യാത്രക്കാർ കുറഞ്ഞിട്ടും ബജറ്റിൽ റെയിൽവേക്ക് ലക്ഷം കോടികൾ; ബിഎസ്എൻഎല്ലിനു നീക്കിവയ്ക്കുന്ന തുകയും പരിശോധിക്കണം: ഗാർഗ്

കൊച്ചി∙ വന്ദേഭാരതും മെട്രോ പദ്ധതികളും ഹൈസ്പീഡ് കോറിഡോറുകളും പ്രഖ്യാപിക്കുമ്പോഴും റെയിൽവേ യാത്രക്കാർ കുറയുകയാണെന്ന് മുൻ കേന്ദ്ര ധനകാര്യ സെക്രട്ടറി സുഭാഷ് ചന്ദ്ര ഗാർഗ്. അതേസമയം വർഷംതോറും റെയിൽവേക്കുള്ള വിഹിതം കൂടുന്നു.

ഇക്കുറി 3 ലക്ഷം കോടി രൂപയാണു നീക്കിവച്ചത്. മുംബൈ–അഹമ്മദാബാദ് ബുള്ളറ്റ് ട്രെയിൻ പദ്ധതി 10 വർഷമായി നടക്കുന്നു, ലക്ഷങ്ങൾ ചെലവിടുന്നു, പക്ഷേ പ്രയോജനം ഉണ്ടാകുന്നില്ല.

അപ്പോഴാണ് അതിവേഗ റെയിൽ കോറിഡോറുകളുടെ വരവ്. ബിഎസ്എൻഎല്ലിനു നീക്കിവയ്ക്കുന്ന തുകയും ഇങ്ങനെ ഉൽപാദനപരമല്ലാതെ പോവുകയാണോയെന്നു പരിശോധിക്കേണ്ടതുണ്ട്.

അതേസമയം, നമ്മുടെ ഭാവിയെ ബാധിക്കുന്ന എഐ, സെമികണ്ടക്ടർ പോലെ അനേകം രംഗങ്ങൾക്ക് വിഹിതമില്ല.
ഇന്ത്യയുടെ യഥാർഥ ജിഡിപി വളർച്ച 4.5% മാത്രം; പണപ്പെരുപ്പം 0.5 ശതമാനമാണെന്ന കേന്ദ്രക്കണക്ക് ആരെങ്കിലും വിശ്വസിക്കുമോ?
രാജ്യത്തെ ജിഡിപി വളർച്ച 7.4 ശതമാനമാണെന്നു കേന്ദ്ര സർക്കാർ അവകാശപ്പെടുന്നുണ്ടെങ്കിലും യഥാർഥത്തിൽ 4.5 ശതമാനമായി ചുരുങ്ങുമെന്ന് മുൻ കേന്ദ്ര ധനകാര്യ സെക്രട്ടറി സുഭാഷ് ചന്ദ്ര ഗാർഗ്. മലയാള മനോരമയുടെ 27-ാം ബജറ്റ് പ്രഭാഷണം നിർവഹിക്കുകയായിരുന്നു അദ്ദേഹം.

നോമിനൽ ജിഡിപി 8 ശതമാനമാണ്. അതിൽ നിന്നു പണപ്പെരുപ്പത്തോതു കുറയ്ക്കുമ്പോഴാണു റിയൽ ജിഡിപി ലഭിക്കുന്നത്. 
പണപ്പെരുപ്പം വെറും 0.5 – 0.6% മാത്രമാണെന്നു കേന്ദ്ര സർക്കാർ അവകാശപ്പെടുന്നത് ആർക്കെങ്കിലും വിശ്വസിക്കാനാകുമോ? അതിലേറെയുണ്ടെന്ന് ഉറപ്പാണ്.

യഥാർഥത്തിൽ 3.5 ശതമാനമെങ്കിലും ഉണ്ടെന്നു കരുതാം. അങ്ങനെ വരുമ്പോൾ 4.5 ശതമാനമാണു യഥാർഥ ജിഡിപി.

ഇനി, ഡോളറുമായി തട്ടിച്ചു ജിഡിപി കണക്കു കൂട്ടിയാൽ ഇന്ത്യയുടെ ജിഡിപി വളർച്ച 1.5% മാത്രമേയുണ്ടാകൂ. 
യുഎസിന്റെ ജിഡിപി 3 ശതമാനമാണ്. ഏതു മാനദണ്ഡ പ്രകാരം ജിഡിപി കണക്കു കൂട്ടണമെന്ന് ആർക്കും തീരുമാനിക്കാം.

എഐയിലും ഓട്ടമേഷനിലും നിക്ഷേപിക്കാത്ത രാജ്യങ്ങൾക്കു തിരിച്ചടിയുണ്ടാകും. സർക്കാർ സാഹചര്യങ്ങൾ ഒരുക്കിക്കൊടുക്കുക മാത്രമാണു ചെയ്യേണ്ടത്.

സ്വകാര്യ മേഖലയിൽ നിന്നാണ് ‘ഇന്നവേഷൻ’ സംഭവിക്കേണ്ടതെന്നും അദ്ദേഹം പറഞ്ഞു. ചോദ്യോത്തര വേളയിൽ മുൻ ലേബർ കമ്മിഷനർ എം.പി.ജോസഫ്, ക്ലേയ്സിസ് ടെക്നോളജീസ് എംഡി വിനോദ് തരകൻ തുടങ്ങിയവർ ചോദ്യങ്ങളുന്നയിച്ചു.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
… FacebookTwitterWhatsAppTelegram