ഡെമോക്രാറ്റിക് റിപ്പബ്ലിക് ഓഫ് കോംഗോയിലെ ഇറ്റൂരി പ്രവിശ്യയിലുള്ള റാംപാര നഗരത്തിൽ പ്രവർത്തിക്കുന്ന എബോള ചികിത്സാ കേന്ദ്രം ജനക്കൂട്ടം ആക്രമിച്ചു തകർത്തു. വ്യാഴാഴ്ച നടന്ന അക്രമസംഭവത്തിൽ ചികിത്സാ കേന്ദ്രത്തിന്റെ ഭാഗമായ ടെന്റുകൾക്ക് അക്രമികൾ തീയിട്ടു.
എബോള ബാധിച്ച് മരിച്ചുവെന്ന് കരുതപ്പെടുന്ന പ്രാദേശിക ഫുട്ബോൾ കളിക്കാരന്റെ മൃതദേഹം വിട്ടുകിട്ടാത്തതിനെത്തുടർന്നുണ്ടായ പ്രതിഷേധമാണ് അക്രമത്തിലേക്ക് നയിച്ചത്. രോഗം പടരാനുള്ള സാധ്യത കണക്കിലെടുത്ത്, എബോള ബാധിച്ച് മരിക്കുന്നവരുടെ മൃതദേഹങ്ങൾ കർശനമായ സുരക്ഷാ മാനദണ്ഡങ്ങൾ പാലിച്ചുകൊണ്ട് മാത്രമേ സംസ്കരിക്കാവൂ എന്ന് അധികൃതർ നേരത്തെ നിർദ്ദേശം നൽകിയിരുന്നു.
എന്നാൽ, തങ്ങളുടെ പ്രിയപ്പെട്ടവന്റെ മൃതദേഹം സംസ്കരിക്കാൻ അനുവദിക്കാത്തത് ക്രൂരതയാണെന്ന് ആരോപിച്ചാണ് ഒരു സംഘം യുവാക്കൾ ചികിത്സാ കേന്ദ്രത്തിലേക്ക് അതിക്രമിച്ചു കയറിയത്. തുടർന്ന് കെട്ടിടത്തിനകത്തെ സാധനസാമഗ്രികൾ തല്ലിത്തകർക്കുകയും ടെന്റുകൾക്ക് തീയിടുകയുമായിരുന്നു.
അക്രമികൾ തീകൊളുത്തിയ ടെന്റുകൾക്കൊപ്പം അന്ന് സംസ്കരിക്കാൻ നിശ്ചയിച്ചിരുന്ന മൃതദേഹം പൂർണ്ണമായും കത്തിയമർന്നു. സ്ഥിതിഗതികൾ നിയന്ത്രണവിധേയമാക്കാൻ പോലീസ് ആകാശത്തേക്ക് വെടിയുതിർക്കുകയും കണ്ണീർവാതകം പ്രയോഗിക്കുകയും ചെയ്തെങ്കിലും ജനക്കൂട്ടത്തെ പിന്തിരിപ്പിക്കാൻ സാധിച്ചില്ല.
അക്രമത്തെത്തുടർന്ന് സന്നദ്ധപ്രവർത്തകർ വാഹനങ്ങളിൽ സുരക്ഷിതസ്ഥാനങ്ങളിലേക്ക് മാറി. ചികിത്സാ കേന്ദ്രത്തിൽ പ്രവേശിപ്പിച്ചിരുന്ന ആറ് രോഗികളെ മറ്റൊരു ആശുപത്രിയിലേക്ക് മാറ്റിയിട്ടുണ്ട്.
എബോള പ്രതിരോധ പ്രവർത്തനങ്ങൾക്കും ആരോഗ്യ പ്രവർത്തകർക്കുമെതിരെ പ്രദേശവാസികൾക്കിടയിൽ നിലനിൽക്കുന്ന കടുത്ത അവിശ്വാസമാണ് ഇത്തരം അക്രമ സംഭവങ്ങൾക്ക് കാരണമാകുന്നതെന്ന് അധികൃതർ വിലയിരുത്തുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
