്ടെടുത്തതായി അധികൃതർ സ്ഥിരീകരിച്ചു.

പ്രദേശത്ത് തുടരുന്ന കനത്ത മഴയും മലവെള്ളപ്പാച്ചിലും രക്ഷാപ്രവർത്തനത്തിന് കടുത്ത വെല്ലുവിളിയാണ് ഉയർത്തുന്നത്. തകർന്ന വീടുകളുടെ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവർക്കായി വ്യാപകമായ തിരച്ചിൽ തുടരുകയാണ്.

പോലീസ്, കരസേന, സംസ്ഥാന ദുരന്തനിവാരണ സേന എന്നിവർക്കൊപ്പം തദ്ദേശീയരായ സന്നദ്ധപ്രവർത്തകരും രക്ഷാപ്രവർത്തനത്തിൽ പങ്കാളികളാകുന്നുണ്ട്. മലവെള്ളം കുത്തിയൊലിച്ചെത്തുന്നത് രക്ഷാപ്രവർത്തകരുടെ നീക്കങ്ങളെ പ്രതികൂലമായി ബാധിക്കുന്നുണ്ടെന്ന് പോലീസ് വൃത്തങ്ങൾ വ്യക്തമാക്കി.

സംസ്ഥാനത്തെ വിവിധ ഭാഗങ്ങളിൽ നിലനിൽക്കുന്ന അതിരൂക്ഷമായ കാലാവസ്ഥാ സാഹചര്യം സർക്കാർ നിരീക്ഷിച്ചുവരികയാണ്. മോൺ ജില്ലയ്ക്ക് പുറമെ മൊകോക്ചുങ് ജില്ലയിലെ തുലി സബ് ഡിവിഷനിലും ഉരുൾപൊട്ടലും പെട്ടെന്നുണ്ടായ വെള്ളപ്പൊക്കവും കാരണം റോഡ് ഗതാഗതം ഉൾപ്പെടെയുള്ളവ തടസ്സപ്പെട്ടിട്ടുണ്ട്.

ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് നാല് ലക്ഷം രൂപ വീതവും പരുക്കേറ്റവർക്ക് 74,000 രൂപ വീതവും അടിയന്തര ധനസഹായം മുഖ്യമന്ത്രി നെഫിയു റിയോ പ്രഖ്യാപിച്ചു. മലഞ്ചെരിവുകളിലും നദീതീരങ്ങളിലും ഉരുൾപൊട്ടൽ സാധ്യതയുള്ള പ്രദേശങ്ങളിലും കഴിയുന്നവർ ജാഗ്രത പാലിക്കണമെന്ന് സർക്കാർ കർശന നിർദേശം നൽകിയിട്ടുണ്ട്.

ബന്ധപ്പെട്ട എല്ലാ വകുപ്പുകളോടും അടിയന്തര സാഹചര്യങ്ങളെ നേരിടാൻ സജ്ജമായിരിക്കാൻ മുഖ്യമന്ത്രി നിർദ്ദേശിച്ചു.