ഗൂഗിൾ വാലറ്റിന്റെ ഈ രഹസ്യ ഫീച്ചറുകൾ നിങ്ങൾ അറിയുന്നുണ്ടോ? ഡിജിറ്റൽ വാലറ്റിന്റെ ഉപയോഗം എങ്ങനെ എളുപ്പമാക്കാം

പണം നൽകാൻ വേണ്ടി മാത്രം ഉപയോഗിച്ചിരുന്ന ഗൂഗിൾ വാലറ്റ് (Google Wallet) ആപ്പിൽ നമ്മളിൽ പലരും ഉപയോഗപ്പെടുത്താത്ത നിരവധി മികച്ച ഫീച്ചറുകൾ ഉൾക്കൊള്ളിച്ചിട്ടുണ്ട്. പണം നൽകുന്നതിനപ്പുറം നമ്മുടെ ദൈനംദിന ജീവിതം കൂടുതൽ ലളിതമാക്കാൻ ഈ ആപ്പിന് സാധിക്കുമെന്ന് അടുത്തിടെയാണ് പലരും തിരിച്ചറിഞ്ഞത്.

ബാങ്ക് കാർഡുകൾ സൂക്ഷിക്കാൻ മാത്രമല്ല, ലോയൽറ്റി കാർഡുകൾ, ഗിഫ്റ്റ് കാർഡുകൾ, ട്രാൻസിറ്റ് പാസുകൾ, യാത്രാ ടിക്കറ്റുകൾ എന്നിവയെല്ലാം ഇതിൽ സുരക്ഷിതമായി സൂക്ഷിക്കാൻ സാധിക്കും. ഇതിലൂടെ മെയിലുകളോ എസ്എംഎസുകളോ പരതി സമയം കളയേണ്ടി വരില്ല.

ജിമെയിലിൽ നിന്നുള്ള പാസുകൾ ഓട്ടോമാറ്റിക്കായി സേവ് ചെയ്യാം ഗൂഗിൾ വാലറ്റ് ആപ്പിൽ ഏറ്റവും ശ്രദ്ധേയമായ ഒരു ഫീച്ചർ, ജിമെയിലിൽ നിന്നുള്ള യാത്രാ ടിക്കറ്റുകളും പാസുകളും സ്വയം ശേഖരിക്കുന്നു എന്നതാണ്. യാത്രാവേളകളിലും മറ്റ് പരിപാടികളിലും പങ്കെടുക്കുമ്പോൾ ക്യുആർ കോഡുകൾക്കായി ഇൻബോക്സ് മുഴുവൻ തിരയേണ്ടി വരുന്ന ബുദ്ധിമുട്ട് ഇതിലൂടെ ഒഴിവാക്കാം.

ഈ ഫീച്ചർ പ്രവർത്തിക്കുന്നില്ലെങ്കിൽ സെറ്റിങ്സിൽ പോയി ജിമെയിൽ സ്മാർട്ട് ഫീച്ചറുകൾ എനേബിൾ ചെയ്തിട്ടുണ്ടെന്ന് ഉറപ്പുവരുത്തേണ്ടതാണ്. ഇതിനായി ആപ്പ് തുറന്ന് പ്രൊഫൈൽ ഐക്കൺ ക്ലിക്ക് ചെയ്ത് സെറ്റിങ്സ് വഴി ‘Add passes from Gmail’ തിരഞ്ഞെടുക്കാവുന്നതാണ്.

പൊതുഗതാഗത സംവിധാനങ്ങൾക്കായി ഗൂഗിൾ വാലറ്റ് ഉപയോഗിക്കാം പിന്തുണയ്ക്കുന്ന നഗരങ്ങളിൽ മെട്രോ അല്ലെങ്കിൽ ബസ് ഗേറ്റുകളിൽ ഫോൺ ടാപ്പ് ചെയ്ത് യാത്ര ചെയ്യാൻ ഗൂഗിൾ വാലറ്റ് വഴി സാധിക്കും. ഒരു കോൺടാക്റ്റ്‌ലെസ് പേയ്മെന്റ് കാർഡ് പോലെയാണ് ഈ ട്രാൻസിറ്റ് കാർഡുകൾ പ്രവർത്തിക്കുന്നത്.

