കണ്ണീരാഴങ്ങളിൽ കുട്ടികൾ; മരവിച്ച് മാണിക്കോത്ത്: കളിച്ചുചിരിച്ചവർ ഒരുമിച്ചു പോയി

കാഞ്ഞങ്ങാട് ∙ നാട് വിറങ്ങലിച്ചുപോയ നിമിഷങ്ങൾക്കാണ് ഇന്നലെ മാണിക്കോത്ത് സാക്ഷ്യംവഹിച്ചത്. കുട്ടികൾ പള്ളിക്കുളത്തിൽ മുങ്ങിമരിച്ചെന്ന വാർത്ത കേട്ടപാടെ നാട്ടുകാർ സംഭവസ്ഥലത്തേക്ക് ഓടിയെത്തി. മൂന്നുപേരെയും ജീവനോടെ കരയ്ക്കെത്തിച്ചെന്നാണ് ആദ്യംകേട്ടത്. പിന്നാലെ രണ്ടുകുട്ടികൾ മരിച്ചെന്ന വിവരം വന്നു.മരിച്ച അൻവറിന്റെ അമ്മയ്ക്കും അച്ഛനും മലേഷ്യയിലാണ് ജോലി. കുടക് സ്വദേശിയായ ഹൈദർ 8 വർഷമായി മലേഷ്യയിൽ ജോലി ചെയ്യുന്നു. സുള്ള്യ സ്വദേശിനിയായ ആബിദ 4 വർഷം മുൻപാണ് മലേഷ്യയിലെത്തിയത്. ഗർഭിണിയായ ആബിദ നാട്ടിലേക്കു വരാനുള്ള ഒരുക്കത്തിലായിരുന്നു. അതിനിടയിലാണ് മകന്റെ വേർപാട്. വല്യുമ്മയുടെ കൂടെ മഡിയനിലെ ക്വാർട്ടേഴ്സിലാണ് കുട്ടികൾ താമസിച്ചിരുന്നത്. മരിച്ച അഫാസിന്റെ പിതാവ് പൊതുപ്രവർത്തകനാണ്.

കളിച്ചുചിരിച്ചവർ ഒരുമിച്ചു പോയി
രാവിലെ മദ്രസ കഴിഞ്ഞു വരുമ്പോൾതന്നെ കുട്ടികൾ പള്ളിക്കുളത്തിൽ കുളിക്കാൻ ആലോചിച്ചിരുന്നു ഹാഷിം മറ്റു കുട്ടികളോട് കുളിക്കാൻ ആരെങ്കിലും വരുന്നുണ്ടോയെന്ന് അന്വേഷിച്ചിരുന്നു. വൈകിട്ടോടെ 4 പേരും ചേർന്നു പള്ളിക്കുളത്തിലേക്ക് എത്തുകയായിരുന്നു. കുളത്തിൽനിന്നു 150 മീറ്റർ അകലെയാണ് അഫാസിന്റെ വീട്. അൻവറിന്റെയും ഹാഷിമിന്റെയും ക്വാർട്ടേഴ്സ് കുളത്തിൽനിന്ന് ഏകദേശം ഒരു കിലോമീറ്റർ അകലെയും. മൂന്നു പേരും കുളിക്കാൻ ഇറങ്ങിയപ്പോൾ അൻവറിന്റെ സഹോദരൻ അജ്‌വത് കരയിൽ നിൽക്കുകയായിരുന്നു.മൂന്നുപേരും കുളത്തിൽ മുങ്ങുന്നതുകണ്ട അൻവറിന്റെ സഹോദരൻ അജ്‌വത് ആണ് വിവരം, കുളത്തിലേക്ക് വരികയായിരുന്ന 15 വയസ്സുകാരൻ റിയാനെയും കൂട്ടുകാരെയും അറിയിക്കുന്നത്. വിവരമറിഞ്ഞ ഉടൻ റിയാനും കൂട്ടുകാരും കുളത്തിലേക്കു ചാടി. റിയാൻ ആണ് അൻവറിനെയും ഹാഷിമിനെയും കരയിലെത്തിച്ചത്.വിവരമറിഞ്ഞ് പിന്നാലെയെത്തിയ ബാസിത് പാലക്കിയാണ് അഫീസിനെ കരയിലെത്തിച്ചത്. മുൻകാലങ്ങളിൽ വേനലിന് മുൻപായി കുളത്തിലെ ചെളിയും പായലും നീക്കുമായിരുന്നു. ഇത്തവണ ചെളി നീക്കിയിരുന്നില്ല.

