കണ്ണൂർ ജില്ലയിൽ സിപിഎമ്മിനെ പ്രതിസന്ധിയിലാക്കിക്കൊണ്ട് പുതിയ സാമ്പത്തിക തിരിമറി ആരോപണം പുറത്തുവരുന്നു. പാർട്ടി നേതൃത്വത്തിന്റെ കീഴിലുള്ള നോർത്ത് മലബാർ എഡ്യൂക്കേഷനൽ സൊസൈറ്റിക്കെതിരെയാണ് നിക്ഷേപകർ ഗുരുതര ആരോപണങ്ങളുമായി രംഗത്തെത്തിയിരിക്കുന്നത്.
ഇരിട്ടിയിലെ സിപിഎം, ഡിവൈഎഫ്ഐ നേതാക്കൾ ഭാരവാഹികളായി പ്രവർത്തിക്കുന്ന ഈ ചാരിറ്റബിൾ സൊസൈറ്റിയുടെ പ്രസിഡന്റ് കണ്ണൂർ ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യൻ ആണ്. 2015-ൽ പ്രവർത്തനം ആരംഭിച്ച സൊസൈറ്റി, പ്രദേശത്ത് കോളേജ് സ്ഥാപിക്കാമെന്ന വാഗ്ദാനം നൽകി പതിനായിരത്തിലധികം ആളുകളിൽ നിന്നാണ് പണം സമാഹരിച്ചത്.
1,000 രൂപ മുതൽ 1 ലക്ഷം രൂപ വരെയുള്ള ഓഹരികളായാണ് തുക പിരിച്ചെടുത്തത്. എന്നാൽ വർഷങ്ങൾ പലതു കഴിഞ്ഞിട്ടും കോളേജ് ആരംഭിക്കുകയോ, പിരിച്ചെടുത്ത പണത്തിന്റെ കണക്കുകളെക്കുറിച്ച് വ്യക്തത നൽകുകയോ ചെയ്തിട്ടില്ലെന്നാണ് നിക്ഷേപകരുടെ പ്രധാന പരാതി.
എത്രയും വേഗം കോളേജ് യാഥാർത്ഥ്യമാക്കുകയോ അല്ലെങ്കിൽ നിക്ഷേപിച്ച തുക തിരികെ നൽകുകയോ വേണമെന്നാണ് ഇവരുടെ ശക്തമായ ആവശ്യം. വിഷയം പാർട്ടി നേതൃത്വത്തിന്റെ ശ്രദ്ധയിൽ നേരത്തെ തന്നെ പെടുത്തിയിരുന്നതായി സിപിഎം ലോക്കൽ കമ്മിറ്റി അംഗം ജോസഫ് തോമസ് വ്യക്തമാക്കി.
പണം പിരിക്കാൻ കാണിച്ച ആവേശം കോളേജ് നിർമ്മാണ കാര്യത്തിൽ ഭാരവാഹികൾ കാണിച്ചില്ലെന്നും, ജനങ്ങളുടെ ആശങ്കകൾ അടിയന്തരമായി പരിഹരിക്കാൻ തയ്യാറാകണമെന്നും അദ്ദേഹം ആവശ്യപ്പെട്ടു. എന്നിരുന്നാലും, തനിക്കെതിരെയുള്ള ആരോപണങ്ങൾ പൂർണ്ണമായും അടിസ്ഥാനരഹിതമാണെന്നാണ് സൊസൈറ്റി പ്രസിഡന്റ് ബിനോയ് കുര്യൻ വ്യക്തമാക്കുന്നത്.
കോളേജ് നിർമ്മാണത്തിനായി ഇരിട്ടി നഗരത്തോട് ചേർന്ന് 38 സെന്റ് ഭൂമി വാങ്ങിയിട്ടുണ്ടെന്നും, പദ്ധതിയുമായി മുന്നോട്ട് പോകുമെന്നുമാണ് അദ്ദേഹത്തിന്റെ ഔദ്യോഗിക വിശദീകരണം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
