ഓക്‌സ്‌ഫോർഡ് സർവ്വകലാശാലയിലെ ഡോ. നികിത ഹരിക്ക് ഇരട്ട ഫെലോഷിപ്പ് അംഗീകാരം

ഓക്‌സ്‌ഫോർഡ് സർവ്വകലാശാലയിലെ ‘ടീച്ചിംഗ്, റിസർച്ച് ഡിസൈൻ ആൻഡ് സപ്പോർട്ട് ഗ്രൂപ്പ്’ മേധാവിയായ ഡോ. നികിത ഹരിക്ക് അഭിമാനകരമായ ഇരട്ട

ഫെലോഷിപ്പ് പുരസ്‌കാരം. എഞ്ചിനീയറിംഗ് വിദ്യാഭ്യാസ മേഖലയിൽ കാഴ്ചവെച്ച അസാധാരണമായ സംഭാവനകളെയും മികവാർന്ന അക്കാദമിക നേതൃത്വത്തെയും പരിഗണിച്ചാണ് ഈ നേട്ടം.

‘ഗൂഗിൾ എച്ച്ഇ ഫാക്കൽറ്റി എഐ ഫെലോഷിപ്പ്’, ‘അഡ്വാൻസ് എച്ച്ഇ സീനിയർ ഫെലോഷിപ്പ്’ എന്നിവ ഒരേസമയം കരസ്ഥമാക്കിക്കൊണ്ടാണ് ഡോ. നികിത ഈ അംഗീകാരം നേടിയത്.

ഉന്നതവിദ്യാഭ്യാസ രംഗത്തെ പാഠ്യപദ്ധതി വികസനം, നൂതന ബോധനശാസ്ത്രം, ഉത്തരവാദിത്തത്തോടെയുള്ള കൃത്രിമ ബുദ്ധി (AI) സംയോജനം എന്നീ മേഖലകളിൽ ഡോ. നികിത നടത്തിയ ഇടപെടലുകൾക്കുള്ള ഔദ്യോഗിക അംഗീകാരമാണ് ഈ പുരസ്‌കാരങ്ങൾ.

വിദ്യാഭ്യാസ മേഖലയിലെ നയങ്ങൾ, പ്രായോഗിക രീതികൾ, ബോധനശാസ്ത്രം എന്നിവയെ ഏകീകരിച്ച് അർത്ഥവത്തായ മാറ്റങ്ങൾ കൊണ്ടുവരാൻ അവരുടെ പ്രവർത്തനങ്ങൾക്ക് സാധിച്ചു. ഉന്നതവിദ്യാഭ്യാസ മേഖലയിൽ എഐ സാങ്കേതികവിദ്യയുടെ സാധ്യതകൾ പ്രയോജനപ്പെടുത്തുന്ന അധ്യാപകരെ പ്രോത്സാഹിപ്പിക്കുന്നതിനായുള്ള അന്താരാഷ്ട്ര സംരംഭമാണ് ഗൂഗിൾ എച്ച്ഇ ഫാക്കൽറ്റി എഐ ഫെലോഷിപ്പ്.

അധ്യാപനത്തിലും നേതൃത്വത്തിലും മികച്ച പ്രകടനം കാഴ്ചവെക്കുന്ന പരിചയസമ്പന്നരായ പ്രൊഫഷണലുകൾക്ക് നൽകുന്നതാണ് അഡ്വാൻസ് എച്ച്ഇ സീനിയർ ഫെലോഷിപ്പ്. പുരസ്‌കാര ലബ്ധിയിൽ താൻ അതീവ സന്തുഷ്ടയാണെന്ന് ഡോ.

നികിത ഹരി പ്രതികരിച്ചു. “ഗവേഷണധിഷ്ഠിതവും ഉൾക്കൊള്ളുന്നതുമായ എഞ്ചിനീയറിംഗ് വിദ്യാഭ്യാസത്തോടുള്ള പ്രതിബദ്ധതയും, ഉന്നതവിദ്യാഭ്യാസത്തിൽ എഐയുടെ ചിന്താപൂർവ്വമായ സംയോജനവുമാണ് ഇതിലൂടെ പ്രതിഫലിക്കുന്നത്.

ഈ വിദ്യാഭ്യാസപരമായ നവീകരണത്തിന് പിന്തുണ നൽകിയ ഓക്‌സ്‌ഫോർഡിലെയും ആഗോള ഉന്നതവിദ്യാഭ്യാസ സമൂഹത്തിലെയും സഹപ്രവർത്തകർക്കും വിദ്യാർത്ഥികൾക്കും പങ്കാളികൾക്കും അവർ നന്ദി അറിയിച്ചു.”