പാലക്കാട്/തിരുവനന്തപുരം: ലൈംഗിക പീഡന കേസിൽ ഒളിവിൽ കഴിയുന്ന രാഹുൽ മാങ്കൂട്ടത്തിൽ എംഎൽഎയുടെ ഫ്ലാറ്റിൽ അന്വേഷണസംഘം നടത്തിയ പരിശോധന പൂർത്തിയായി. ഫ്ലാറ്റിലെ സിസിടിവി ദൃശ്യങ്ങൾക്ക് ഒരു മാസത്തെ ബാക്കപ്പ് ഉണ്ടെന്ന് കണ്ടെത്തിയിട്ടുണ്ട്.
കൂടുതൽ വിവരങ്ങൾ ശേഖരിക്കുന്നതിനായി അന്വേഷണസംഘം നാളെ വീണ്ടും ഫ്ലാറ്റിലെത്തും. കെയർടേക്കറെയും ചോദ്യം ചെയ്യും.
രാഹുൽ അവസാനമായി ഫ്ലാറ്റിലെത്തിയതുൾപ്പെടെയുള്ള നിർണായക ദൃശ്യങ്ങൾ പോലീസിന് ലഭിച്ചു. രാഹുലിന്റെ പേഴ്സണൽ സ്റ്റാഫ് അംഗമായ ഫസലിനെ ചോദ്യം ചെയ്തതിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലും അന്വേഷണം പുരോഗമിക്കുകയാണ്.
അതേസമയം, രാഹുലിന്റെ മൊബൈൽ ഫോണുകൾ ഫ്ലാറ്റിൽ നിന്ന് കണ്ടെത്താൻ അന്വേഷണസംഘത്തിന് കഴിഞ്ഞിട്ടില്ല. എംഎൽഎ ഒളിവിൽ പോയ വഴികൾ കണ്ടെത്താനായി പാലക്കാട് നഗരത്തിലെ ഒൻപത് ഇടങ്ങളിലെ സിസിടിവി ദൃശ്യങ്ങൾ പോലീസ് പരിശോധിച്ചുവരികയാണ്.
വ്യാഴാഴ്ച വൈകുന്നേരം കണ്ണാടിയിൽ നിന്ന് രാഹുൽ പോയതുമുതലുള്ള ദൃശ്യങ്ങളാണ് പ്രധാനമായും നിരീക്ഷിക്കുന്നത്. പ്രത്യേക അന്വേഷണസംഘത്തിന്റെ (SIT) നിർദ്ദേശപ്രകാരം സ്പെഷ്യൽ ബ്രാഞ്ചാണ് സിസിടിവി ദൃശ്യങ്ങൾ പരിശോധിക്കുന്നത്.
രാഹുൽ മാങ്കൂട്ടത്തിലിന്റെ മുൻകൂർ ജാമ്യാപേക്ഷ പരിഗണിക്കുന്നതിന് മുൻപ് തന്നെ അദ്ദേഹത്തെ അറസ്റ്റ് ചെയ്യാനാണ് പോലീസിന്റെ നീക്കം. ഇതിന്റെ ഭാഗമായി നിർണായകമായ അന്വേഷണമാണ് പുരോഗമിക്കുന്നത്.
ഇന്ന് രാവിലെ പ്രാഥമിക പരിശോധനയ്ക്ക് ശേഷം ജില്ലയിലെ ഉന്നത പോലീസ് ഉദ്യോഗസ്ഥരുമായി ചർച്ച നടത്തിയ അന്വേഷണസംഘം, പിന്നീട് അഞ്ചംഗങ്ങളായി തിരിഞ്ഞ് വീണ്ടും ഫ്ലാറ്റിലെത്തി വിശദമായ പരിശോധന നടത്തുകയായിരുന്നു. കുന്നത്തൂർമേട്ടിലുള്ള ഈ ഫ്ലാറ്റിലെ പരിശോധനയും സിസിടിവി ദൃശ്യങ്ങൾ ശേഖരിക്കുന്നതും യുവതി നൽകിയ മൊഴിയുടെ അടിസ്ഥാനത്തിലാണ്.
മുൻകൂർ ജാമ്യാപേക്ഷ നൽകിയത് അറസ്റ്റിന് തടസ്സമാകില്ലെന്നാണ് പോലീസ് വൃത്തങ്ങൾ നൽകുന്ന സൂചന.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
