മഴ ശക്തമായതോടെ സഞ്ചാരികളെ ആകർഷിച്ച് മറയൂരിലെ ഇരച്ചിൽപാറ വെള്ളച്ചാട്ടം

മറയൂർ മേഖലയിൽ മഴ ശക്തമായ സാഹചര്യത്തിൽ സഞ്ചാരികൾക്ക് നവോന്മേഷം പകർന്ന് ഇരച്ചിൽപാറ വെള്ളച്ചാട്ടം സജീവമായി. മറയൂർ കോവിൽക്കടവിൽനിന്ന് ഇടക്കടവ് ഭാഗത്തേക്ക് ഏകദേശം രണ്ടു കിലോമീറ്റർ അകലെ സ്ഥിതി ചെയ്യുന്ന ഈ വെള്ളച്ചാട്ടം ഇപ്പോൾ വിനോദസഞ്ചാരികളുടെ പ്രധാന ഇഷ്ടകേന്ദ്രമായി മാറിക്കഴിഞ്ഞു.

മറയൂർ–കാന്തല്ലൂർ റൂട്ടിലെത്തുന്ന നൂറുകണക്കിന് സഞ്ചാരികളാണ് ദിവസേന ഈ പ്രകൃതി സൗന്ദര്യം ആസ്വദിക്കാനും വെള്ളത്തിലിറങ്ങാനും എത്തുന്നത്. കുന്നിൻമുകളിൽ നിന്നും പാറക്കെട്ടുകൾ താണ്ടി കുതിച്ചെത്തുന്ന വെള്ളവും ഇവിടുത്തെ ചാറ്റൽമഴയും സന്ദർശകർക്ക് വേറിട്ടൊരു യാത്രാനുഭവമാണ് സമ്മാനിക്കുന്നത്.

മഴയിൽ കുതിർന്നുകിടക്കുന്ന പച്ചപ്പും മലനിരകളും ഈ പ്രദേശത്തിന്റെ ദൃശ്യഭംഗി ഇരട്ടിയാക്കുന്നുണ്ട്. വെള്ളച്ചാട്ടത്തിലെ സമൃദ്ധമായ നീരൊഴുക്ക് കണ്ട് ആനന്ദിച്ചും ചിത്രങ്ങൾ പകർത്തിയുമാണ് സഞ്ചാരികൾ ഇവിടെ സമയം ചെലവഴിക്കുന്നത്.

സാധാരണയായി വർഷകാലത്ത് മാത്രമാണ് ഇവിടെ ശക്തമായ നീരൊഴുക്ക് ഉണ്ടാകാറുള്ളത്. വേനൽക്കാലത്ത് പൂർണ്ണമായി വറ്റിവരളാറുള്ള ഈ വെള്ളച്ചാട്ടം നിലവിലെ ശക്തമായ മഴയെത്തുടർന്നാണ് വീണ്ടും സജീവമായത്.

ഇതോടെ മറയൂർ–കാന്തല്ലൂർ ഭാഗങ്ങളിലേക്ക് എത്തുന്നവരുടെ പ്രധാന സന്ദർശന കേന്ദ്രങ്ങളിലൊന്നായി ഇരച്ചിൽപാറ മാറിക്കഴിഞ്ഞു.