യൂത്ത് കോൺഗ്രസ് നേതാവ് ഫർസീൻ മജീദിന് നേരെ വധഭീഷണി ഉയർന്ന സംഭവത്തിൽ മട്ടന്നൂർ പോലീസ് കേസെടുത്ത് അന്വേഷണം ആരംഭിച്ചു. ഫോണിലൂടെ അജ്ഞാതർ വധഭീഷണി മുഴക്കിയെന്ന് ചൂണ്ടിക്കാട്ടി ഫർസീൻ മജീദ് മുഖ്യമന്ത്രിക്ക് നൽകിയ പരാതിയുടെ അടിസ്ഥാനത്തിലാണ് നടപടി.
വിമാനത്തിനുള്ളിൽ മുഖ്യമന്ത്രി പിണറായി വിജയന് എതിരെ നടന്ന പ്രതിഷേധവുമായി ബന്ധപ്പെട്ട് മൊഴി നൽകിയതിന് പിന്നാലെയാണ് തനിക്ക് ഭീഷണികൾ ഉണ്ടായതെന്ന് അദ്ദേഹം പരാതിയിൽ വ്യക്തമാക്കിയിട്ടുണ്ട്. അതേസമയം, ഈ കേസിൽ പ്രതികൾക്ക് ആശ്വാസം നൽകുന്ന വിധത്തിൽ കോടതിയുടെ നിർണായക ഉത്തരവ് പുറത്തുവന്നു.
2022 ജൂൺ 13-ന് കണ്ണൂരിൽ നിന്ന് തിരുവനന്തപുരത്തേക്കുള്ള ഇൻഡിഗോ 6 ഇ- 7407 വിമാനത്തിൽ വെച്ച് മുഖ്യമന്ത്രിയെ വധിക്കാൻ ശ്രമിച്ചുവെന്നാരോപിച്ച് രജിസ്റ്റർ ചെയ്ത കേസിലെ പോലീസ് റിപ്പോർട്ട് തിരുവനന്തപുരം ജില്ലാ പ്രിൻസിപ്പൽ സെഷൻസ് കോടതി അംഗീകരിച്ചു. പ്രതികൾക്കെതിരെ ചുമത്തിയിരുന്ന വ്യോമയാന വകുപ്പുകൾ ഒഴിവാക്കിക്കൊണ്ടുള്ള റിപ്പോർട്ടാണ് കോടതി അംഗീകരിച്ചത്.
ഫർസീൻ മജീദ്, ആർ കെ നവീൻകുമാർ, സുനിത് നാരായണൻ എന്നിവർക്കെതിരെയായിരുന്നു പ്രസ്തുത കേസ്. സംഭവത്തിൽ ഗൂഢാലോചന കുറ്റം ചുമത്തി അന്നത്തെ യൂത്ത് കോൺഗ്രസ് വൈസ് പ്രസിഡന്റ് കെ എസ് ശബരിനാഥനെയും കേസിൽ പ്രതിയാക്കിയിരുന്നു.
നേരത്തെ, വധശ്രമത്തിനൊപ്പം വിമാനത്തിലെ സുരക്ഷാ മാനദണ്ഡങ്ങൾ ലംഘിച്ചുവെന്നാരോപിച്ച് വ്യോമയാന നിയമപ്രകാരമുള്ള വകുപ്പുകളും പോലീസ് ചുമത്തിയിരുന്നു. എന്നാൽ, വിമാനത്തിൽ യാത്രക്കാരനെ അപകടപ്പെടുത്താൻ ശ്രമിച്ചുവെന്നും വിമാനത്തിന് കേടുപാടുണ്ടാക്കിയെന്നും കാട്ടി വ്യോമയാന വകുപ്പ് ചുമത്താൻ മുൻപ് പോലീസ് ശ്രമിച്ചെങ്കിലും കേന്ദ്ര സർക്കാരിന്റെ അനുമതി ലഭിച്ചിരുന്നില്ല.
നിലവിൽ വ്യോമയാന വകുപ്പ് ഒഴിവാക്കിയത് പ്രതികളായ ഫർസീൻ മജീദിനും നവീൻ കുമാറിനും ആശ്വാസമായിട്ടുണ്ട്. എന്നിരുന്നാലും, പ്രതികൾക്കെതിരെയുള്ള വധശ്രമം, ഗൂഢാലോചന തുടങ്ങിയ വകുപ്പുകൾ നിലനിൽക്കും.
ഇതേസമയം, മുഖ്യമന്ത്രിയുടെ സുരക്ഷാ ഉദ്യോഗസ്ഥരും ഇപി ജയരാജനും തന്നെ മർദ്ദിച്ചുവെന്ന് ആരോപിച്ച് പ്രതികൾ നൽകിയ സ്വകാര്യ അന്യായം കോടതിയുടെ പരിഗണനയിലാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
