‘അമ്മുക്കുട്ടി’യെ കണ്ടവരുണ്ടോ ? നഷ്ടപ്പെട്ട പൂച്ചയ്ക്കായി കാത്തിരിക്കുന്നു, ശങ്കരൻകുട്ടിയും കുടുംബവും

പാലക്കാട് ∙ കാണാതായ നാടൻ പൂച്ചയെ കണ്ടെത്തി നൽകിയാൽ പാരിതോഷികം നൽകുമെന്നു പ്രഖ്യാപിച്ച് കുടുംബം. കുന്നത്തൂർമേട് വി.ശങ്കരൻകുട്ടിയാണു പത്രപ്പരസ്യം നൽകിയത്. ഇവർ ഓമനിച്ചു വളർത്തുന്ന അമ്മുക്കുട്ടിയെന്ന 10 മാസം പ്രായമുള്ള പൂച്ചയെ മൂന്നിന് ഉച്ചയോടെയാണു കാണാതായത്. മറ്റൊരു പൂച്ചയുടെ നഖം കൊണ്ടതിനെ തുടർന്നു ചികിത്സിക്കാനായി അയ്യപുരത്തെ വെറ്ററിനറി ആശുപത്രിക്കു കൊണ്ടുപോകുന്ന വഴിയാണു പൂച്ചയെ നഷ്ടപ്പെട്ടത്. 

വീട്ടിലുണ്ടായിരുന്ന പൂച്ച പ്രസവിച്ചപ്പോൾ ലഭിച്ച കുഞ്ഞാണ് ‘അമ്മുക്കുട്ടി’. ഇതുകൂടാതെ രണ്ടു പൂച്ചക്കുഞ്ഞുങ്ങൾ കൂടിയുണ്ട്. കുടുംബത്തിലെ അംഗങ്ങളെപോലെയാണു പൂച്ചകളെ വളർത്തുന്നതെന്നു ശങ്കരൻകുട്ടി പറഞ്ഞു. ‘അമ്മുക്കുട്ടിയെ കാണാതായതോടെ മറ്റു പൂച്ചകളും ഭക്ഷണം കഴിക്കാതെയായി. വീട്ടുകാരും വിഷമത്തിലാണ്’. പൂച്ചയെ കണ്ടെത്തിയാൽ തിരികെ നൽകണമെന്നാണു ശങ്കരൻകുട്ടിയുടെ ആവശ്യം. ഫോൺ. 8921856719.