ഐഫോണിലെ ‘സ്ലോ ചാർജർ’ അലേർട്ട്: കാരണവും പരിഹാരവും

ഐഫോൺ പുതിയ iOS പതിപ്പിലേക്ക് അപ്‌ഡേറ്റ് ചെയ്ത ശേഷം ചാർജ് ചെയ്യുമ്പോൾ ലോക്ക് സ്ക്രീനിൽ ഒരു പുതിയ സന്ദേശം പ്രത്യക്ഷപ്പെടുന്നത് പലരും ശ്രദ്ധിച്ചിരിക്കാം. 80 ശതമാനം വരെ ചാർജ് ആകാൻ എടുക്കുന്ന സമയം ഫോൺ ഇപ്പോൾ കാണിക്കാറുണ്ട്.

എന്നാൽ പഴയ ചാർജർ ആണ് ഉപയോഗിക്കുന്നതെങ്കിൽ, ‘സ്ലോ ചാർജർ’ എന്ന മുന്നറിയിപ്പാണ് ഐഫോൺ നൽകുന്നത്. ഈ സന്ദേശം കാണുമ്പോൾ ഫോണിനോ ചാർജറിനോ എന്തെങ്കിലും തകരാറുണ്ടോ എന്ന് സംശയം തോന്നാം.

ഈ വിഷയത്തിലെ സംശയങ്ങൾക്കുള്ള മറുപടികൾ അറിയാം. എന്താണ് ‘സ്ലോ ചാർജർ’ അലേർട്ട്? ചാർജിംഗ് വേഗതയെക്കുറിച്ച് ഉപയോക്താക്കളെ അറിയിക്കുന്നതിനായി ആപ്പിൾ പുതിയ iOS പതിപ്പിൽ ചേർത്ത ഫീച്ചറാണിത്.

നിങ്ങൾ ഉപയോഗിക്കുന്ന പവർ അഡാപ്റ്ററോ കേബിളോ നിങ്ങളുടെ ഐഫോണിനെ എത്ര വേഗത്തിലാണ് ചാർജ് ചെയ്യുന്നതെന്ന് മനസിലാക്കാൻ ഈ ഫീച്ചർ സഹായിക്കുന്നു. ഈ അലേർട്ട് കാണുന്നത് എന്തുകൊണ്ടാണ്? തങ്ങളുടെ പഴയ ഐഫോൺ നന്നായി ചാർജ് ചെയ്തിരുന്ന അതേ ചാർജർ പുതിയ ഫോണിൽ വേഗത കുറഞ്ഞതായി കാണിക്കുന്നതിന്‍റെ കാരണം പലരും ചിന്തിച്ചേക്കാം.

ഇതിന് പ്രധാന കാരണം പുതിയ ഐഫോണുകളിലെ വലിയ ബാറ്ററികളാണ്. പുതിയ ഐഫോൺ മോഡലുകൾക്ക് മുൻ വർഷങ്ങളിലെ മോഡലുകളേക്കാൾ വലിയ ബാറ്ററിയാണുള്ളത്.

നിങ്ങൾ അടുത്തിടെ പുതിയ ഫോണിലേക്ക് മാറിയിട്ടുണ്ടെങ്കിലും, പഴയ യുഎസ്ബി-എ (ചതുരാകൃതിയിലുള്ള പോർട്ട്) ചാർജർ തന്നെയാവാം ഇപ്പോഴും ഉപയോഗിക്കുന്നത്. അത്തരം ചാർജറുകൾ പുതിയ യുഎസ്ബി-സി ഐഫോണുകൾക്ക് 5 അല്ലെങ്കിൽ 7.5 വാട്ട് പവർ മാത്രമേ നൽകുകയുള്ളൂ.

ഈ കുറഞ്ഞ വേഗതയിൽ ഒരു പുതിയ ഐഫോൺ പൂർണ്ണമായി ചാർജ് ചെയ്യാൻ മൂന്നോ അതിലധികമോ മണിക്കൂറുകൾ എടുത്തേക്കാം. ഇതുകൊണ്ടാണ് ഐഫോൺ, ചാർജർ ‘സ്ലോ’ ആണെന്ന് മുന്നറിയിപ്പ് നൽകുന്നത്.

