പശ്ചിമേഷ്യയിൽ യുദ്ധഭീതി; ക്രൂഡോയിൽ വില കുതിച്ചുയരുന്നു, ഇന്ത്യൻ വിപണിയിലും കനത്ത ആശങ്ക

അമേരിക്കൻ പ്രസിഡന്റ് ഡോണൾഡ് ട്രംപും ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവും തമ്മിലുള്ള ടെലിഫോൺ സംഭാഷണത്തിന് പിന്നാലെ, ഇറാനെതിരെ ട്രംപ് നടത്തിയ രൂക്ഷമായ മുന്നറിയിപ്പുകൾ ആഗോളതലത്തിൽ വലിയ പ്രതിസന്ധിക്ക് വഴിവെച്ചിരിക്കുകയാണ്. പശ്ചിമേഷ്യയിൽ സമാധാനം പുനഃസ്ഥാപിക്കപ്പെടുമെന്ന പ്രതീക്ഷകൾക്ക് മങ്ങലേൽപ്പിച്ചുകൊണ്ട്, ഇരു രാജ്യങ്ങളും തമ്മിലുള്ള തർക്കം യുദ്ധസാഹചര്യത്തിലേക്ക് നീങ്ങുന്നതായാണ് സൂചനകൾ.

ട്രംപ് തന്റെ ട്രൂത്ത് സോഷ്യൽ അക്കൗണ്ടിലൂടെ ഇറാനുനേരെ ഉയർത്തിയ ഭീഷണി ഇങ്ങനെയാണ്: “For Iran, the Clock is Ticking, and they better get moving, FAST, or there won’t be anything left of them. TIME IS OF THE ESSENCE!” ഇറാന് മുന്നിൽ അമേരിക്ക പുതിയ വ്യവസ്ഥകൾ വെച്ചിട്ടുണ്ട്.

400 കിലോഗ്രാം യൂറേനിയം കൈമാറുക, ആണവ പദ്ധതികൾ ഒരു നിലയത്തിലേക്ക് ചുരുക്കുക, യുദ്ധനഷ്ടപരിഹാരം ആവശ്യപ്പെടുന്നത് അവസാനിപ്പിക്കുക, വിദേശ ആസ്തികൾ മരവിപ്പിച്ചത് അംഗീകരിക്കുക എന്നിവയാണ് പ്രധാന ആവശ്യങ്ങൾ. എന്നാൽ, ഉപരോധങ്ങൾ പൂർണ്ണമായും നീക്കുക, മരവിപ്പിച്ച ആസ്തികൾ വിട്ടുനൽകുക, സൈനിക നടപടികൾ അവസാനിപ്പിക്കുക എന്നീ ഉപാധികൾ തിരികെ ഉയർത്തി ഇറാൻ ഈ നിർദേശങ്ങൾ തള്ളിക്കളഞ്ഞു.

ആക്രമണമുണ്ടായാൽ ശക്തമായ തിരിച്ചടി നേരിടേണ്ടി വരുമെന്ന് ഇറാനിയൻ സൈന്യവും മുന്നറിയിപ്പ് നൽകുന്നു. ഈ സംഘർഷം ആഗോള സമ്പദ്‌വ്യവസ്ഥയെ കാര്യമായി ബാധിച്ചു തുടങ്ങിയിട്ടുണ്ട്.

യുഎസ് ക്രൂഡ് (ഡബ്ല്യുടിഐ) വില 1.75 ശതമാനം ഉയർന്ന് ബാരലിന് 107.3 ഡോളറിലും, ബ്രെന്റ് വില 1.10 ശതമാനം വർധിച്ച് 110.5 ഡോളറിലുമെത്തി. ക്രൂഡോയിൽ വിലയിലെ വർധന ഇന്ത്യ പോലുള്ള രാജ്യങ്ങളിൽ പണപ്പെരുപ്പത്തിന് വഴിവെക്കുമെന്ന ആശങ്ക ശക്തമാണ്.

ഇതിനിടെ, യുഎഇയിലെ ബറാക്ക ആണവനിലയത്തിന് നേരെയും സൗദി അറേബ്യയ്ക്ക് നേരെയും ഡ്രോൺ ആക്രമണങ്ങൾ നടന്നത് സാഹചര്യം കൂടുതൽ വഷളാക്കിയിട്ടുണ്ട്. ഓഹരി വിപണിയിലും ഇതിന്റെ പ്രത്യാഘാതങ്ങൾ ദൃശ്യമാണ്.

ഡൗ ജോൺസ് സൂചികയിൽ 0.2 ശതമാനത്തിന്റെ ഇടിവ് രേഖപ്പെടുത്തി. പാരീസിൽ ചേരുന്ന ജി7 ഉച്ചകോടി, റഷ്യൻ പ്രസിഡന്റ് വ്ളാദിമിർ പുടിനും ചൈനീസ് പ്രസിഡന്റ് ഷി ജിൻപിംഗും തമ്മിലുള്ള കൂടിക്കാഴ്ച എന്നിവ വരുംദിവസങ്ങളിൽ നിർണ്ണായകമാകും.

ഇന്ത്യൻ രൂപയുടെ മൂല്യം റെക്കോർഡ് നിലവാരത്തിലേക്ക് ഇടിഞ്ഞതും വിപണിക്ക് തിരിച്ചടിയായി. കഴിഞ്ഞയാഴ്ച ഡോളറിനെതിരെ രൂപയുടെ മൂല്യം 95.96 വരെ താഴ്ന്നിരുന്നു.

2026ൽ മാത്രം വിദേശ നിക്ഷേപകർ ഇന്ത്യൻ വിപണിയിൽ നിന്ന് പിൻവലിച്ചത് 2.65 ലക്ഷം കോടി രൂപയാണ്. ക്രൂഡോയിൽ വിലയിലെ വർധനയും ഡോളറിന്റെ കരുത്തും കാരണം സ്വർണവിലയിലും രാജ്യാന്തര വിപണിയിൽ ഇടിവുണ്ടായിട്ടുണ്ട്.

ഈ പ്രവണത തുടർന്നാൽ കേരളത്തിലെ സ്വർണവിപണിയിലും ഇന്ന് വില കുറയാൻ സാധ്യതയുണ്ട്.