ചില സംവിധാനങ്ങളിൽ ആപ്പ് തുറക്കേണ്ട ആവശ്യമില്ലാതെ തന്നെ ഫോൺ അൺലോക്ക് ചെയ്ത് ടാപ്പ് ചെയ്യാൻ സാധിക്കും.

സ്വന്തമായി പാസുകൾ നിർമ്മിച്ച് ചേർക്കാം വാലറ്റ് നേരിട്ട് തിരിച്ചറിയാത്ത ബാർകോഡുകളോ ക്യുആർ കോഡുകളോ കസ്റ്റം പാസുകളായി ഇതിൽ മാനുവലായി ചേർക്കാൻ സാധിക്കും. ജിമ്മിലെ അംഗത്വങ്ങളോ ചെറിയ ലോയൽറ്റി പ്രോഗ്രാമുകളോ ഇത്തരത്തിൽ ആപ്പിൽ ഉൾപ്പെടുത്താം.

വാലറ്റ് ആപ്പ് തുറന്ന് പ്ലസ് (+) ഐക്കൺ ക്ലിക്ക് ചെയ്ത് ‘Everything else’ തിരഞ്ഞെടുത്ത് പാസിന്റെ ചിത്രമോ വിവരങ്ങളോ നൽകി ഇത് സേവ് ചെയ്യാവുന്നതാണ്. തത്സമയ ഫ്ലൈറ്റ് വിവരങ്ങൾ അറിയാം ബോർഡിങ് പാസുകൾ ഗൂഗിൾ വാലറ്റ് ആപ്പിൽ സൂക്ഷിക്കുമ്പോൾ എയർപോർട്ടിലെ സൗകര്യത്തിന് പുറമെ തത്സമയ ഫ്ലൈറ്റ് അപ്ഡേറ്റുകളും ഇതുവഴി ലഭിക്കും.

ഗേറ്റുകളിൽ വരുന്ന മാറ്റങ്ങളും യാത്രാ സമയത്തിലെ വ്യത്യാസങ്ങളും ആപ്പിന്റെ സഹായത്തോടെ അറിയാൻ സാധിക്കും. എയർലൈൻ ആപ്പുകൾ പൂർണ്ണമായി ഒഴിവാക്കാൻ കഴിയില്ലെങ്കിലും അടിസ്ഥാന വിവരങ്ങൾ പെട്ടെന്ന് മനസ്സിലാക്കാൻ ഇത് ഏറെ സഹായിക്കും.

കൂടുതൽ സുരക്ഷാ സംവിധാനങ്ങൾ ഉപയോക്താക്കളുടെ സ്വകാര്യതയ്ക്കും സുരക്ഷയ്ക്കും മുൻഗണന നൽകിക്കൊണ്ടാണ് ഗൂഗിൾ വാലറ്റ് പ്രവർത്തിക്കുന്നത്. ടോക്കണൈസേഷൻ സാങ്കേതികവിദ്യ വഴി വ്യാപാരികളുമായി യഥാർത്ഥ കാർഡ് നമ്പറുകൾ പങ്കുവെക്കില്ല.

പകരം ഒരു വെർച്വൽ അക്കൗണ്ട് നമ്പറാണ് ഇടപാടുകൾക്കായി ഉപയോഗിക്കുന്നത്. കൂടാതെ ഡിവൈസ് ഓതന്റിക്കേഷൻ വഴി ഫിംഗർപ്രിന്റ്, ഫേസ് ലോക്ക് അല്ലെങ്കിൽ പിൻ നമ്പർ നൽകിയാൽ മാത്രമേ പണം നൽകാൻ കഴിയൂ.

ഫോൺ നഷ്ടപ്പെട്ടാൽ ‘Find My Device’ വഴി വിവരങ്ങൾ റിമോട്ട് ആയി ലോക്ക് ചെയ്യാനും സാധിക്കും.