10 വാട്ടിൽ താഴെയുള്ള പഴയ ക്യുഐ (Qi) വയർലെസ് ചാർജറുകൾ ഉപയോഗിക്കുമ്പോഴും ഈ മുന്നറിയിപ്പ് കാണാൻ സാധ്യതയുണ്ട്. ഇത് ഫോണിന് അപകടകരമാണോ? ‘സ്ലോ ചാർജർ’ എന്ന മുന്നറിയിപ്പ് കാണുന്നത് ഫോണിന് എന്തെങ്കിലും അപകടം സംഭവിക്കുമെന്നതിന്‍റെ സൂചനയല്ല.

വേഗത കുറഞ്ഞ ചാർജർ ഉപയോഗിക്കുന്നത് ഫോണിന് സുരക്ഷാ ഭീഷണിയോ മറ്റ് കേടുപാടുകളോ ഉണ്ടാക്കില്ലെന്ന് ആപ്പിൾ തന്നെ വ്യക്തമാക്കുന്നുണ്ട്. രാത്രി മുഴുവൻ ചാർജ് ചെയ്യുന്നവർക്ക് ഇതൊരു പ്രശ്നമായിരിക്കില്ല.

ഐഫോണുകളില്‍ ‘സ്ലോ ചാർജർ’ അലേർട്ട് എങ്ങനെ ഒഴിവാക്കാം? പകൽ സമയങ്ങളിൽ വേഗത്തിൽ ഫോൺ ചാർജ് ചെയ്യേണ്ടി വരുന്നവർക്ക് ഈ ‘സ്ലോ ചാർജർ’ മുന്നറിയിപ്പ് ഒഴിവാക്കാനും വേഗത വർധിപ്പിക്കാനും ചില വഴികളുണ്ട്: കേബിൾ ഉപയോഗിച്ച് വേഗത്തിൽ ചാർജ് ചെയ്യുന്നതിന്, 20 വാട്ടോ അതിൽ കൂടുതലോ ശേഷിയുള്ള ഒരു പുതിയ പവർ അഡാപ്റ്ററും ഒരു യുഎസ്ബി-സി കേബിളും ഉപയോഗിക്കുക. അനുയോജ്യമായ ആക്‌സസറികൾ ഉപയോഗിച്ചാൽ ഐഫോണിന്‍റെ ഫാസ്റ്റ് ചാർജിംഗ് വേഗത 20-27 വാട്ട്‌സ് വരെ എത്തും.

ഈ വേഗതയിൽ ഏകദേശം അര മണിക്കൂറിനുള്ളിൽ പൂജ്യത്തിൽ നിന്ന് 50 ശതമാനം വരെ ചാർജ് ചെയ്യാൻ സാധിക്കും. ഏറ്റവും പുതിയ ഐഫോണുകൾക്കായി, മികച്ച വേഗതയും കാര്യക്ഷമതയുമുള്ള പുതിയ പവർ അഡാപ്റ്ററുകൾ ഉപയോഗിക്കാൻ ആപ്പിൾ ശുപാർശ ചെയ്യുന്നു.

വയർലെസ് ചാർജിംഗിൽ കൂടുതൽ വേഗത വേണമെങ്കിൽ, ആപ്പിളിന്‍റെ ഔദ്യോഗിക മാഗ്‌സേഫ് (MagSafe) ആക്‌സസറികളോ Qi2 സർട്ടിഫൈഡ് ഉപകരണങ്ങളോ ഉപയോഗിക്കാം. പുതിയ ഐഫോണുകൾ 15 വാട്ട് വരെ വയർലെസ് ചാർജിംഗ് വേഗതയെ പിന്തുണയ്ക്കുന്നു.

ഉദാഹരണത്തിന്, ബെൽക്കിൻ പോലുള്ള കമ്പനികളുടെ മാഗ്‌സേഫ് ചാർജറുകൾക്ക് നിങ്ങളുടെ ഐഫോൺ 15 വാട്ടിൽ വയർലെസ് ആയി ചാർജ് ചെയ്യാൻ കഴിയും. ഇതിൽ ചില മോഡലുകൾ എയർപോഡുകൾ ചാർജ് ചെയ്യാനുള്ള സൗകര്യവും നൽകുന്നു.

15 വാട്ടിൽ ഐഫോൺ ചാർജ് ചെയ്യാൻ കഴിയുന്ന സാധാരണ വയർലെസ് ചാർജിംഗ് പാഡുകളും വിപണിയിൽ ലഭ്യമാണ്. FacebookTwitterWhatsAppTelegram