മകൻ കുളത്തിലുള്ളത് അറിയാതെ അച്ഛന്റെ രക്ഷാപ്രവർത്തനം
കുളത്തിൽ മുങ്ങിയ ഹാഷിമിനെയും അൻവറിനെയും ആശുപത്രിയിലേക്കു കൊണ്ടുപോയത് അസീസാണ്. മകൻ കുളത്തിൽ മുങ്ങിയത് അറിയാതെയാണ് അസീസ് ഇരുവരെയുംകൊണ്ട് ആശുപത്രിയിലേക്ക് ഓടിയത്. പിന്നാലെയാണ് തന്റെ മകൻ അഫാസും കുളത്തിലുണ്ടായിരുന്നെന്ന വിവരം അസീസ് അറിയുന്നത്. അസീസിനെ സമാധാനിപ്പിക്കാനാകാതെ സുഹൃത്തുക്കളും ബന്ധുക്കളും തേങ്ങി. കുളത്തിൽ 11 അടിയോളം വെള്ളമുണ്ടായിരുന്നെന്ന് അഗ്നിരക്ഷാസേന പറയുന്നു. കുട്ടികൾ അപകടത്തിൽപെട്ടതെങ്ങനെയെന്ന വിവരം വ്യക്തമായി അറിയാൻ കഴിഞ്ഞിട്ടില്ലെന്ന് സ്റ്റേഷൻ ഓഫിസർ പവിത്രൻ പറഞ്ഞു. കൂടുതൽ കുട്ടികൾ ഉണ്ടോയെന്ന് അറിയാനായി മുങ്ങിയുള്ള പരിശോധനയും നടത്തി. വിവരമറിഞ്ഞ് എസ്ഐ അഖിലിന്റെ നേതൃത്വത്തിൽ പൊലീസ് സ്ഥലത്തെത്തി. ഡിവൈഎസ്പി ബാബു പെരിങ്ങേത്ത്, എസ്എച്ച്ഒ പി.അജിത്ത് കുമാർ എന്നിവർ ആശുപത്രിയിലെത്തി.

കുളിക്കാനിറങ്ങിയ 2 കുട്ടികൾ കുളത്തിൽ മുങ്ങിമരിച്ചു
കാഞ്ഞങ്ങാട് ∙ മാണിക്കോത്ത് കുളിക്കാനിറങ്ങിയ 2 കുട്ടികൾ കുളത്തിൽ മുങ്ങിമരിച്ചു. ഒരു കുട്ടിയെ മംഗളൂരുവിലെ ആശുപത്രിയിലേക്ക് മാറ്റി. മഡിയൻ പാലക്കി സ്വദേശി എം.എൻ.അസീസ്–ആയിഷ ദമ്പതികളുടെ മകൻ അഫാസ്(9), കർണാടക കുടക് സ്വദേശികളും മഡിയനിലെ വാടക ക്വാർട്ടേഴ്‌സിൽ താമസക്കാരുമായ ഹൈദർ–ആബിദ ദമ്പതികളുടെ മകൻ അൻവർ(10) എന്നിവരാണ് മരിച്ചത്.അൻവറിന്റെ ജ്യേഷ്ഠൻ ഹാഷിമാണ് (12) ചികിത്സയിലുള്ളത്. കുട്ടി അപകടനില തരണം ചെയ്തുവെന്നാണ് വിവരം.മാണിക്കോത്ത് പഴയ പള്ളിയോട് ചേർന്നുള്ള കുളത്തിൽ ഉച്ചകഴിഞ്ഞ് 3.45ന് ആണ് അപകടം. മദ്രസയിൽനിന്ന് മടങ്ങുംവഴി അഫാസും അൻവറും ഹാഷിമും കുളിക്കാനിറങ്ങി.അൻവറിന്റെയും ഹാഷിമിന്റെയും ഇളയ സഹോദരൻ അജ്‌വത് കരയിൽ നിന്നു. 3 പേരും മുങ്ങുന്നത് കണ്ട അജ്‌വത് ആണ് സമീപവാസികളെ വിവരം അറിയിച്ചത്.നാട്ടുകാർ 3 പേരെയും കാഞ്ഞങ്ങാട് മൻസൂർ ആശുപത്രിയിലെത്തിച്ചെങ്കിലും അഫാസിന്റെയും അൻവറിന്റെയും ജീവൻ രക്ഷിക്കാനായില്ല. കുളത്തിന് തൊട്ടടുത്താണ് അഫാസിന്റെ വീട്. ഒരു കിലോ മീറ്റർ അകലെയാണ് അൻവറിന്റെ വീട്.അൻവറിന്റെ മാതാപിതാക്കൾ മലേഷ്യയിലാണ് ജോലി ചെയ്യുന്നത്. ഉമ്മയുടെ മാതാവിന്റെ കൂടെ മഡിയനിലാണ് കുട്ടികൾ താമസിക്കുന്നത്. കഴിഞ്ഞ ദിവസം പെയ്ത മഴയിൽ കുളത്തിൽ വെള്ളം ഉയർന്നിരുന്നു.ചിത്താരി ഹിമായത്തുൽ ഇസ്‍ലാം യുപി സ്കൂൾ 4–ാം ക്ലാസ് വിദ്യാർഥികളാണ് അൻവറും അഫാസും.അഫാസിന്റെ സഹോദരങ്ങൾ: അറഫാത്ത്, അഫ്ന.