കൂലി കുടിശ്ശികയിൽ നട്ടംതിരിഞ്ഞ് കൈത്തറി തൊഴിലാളികൾ: പ്രതിസന്ധി രൂക്ഷം

കരിവെള്ളൂർ ഹാൻഡ് ലൂം വീവേഴ്‌സ് ഇൻഡസ്ട്രിയൽ കോഓപ്പറേറ്റീവ് സൊസൈറ്റിയിലെ തൊഴിലാളികൾ കടുത്ത സാമ്പത്തിക പ്രതിസന്ധിയിൽ. അരനൂറ്റാണ്ടിലേറെയായി ഈ മേഖലയിൽ പ്രവർത്തിക്കുന്ന എം.അമ്പു ഉൾപ്പെടെയുള്ളവർ മാസങ്ങളായി കൂലി ലഭിക്കാതെ വലയുകയാണ്.

സ്കൂൾ കുട്ടികൾക്കുള്ള യൂണിഫോം നെയ്ത വകയിൽ വലിയൊരു തുക ഇനിയും തൊഴിലാളികൾക്ക് ലഭിക്കാനുണ്ട്. 2025 നവംബറിനു ശേഷം ഈ ഇനത്തിൽ കൂലി ലഭിച്ചിട്ടില്ലെന്ന് തൊഴിലാളികൾ ചൂണ്ടിക്കാട്ടുന്നു.

വരുമാന മാർഗ്ഗം അടഞ്ഞതോടെ നിത്യജീവിതം വഴിമുട്ടിയ അവസ്ഥയിലാണ് ഇവർ. തൊഴിൽ സാഹചര്യങ്ങൾ
നിലവിൽ ഷർട്ടിന് ഒരു മീറ്ററിന് 56.98 രൂപയും സ്യൂട്ടിങ്ങിന് 68.53 രൂപയുമാണ് കൂലിയായി നിശ്ചയിച്ചിരിക്കുന്നത്.

ഒരു തൊഴിലാളിക്ക് ദിവസേന 5 മുതൽ 7 മീറ്റർ വരെ നെയ്യാനുള്ള ശേഷിയുണ്ട്. ഉപജീവനത്തിനായി പലരും ഉച്ചയ്ക്ക് ശേഷം മറ്റ് തൊഴിലുകളിലേക്ക് തിരിയേണ്ടി വരുന്ന സാഹചര്യമാണുള്ളത്.

കുടിശ്ശികയും മറ്റ് പ്രതിസന്ധികളും
2019 ഏപ്രിൽ മുതൽ ലഭിക്കേണ്ട പ്രൊഡക്ഷൻ ഇൻസെൻന്റീവ് തുകയും മുടങ്ങിക്കിടക്കുകയാണ്.

നിശ്ചിത അളവിലധികം നെയ്തെടുക്കുന്ന തൊഴിലാളികൾക്ക് ലഭിക്കേണ്ട ഈ ആനുകൂല്യം പലർക്കും ഒരു ലക്ഷം രൂപയ്ക്ക് മുകളിലാണ് കുടിശ്ശികയുള്ളത്.

കൂലിയുടെ അനിശ്ചിതത്വം കാരണം പുതിയ തലമുറ ഈ മേഖലയിലേക്ക് കടന്നുവരാൻ മടിക്കുകയാണ്. കൂടാതെ, നൂലിന്റെ ലഭ്യതയിലുള്ള കുറവ് വ്യവസായത്തിന്റെ സുഗമമായ പ്രവർത്തനത്തെയും പ്രതികൂലമായി ബാധിക്കുന്നുണ്ട്.

‘ജീവിക്കാൻ വേണ്ടിയാണ് ജോലി ചെയ്യുന്നത് ഒടുവിൽ കൂലി ലഭിക്കുന്നില്ലെങ്കിൽ ഞങ്ങൾ എന്തു ചെയ്യും ?’ എന്ന എം.അമ്പുവിന്റെ ചോദ്യം ഈ മേഖല നേരിടുന്ന കടുത്ത അവഗണനയുടെ നേർക്കാഴ്ചയാണ്.