മഴ, കാറ്റ്: പേരാമ്പ്ര മേഖലയിൽ കനത്ത നാശം

പേരാമ്പ്ര ∙ കനത്ത മഴയും കാറ്റും മൂലം പേരാമ്പ്ര മേഖലയിൽ മരം വീണും മറ്റും ഒട്ടേറെ വീടുകൾക്ക് നാശം സംഭവിച്ചു. നൊച്ചാട് എരഞ്ഞോളി മീത്തൽ ബിജുവിന്റെ വീടിനു മുകളിൽ തെങ്ങ് വീണ് അടുക്കള ഭാഗത്തെ ഓടും പട്ടികയും പൂർണമായി തകർന്നു.

വീടിന്റെ ചുമരിനും കേടു പറ്റി. അപകടം ഉണ്ടായപ്പോൾ വീട്ടിൽ ബിജുവും ഭാര്യയും മകളും മാതാവും ഉറങ്ങി കിടക്കുകയായിരുന്നു.

ഇവർ അപകടം കൂടാതെ രക്ഷപ്പെട്ടു. 2 ലക്ഷം രൂപയുടെ നഷ്ടമുണ്ട്.

വില്ലേജ് അധികാരികൾക്ക് പരാതി നൽകി.പന്തിരിക്കര ഒറ്റക്കണ്ടം റോഡിൽ കഴിഞ്ഞ ദിവസം രാത്രി പെയ്ത ശക്തമായ മഴയിലും കാറ്റിലും മരം വീണു വൈദ്യുതി ലൈൻ തകർന്നു. ഒറ്റക്കണ്ടം ഹൈസ്കൂളിനു സമീപവും പാലേരി റോഡ് കവലയിലുമാണ് വൈദ്യുത ലൈനുകളിൽ മരങ്ങൾ കടപുഴകി വീണത്.

വൈദ്യുതി തൂണുകൾ റോഡിലേക്ക് ചെരിഞ്ഞ് ഗതാഗതവും തടസ്സപ്പെട്ടു.പന്തിരിക്കര, ഒറ്റക്കണ്ടം, തരിപ്പിലോട് ഭാഗങ്ങളിൽ വൈദ്യുതി നിലച്ചു.ചവറംമൂഴി ജാനകിക്കാട് ഇക്കോ ടൂറിസ്റ്റ് കേന്ദ്രത്തിലേക്ക് അടക്കമുള്ള യാത്രക്കാർ ഏറെ നേരം വഴിയിൽ കുടുങ്ങി. രാവിലെ 11 മണിയോടെ നാട്ടുകാർ മരങ്ങൾ മുറിച്ചു നീക്കി ഗതാഗതം പുനഃസ്ഥാപിച്ചു.
ലൈനിൽ മരം വീണു;വൈദ്യുതിയും ഗതാഗതവും മുടങ്ങി
ചെറുവണ്ണൂർ ∙ ശക്തമായ കാറ്റിലും മഴയിലും ചെറുവണ്ണൂർ 11–ാം വാർഡിലെ ആപ്പാംകുഴി പാറയ്ക്കു സമീപം ഇലക്ട്രിക് ലൈനിൽ മരങ്ങൾ കടപുഴകി വീണ് വൈദ്യുതിയും ഗതാഗതവും തടസ്സപ്പെട്ടു.

കഴി‍ഞ്ഞ ദിവസം രാത്രിയായിരുന്നു സംഭവം. മുപ്പതോളം കുടുംബങ്ങൾക്ക് വൈദ്യുതി തടസ്സപ്പെട്ടു.

കനത്ത മഴയിലും രാത്രി 12 വരെ സാഹസികമായാണു സിപിഎം ചെറുവണ്ണൂർ ലോക്കൽ കമ്മിറ്റിയുടെ നേതൃത്വത്തിൽ പ്രവർത്തിക്കുന്ന ദുരന്ത നിവാരണ സേനയും നാട്ടുകാരും ചേർന്ന് മരങ്ങൾ മുറിച്ചുമാറ്റി വൈദ്യുതി പുനഃസ്ഥാപിച്ചത്.
കാറ്റിൽ മരം വീണ് വീടിന് നാശനഷ്ടം
ചക്കിട്ടപാറ ∙ പഞ്ചായത്തിലെ പിള്ളപ്പെരുവണ്ണയിൽ കാറ്റിൽ പ്ലാവ് വീടിനു മേൽ വീണ് നാശനഷ്ടം സംഭവിച്ചു.കുറ്റിപ്പിലായി ആക്കാഞ്ചിറ രമേശന്റെ വീടിന്റെ മേൽക്കൂരയ്ക്കാണ് നാശമുണ്ടായത്. 25000 രൂപയുടെ നഷ്ടം കണക്കാക്കുന്നു.

…