എട്ടു വർഷത്തെ വ്രതാനുഷ്ഠാനത്തിന് പരിസമാപ്തി; മുടിയും താടിയും മുറിച്ച് കെ.കെ. പ്രദീപ്

തൊടുപുഴ നെയ്യശ്ശേരി കാഞ്ഞിരക്കുഴി സ്വദേശിയായ കെ.കെ. പ്രദീപ് (40) എട്ടു വർഷമായി തുടർന്നുപോന്ന അപൂർവ വ്രതത്തിന് പരിസമാപ്തി കുറിച്ചു.

പിണറായി വിജയൻ നേതൃത്വം നൽകുന്ന സർക്കാരിന്റെ ഭരണകാലാവധി അവസാനിക്കണമെന്ന ലക്ഷ്യത്തോടെയാണ് പ്രദീപ് താടിയും മുടിയും മുറിക്കാതെ കാത്തിരുന്നത്. 2018-ൽ ശബരിമല സ്ത്രീ പ്രവേശന വിധി പുറത്തുവന്ന സാഹചര്യത്തിലാണ്, പിണറായി വിജയൻ സർക്കാർ അധികാരത്തിൽ നിന്നും ഒഴിയാതെ മുടിയും താടിയും വടിക്കില്ലെന്ന പ്രതിജ്ഞ പ്രദീപ് എടുത്തത്.

ഈ കാലയളവിൽ അയ്യപ്പ ഭക്തർക്കിടയിൽ ഐക്യം ലക്ഷ്യമാക്കി കേരളത്തിലുടനീളം ഏകദേശം മൂന്ന് വർഷത്തോളം സ്വന്തം ഓട്ടോറിക്ഷയിൽ അദ്ദേഹം യാത്ര നടത്തിയിരുന്നു. വ്രതത്തിന്റെ ഭാഗമായി നീട്ടി വളർത്തിയ താടിയുടെയും മുടിയുടെയും അറ്റം ഇന്നലെ പ്രദീപ് മുറിച്ചു മാറ്റി.

ഈ ദൃശ്യങ്ങൾ സമൂഹമാധ്യമങ്ങളിൽ പങ്കുവെച്ച അദ്ദേഹം, നാട്ടുകാർക്കായി പായസ വിതരണവും നടത്തി. എറണാകുളത്തെ സ്വകാര്യ സ്ഥാപനത്തിൽ അക്കൗണ്ടന്റായി ജോലി ചെയ്തിരുന്ന പ്രദീപ്, പിതാവിന്റെ ആരോഗ്യസ്ഥിതി മോശമായതിനെത്തുടർന്നാണ് ജോലി ഉപേക്ഷിച്ച് നാട്ടിലെത്തിയത്.

നിലവിൽ ഓൺലൈൻ മാർഗത്തിലൂടെ ജോലി തുടരാനാണ് പ്രദീപിന്റെ തീരുമാനം.